Þorgerður Katrín vill vera áfram varaformaður

Ég er ekki undrandi á því að Þorgerður Katrín Gunnarsdóttir sækist ekki eftir formennsku í Sjálfstæðisflokknum og vilji frekar halda varaformennskunni. Þetta hefur orðið æ augljósara á síðustu dögum. Staðan er einfaldlega þannig að mikilvægt er að næsti formaður Sjálfstæðisflokksins verði utan ráðherrahóps flokksins í síðustu ríkisstjórn. Eflaust mun krafan vera sú að forystunni verði alveg skipt út en Þorgerður Katrín ætlar greinilega að reyna að leiða innra starfið í flokknum af meiri krafti en á síðustu fjórum árum.

Persónulega hef ég ekki tekið afstöðu til hver ég vilji að verði næsti varaformaður. Þorgerður Katrín þarf að endurvinna visst traust að nýju, tel ég, meðal flokksmanna og því alls óljóst að hún verði áfram á þeim stóli. En hún ætlar greinilega að taka þann slag og það ber að virða við hana. Hún hefur verið einn öflugasti forystumaður flokksins á undanförnum árum og virðist njóta mikils stuðnings þrátt fyrir allt, miðað við nýlega könnun. Þar kom sterk staða Bjarna Benediktssonar mjög í ljós.

Ég ætla að styðja Bjarna Benediktsson til formennsku. Ég vil að næsti formaður komi úr hópi óbreyttra þingmanna flokksins á undanförnum árum og sé fulltrúi nýrrar kynslóðar, enda hafa þrír síðustu formenn verið af 68 kynslóðinni. Mikilvægt er að líta til framtíðar. Ég fagna því að ákvörðun Þorgerðar Katrínar liggi fyrir og hún hafi sagt að hún vilji áfram vera í forystu. Nú er það flokksmanna að meta hvort hún eigi að vera þar áfram.

Þorgerður Katrín ekki í formannskjör

Athugasemdir

[Skúli (IP-tala skráð) 10.2.2009 kl. 18:36]

Sæll. Mér kemur dálítið á óvart að þú talar um að Þorgerður þurfi að "endurvinna visst traust að nýju" meðal flokksmanna. Mér þykir hún frábær, en hef skilning á því að hún vilji ekki leggja í formannsslag. Hún hefur kraft og tilfinningu sem mikil þörf er á hjá forystumanni. Vona að samstaða náist á landsfundi.

[Tryggvi Bjarnason (IP-tala skráð) 10.2.2009 kl. 20:48]

það er ekki Þorgerður Katrín sem ræður Elítan hin æðri innan flokksins getur ekki horfið frá fyrri gildum að það sé helst blátt blóð í æðum æðsta strups, Þorgerður Katrin er of nálægt fólkinu í landinu og fjær æðri Elítu flokksins(eigendum) og hryllir þeim við að mannaeskja mjög manvæg sé að vasat í formannsstólinn innan Mafíuflokkisns xD

[Jón Baldur Lorange, 10.2.2009 kl. 21:20]

Mér finnst þú Stefán Friðrik með þessu bloggi grafa undan núverandi forystu Sjálfstæðisflokksins. Þorgerður Katrín er varaformaður í dag og hefur víðtækan stuðning meðal almennings. Hún bar ekki ábyrgð á stjórn efnahagsmála né peningamála - hvað þá að bera ábyrgð á eftirlitinu með bönkunum. Vissulega ber hún sameiginlega ábyrgð á því andvaraleysi sem einkennt hefur stjórnvöld hérlendis sem og víða erlendis gagnvart gandreið fjárglæframanna í viðskiptalífinu og bankakerfinu. Allir stjórnmálamenn eru brenndir af þessari stóru yfirsjón og að hafa trúað í blindni orðum bankamanna.

Það getur einnig verið Stefán Friðrik að Þorgerður Katrín hafi misstígið sig í að taka undir söng Samfylkingarinnar gegn höfuðandstæðingi sínum Davíð Oddssyni. Hins vegar tel ég hana þar hafa viljað vel eins og formaður Sjálfstæðisflokksins í viðleitni þeirra að reyna hvað þau gátu að halda veikburða ríkisstjórn saman. Þau gengu allt of langt í þeirri vegferð sem endaði með ljótum leik Samfylkingarinnar og köldum kveðjum til bæði formanns og varaformanns fyrir þeirra tryggð í garð formanns samstarfsflokksins.

Það er þó mikilvægt á stundum sem þessum að sjálfstæðismenn standi saman sem einn maður bakvið forystuna enda að Sjálfstæðisflokknum sótt úr öllum áttum. Svona hálfvolg skrif eins og birtast hér að ofan hjá þér Stefán Friðrik eru ekki liður í að skapa einingu í baráttunni framundan. 

[Stefán Friðrik Stefánsson, 10.2.2009 kl. 21:23]

Þakka kommentin.

Jón: Ég er einfaldlega að segja að það er ekkert sjálfgefið. Mér finnst ekki sjálfgefið að Þorgerður verði áfram varaformaður. Ég hef hinsvegar ekki tekið ákvörðun um að styðja hana ekki, svo ég svari því hreint út. Núverandi forysta brást því miður á mikilvægum tímum, svo fátt ef nokkuð er öruggt með framtíðina. Því þarf að líta gagnrýnum augum á stöðuna og taka svo afstöðu til málanna. Þetta er mín hugsun á stöðuna og mínar hugleiðingar. Kannski er þetta kallað að hugsa upphátt, en það er líka allt í lagi.

mbk.

[Jón Baldur Lorange, 10.2.2009 kl. 21:39]

Það sem ég vildi sagt hafa er þetta: Ef Þorgerður Katrín Gunnarsdóttir býður fram krafta sína áfram til þjóna Sjálfstæðisflokknum sem varaformaður áfram og miðað við þann almenna stuðning sem hún nýtur úti í þjóðfélaginu þá væri það aðeins vatn á myllu andstæðinga flokksins að fella hana á næsta Landsfundi. Það efast enginn um þau fjölmörgu verk sem Þorgerður Katrín hefur unnið sem menntamálaráðherra á undanförnum árum og aðrir stjórnmálaflokkar öfunda okkur sjálfstæðismenn af því að hafa svo glæsilegan forystumann í sinni þjónustu. Það verða næg verkefni sem þarf að vinna á næstu vikum og mánuðum. Búum okkur ekki til vandamál þar sem þau eru ekki. Þetta er kjarni málsins að mínu áliti, ef ég hugsa upphátt líka!