Mun Musharraf geta haldið uppi einræði í Pakistan?

Það er dapurlegt að heyra fréttirnar af einræðislegum tilburðum Pervez Musharraf í Pakistan, en herlög hans og alræðisvald munu ekki leysa neinn vanda. Þessar gerræðislegu ákvarðanir lykta af ótta Musharraf við að missa völdin. Hann hefur hertekið hæstarétt Pakistans af ótta við að rétturinn teldi hann ekki kjörgengan til forsetaembættis og myndi því ekki staðfesta umboð hans á valdastóli næstu árin.

Það er ánægjulegt að Benazir Bhutto, fyrrum forsætisráðherra Pakistans, hafi tekið af skarið með afgerandi hætti og taki sér stöðu með stjórnarandstöðunni í baráttunni fyrir því að binda endi á ógnarstjórn hersins og einræðislegum tilburðum Musharraf, sem setur á herlög til þess eins að reyna að herða tök sín í vondri stöðu, allt að því óvinnandi. Bhutto talar skýrt í þessum efnum og hefur allar forsendur til að verða sá sterki leiðtogi sem Pakistan þarf á að halda nú í skugga ógnarstjórnar hersins. Ákvarðanir Musharrafs munu aðeins styrkja andstöðuöflin og þetta er engin lausn í stöðunni.

Það verður áhugavert að sjá hvað vesturveldin gera nú. Musharraf hefur notið velvildar víða en það virðist vera að fjúka út í bláinn með nýjustu vendingum í stöðunni. Lýsingarnar á handtökum andstöðumanna, yfirtöku fjölmiðla og hæstaréttar segja allt sem segja þarf um það einræði sem sett hefur verið á í Pakistan, enn sterkari versíón af yfirtöku Musharrafs á Pakistan en var er hann tók völdin með hervaldi fyrir tæpum áratug og sparkaði Nawaz Sharif frá völdum. Það er ekki óvarlegt að telja þessar aðgerðir valdarán, enda ljóst að umboð forsetans var að renna honum úr greipum.

Það er sérstaklega alvarlegt mál ef Musharraf ætlar að afstýra lýðræðislegum þingkosningum í landinu í janúar. Þessi skref sem hann hefur stigið síðustu 40 klukkustundir flokkast ekki undir neitt annað en einræðislegan endaleik alræðisvalds sem er að missa tök á stöðunni og reyna að styrkja veikar stoðir.

Bhutto sakar Musharraf um valdarán

Ár til forsetakosninga í Bandaríkjunum

Ár er í dag þar til að 44. forseti Bandaríkjanna, eftirmaður George Walker Bush, verður kjörinn. Kosningabaráttan er löngu hafin af fullri alvöru og aðeins eru rúmir tveir mánuðir í að forkosningar stóru flokkanna hefjist af krafti. Baráttan er galopin, enda fyrstu forsetakosningarnar frá 1952 þar sem hvorki sitjandi forseti né varaforseti eru í kjöri um sjálft embættið og fyrstu kosningarnar frá 1928 þar sem hvorugur tekur þátt í forkosningum. Þetta verða því sögulegar kosningar hvernig sem fer.

Það blasir orðið nokkuð vel við að Hillary Rodham Clinton, öldungadeildarþingmaður í New York og fyrrum forsetafrú Bandaríkjanna, verði forsetaframbjóðandi demókrata. Hún nýtur um eða yfir 20% forskots á aðra frambjóðendur flokksins. Það er mjög afgerandi forskot. En það er ekkert öruggt í þessum efnum, eins og Howard Dean mátti reyna fyrir fjórum árum. Hann hélt inn í desembermánuð 2003 með mikið forskot, og fékk þá meðal annars afgerandi stuðning Al Gore, en missti forskotið fljótt á árinu 2004 og varð að játa sig sigraðan. En staða Hillary er mjög vænleg.

Baráttan verður hörð hjá repúblikunum. Fátt öruggt í slag þeirra. Þó hefur Rudy Guiliani, fyrrum borgarstjóri í New York, verið með forskot í könnunum þeirra á meðal mjög lengi og virðist hafa sterka stöðu. Hann er þó mjög umdeildur hjá hægrisinnuðustu flokksmönnum og erfitt að spá um hvað gerist þegar að fækka tekur í hóp frambjóðenda og baráttan verður að slag tveggja til þriggja, enda blasir við að fækka mun mjög hratt eftir fyrstu forkosningarnar. Flestir búast við hörðum slag einkum Fred Thompson, Mitt Romney og John McCain við Giuliani. Það verður mjög áhugavert að sjá hverjir missa fyrst af lestinni og hverjir verða raunhæfir keppinautar Giuliani um hnossið.

Fyrir sjö árum stefndi flest í að Hillary Rodham Clinton og Rudolph Giuliani myndu berjast hatrammlega um öldungadeildarþingsæti Patrick Moynihan í New York. Vegna veikinda Giulianis gaf hann ekki kost á sér er á hólminn kom og Hillary vann Rick Lazio með nokkrum yfirburðum og hlaut endurkjör fyrir ári. Kannanir benda nú eindregið til þess að þau verði í kjöri um forsetaembættið eftir ár. En ár er langur tími í stjórnmálum. Það er víst óhætt að segja.

Heilt yfir stefnir í breytingar. George W. Bush, fráfarandi forseti, hefur verið umdeildur, ekki síður innan eigin flokks eftir tapið í þingkosningunum fyrir ári. Flestir frambjóðendur repúblikana nú hafa reynt allt til að fjarlægja sig forsetanum og stefnir því flest til að Bandaríkjamenn kjósi um hreint borð eftir ár og nýja valkosti úr báðum áttum. Það stefnir í spennandi kosningar og sannarlega áhugavert ár framundan í bandarískum stjórnmálum.

Var markvisst unnið gegn Davíð Stefánssyni?

Það er áhugavert að heyra lýsingar Friðriks Olgeirssonar, sagnfræðings, á því hvernig vinstrielítan vann markvisst gegn Davíð Stefánssyni frá Fagraskógi og möguleikum hans á erlendri grundu, einkum hvað varðar möguleika á bókmenntaverðlaunum Nóbels. Allt var það vegna þess að hann var ekki vinstrisinnaður, fylgdi ekki skoðunum vinstrielítunnar, heldur var afgerandi hægrimaður í skoðunum og tali alla tíð. Farið verður nánar yfir þessa þætti í væntanlegri ævisögu Davíðs eftir Friðrik.

Davíð Stefánsson frá Fagraskógi var eitt allra besta ljóðskáld Íslendinga fyrr og síðar. Hann orti af tilfinningu og var sannur í yrkisefnum. Hann er eitt næmasta ljóðskáld sem hefur ritað á íslensku og hafði sterkt vald á ljóðforminu alla tíð. Það hefur mikið verið rætt um það hvers vegna hann hafði ekki sterkari stöðu út fyrir Ísland og var ekki kandidat um bókmenntaverðlaun Nóbels til dæmis. Það hefur lengi verið gefið í skyn að það hafi verið af pólitískum ástæðum sem svo fór og væntanlega er það svo. Það er þó sláandi að heyra þær lýsingar af því sem Friðrik kemur með og byggir á sterkum grunni.

Það er mikilvægt að segja þessa sögu og fara yfir þessi mál lið fyrir lið. Davíð var heilsteyptur í sínum skoðunum og lét ekki breyta lífshugsjónum sínum fyrir listina. Hann var maður skoðana í og með persónulegs styrkleika í verkum sínum. Hann var kannski einfari að mörgu leyti en það er að koma æ betur í ljós að hann gekk einn í list sinni, vegna þess að hann var ekki vinstrimaður og fylgdi ekki elítuboðum í verkum sínum. Það má vel vera að það hafi orðið honum dýrkeypt að einhverju marki, en ég held að hann hafi skilið við sáttur við sitt og verið ánægður með ævistarfið.

Davíð tjáði sig einlæglega um lífsins tilfinningar og heitustu grunnmál lífsins í verkum sínum og var heilsteyptur í því. Hann hefur alla tíð verið það skáld sem ég les þegar að mér líður illa, er glaður eða þarf að leita að einhverju til að kveikja í mér. Það er alltaf eitthvað í skrifum hans sem fær mig til að lesa aftur og aftur. Hann er alltaf ferskur og lifandi. Verk hans eru einfaldlega einstök.

Davíð hefur alltaf skipað stóran sess í huga mínum og verk hans fylgja mér alla tíð. Þau verða aldrei úrelt. Tök hans á íslenskunni og lifandi frásagnarmáti í verkunum halda minningu hans á lofti alla tíð. Fyrir tveim árum ritaði ég ítarlega grein um Davíð Stefánsson frá Fagraskógi fyrir bókmenntavefritið Skýjaborgir, sem þá var starfandi, og bendi á þau skrif hér með.


Í tónlistarspilaranum eru tvö lög við ljóð Davíðs Stefánssonar frá Fagraskógi; hið yndislega Bréfið hennar Stínu, við lag Heimis Sindrasonar, í ljúfum flutningi Herdísar Ármannsdóttur - og hið fallega Caprí Catarína, við lag Jóns frá Hvanná, í flutningi Björgvins Halldórssonar.

Vítisenglafrú ákveður að vera áfram á Íslandi

Það vekur athygli að því sé slegið upp sem frétt að vítisenglafrú hafi ákveðið að vera áfram á Íslandi. Kannski er það frétt að hún fari inn í landið makalaus, en varla þarf að fjalla sérstaklega um ferðalag hennar til landsins. Hún var aldrei handtekin í málinu og beinist því málið sem slíkt auðvitað ekki af henni. Það er bara vonandi að hún njóti þess að vera á Íslandi, svo lengi sem það annars verður.

Það verður ekki annað séð en að aðgerðirnar hafi gengið vel á Keflavíkurflugvelli. Það er alveg ljóst að þeir vítisenglar sem ætluðu sér að koma til landsins um helgina hafa hætt við ferðina eftir að hinir átta voru handteknir, enda blasti við að tekið yrði eins á máli þeirra.

Jóhann Benediktsson, lögreglustjóri á Suðurnesjum, tjáði sig vel um málið í kvöldfréttum og fór yfir sína hlið þeirra mála. Það hafa með þessu verið send afgerandi skilaboð til vítisengla um hug íslenskra stjórnvalda til þeirra.

Eiginkona Vítisengils varð eftir

Samráðsblærinn vofir yfir Baugi og Krónunni

Það hefur verið sláandi að fylgjast með fréttum af hugsanlegu samráði Bónus og Krónunnar. Blær samráðsins vofir yfir verslanakeðjunum, enda hafa margir sem unnið hafa hjá þeim tekið undir fréttir byggðar á heimildarmönnum fréttastofu Útvarps um samráð og skakkar verðkannanir. Held þó að viðtalið við starfsmann Baugs í fimm ár í kvöldfréttum Sjónvarps í gærkvöldi hafi verið þeirra áhugaverðast.

Það er algjörlega ljóst að það er grafalvarlegt mál ef sérstaklega ummæli þess manns eru rétt. Þar var gengið lengst í því að taka undir sögusagnirnar. Skiljanlega kom maðurinn ekki fram undir nafni, enda er hætt við því að líf mannsins breyttist fljótt í hreina martröð ef hann myndi tjá sig um þessi mál undir nafni. En það er alveg ljóst að það að svo margir taki undir sögusagnirnar er merki um að eitthvað mjög rangt hefur gerst hjá þessum verslanakeðjum, hversu ólöglegt sem það annars má vera.

Það blasir við að verðkannanir í þeirri mynd sem við höfum þekkt þær síðustu árin eru gjörsamlega marklausar. Það tekur enginn mark á þeim skáldskap framvegis. Það hvernig þær eru gerðar er bara móðgun við allt hugsandi fólk, neytendur í þessu landi. Að hlusta á Gylfa Arnbjörnsson lýsa því um daginn hvernig þetta er gert var alveg hlægilega kostulegt. Þetta er bara sýndarmennska hin mesta þessar kannanir og verslanakeðjurnar ganga bara á lagið að afvegaleiða umræðuna. Það er heiðarlegra að hætta með þessar svokölluðu verðkannanir en að standa fyrir leiktjaldaplotti eins og þetta er í dag.

Heilt yfir er þetta skelfilegt mál í alla staði. Það þarf að fara fram rannsókn á öllum þáttum þess. Umræðan er annars of umfangsmikil og með marga þræði inn í verslanakeðjurnar til að framhjá henni verði litið. Það verður ekki hægt að treysta þessum aðilum framar ef þeir verða ekki hreinsaðir af ávirðingum beint með rannsókn.

Kerfisbundið haft áhrif á verðkannanir

Pervez Musharraf tekur sér alræðisvald í Pakistan

Það er ljóst að ákvörðun Pervez Musharraf, forseta Pakistans, um að setja á neyðarlög í Pakistan og taka sér alræðisvald, aðeins þrem dögum áður en kjörtímabili hans lýkur, er gríðarlegt áfall fyrir lýðræðisþróun í landinu - stórt skref aftur á bak. Hæstiréttur hefur ekki enn staðfest kjör forsetans fyrir nokkrum vikum og algjör óvissa leikur um umboð hans. Hörð átök hafa verið milli réttarins og forsetans en mikla athygli vakti er hann setti forseta réttarins af upp á sitt einsdæmi.

Sú sem stendur frammi fyrir stærstu spurningunum á þessum degi er þó án nokkurs vafa Benazir Bhutto, fyrrum forsætisráðherra Pakistans. Hún sneri aftur til landsins til að taka þátt í þingkosningunum og hafði augljóslega samið við Musharraf um heimkomuna með einum eða öðrum hætti, hvort sem það var um valdabandalag á næstu mánuðum eður ei. Hún þarf nú að taka af skarið um hvort hún bakki upp forsetann með alræðisvaldið eða berst gegn honum með stjórnarandstöðunni.

Það eru hitatímar í Pakistan og hefur svo verið um langt skeið, eða allt frá því að Musharraf tók völdin fyrir um áratug. Það hefur þó róast niður. Hann hefur notið stuðnings stjórnmálamanna víða um heim með einbeittum talsmáta í kjölfar hryðjuverkanna í Bandaríkjunum, Spáni og Bretlandi og í Íraksstríðinu og því sem hefur tekið við síðan. Áhugavert verður að sjá hvort að það breytist með þessu stóra skrefi aftur á bak í Pakistan á þessum degi.

Bandaríkin lýsa yfir áhyggjum vegna ákvörðunar Musharrafs

Umfjöllun um íslenskt sjónvarpsefni

Það hefur verið áhugavert að sjá hversu mikið af vönduðu íslensku sjónvarpsefni hefur verið í boði í haust og stefnir í skemmtilegan sjónvarpsvetur. Íslenskt efni hefur sjaldan verið betra og boðar vonandi góða tíma framundan og vonandi öfluga viðbót á komandi árum. Sérstaklega er gott að Sjónvarpið hafi tekið sig á með íslenskt efni, en þeir hafa ekki staðið sig vel síðustu árin.

Ætla að fara yfir nokkra íslenska þætti sem ég man eftir og skrifa aðeins um þá.

Næturvaktin
Frábærir gamanþættir sem hitta algjörlega í mark. Einfaldir en vel skrifaðir með nettu skotheldu gríni. Pétur Jóhann Sigfússon er stjarna þáttanna, sem bensíntitturinn Ólafur Ragnar, en þeir Jón Gnarr og Jörundur Ragnarsson slá sannarlega ekki feilnótu. Góðir aukaleikarar krydda þættina. Með því að hafa svo ólíkar persónur saman á einum stað og byggja söguþráð í kringum hverja þeirra er mynduð bæði hlægileg stemmning og áhugaverð. Þetta er klárlega augljóst merki þess að við getum gert alvöru gamanþætti sem slá í gegn. Með bestu gamanþáttum í íslensku sjónvarpi fyrr og síðar.

Kiljan
Frábær bókmenntaþáttur á mannamáli. Agli Helgasyni hefur tekist það sem svo oft hefur mistekist hérna heima; að fjalla um bækur fagmannlega og á máli sem fólk, almennir bókalesendur á öllum aldri, skilur. Vönduð viðtöl, heiðarleg umfjöllun um bækur frá öllum hliðum og skemmtilegar álitspælingar með Kolbrúnu og Páli Baldvin. Þetta er frábær samsetning. Egill hefur áður fjallað um bækur í þáttum sínum með vönduðum hætti en hann blómstrar í þessu formi. Sérstaklega áhugavert að heyra í Braga Kristjónssyni, fornbókasala, sem kryddar þáttinn með frásögnum sínum. Besti sjónvarpsþáttur vetrarins, það sem af er.

Silfur Egils
Besti umræðuþáttur á Íslandi. Kannski er Silfrið eitthvað staðnað í uppbyggingu, en þetta form sem Egill hefur byggt upp er skothelt engu að síður. Bæði spjall með fjórum viðmælendum og svo viðtal þar sem Egill tekur fyrir einn gest til að ræða eitt efni, eða fara vítt yfir sviðið. Egill er frábær spyrill sem þorir að fara alla leið í spurningum en er líka með næmt sjónarhorn á það sem hann er að tala um. Eftir tvö kjörtímabil á sitthvorri stöðinni er Silfrið komið á RÚV í sama pakkanum, enda óþarfi að breyta því sem gengur vel. Þetta er þáttur sem klikkar ekki.

Mannamál með Sigmundi Erni
Sigmundur Ernir fer vel af stað með nýjan spjallþátt sinn. Hann er ekki að taka sama pakkann og Egill Helgason, heldur gerir hlutina á sinn hátt. Uppbyggingin er góð og viðtölin eru áhugaverð og tekið er fyrir það sem skiptir máli. Það er talað á mannamáli í þessum þáttum. Sigmundur Ernir er með snarpan stíl sem kemur sér oftast mjög vel. Er góð viðbót að taka fyrir menningu og listir og pistlar Einaranna fylla þáttinn. Eini gallinn, sem er mjög stór, er leikmyndin sem er ekki nógu góð og skemmir nokkuð fyrir þættinum í heildina. 

Laugardagslögin
Ágætis skemmtiþáttur sem hefur þó tekið smátíma að koma í gírinn. Byrjaði ekkert sérstaklega vel en hefur slípast til með hverju laugardagskvöldinu. Það er ágætt að hlusta á ný lög en mér finnst þó kannski einum of fátt að hafa þrjú lög og byggja heilan þátt upp í kringum það. Ágætis hliðarþættir með. Hinsvegar finnst mér Ragnhildur Steinunn og Gísli Einarsson ekki passa vel saman sem par til að stjórna þáttunum. Verst var það í fyrsta þættinum þar sem þetta var beinlínis vandræðalegt. Gríninnkomur Tvíhöfða eru alltof einhæfar.

Söngvaskáld
Góðir þættir að erlendri fyrirmynd þar sem söngvari kemur, tekur lagið og segir sögur af sér, lögunum og öllu milli himins og jarðar. Skothelt prógramm sem er virkilega áhugavert að fylgjast með. Einfaldur og góður þáttur.

Útsvar
Ágætis spurningaþáttur, í og með svolítið dreifaralegur og skemmtilega hallærislegur. Það er alltaf gaman að horfa á spurningaþætti og stemmningin er hin besta. Þóra og Sigmar standa sig vel að halda utan um þáttinn. Liðin eru oftast nær góð og fókusinn er hraður og góður. Þetta eru þættir sem renna vel í gegn og þeir sem hafa virkilega gaman af spurningaþáttum falla vel inn í stemmninguna í þessum.

07/08 bíó-leikhús
Snarpur en vandaður lista- og menningaþáttur sem tekur fyrir kvikmyndir og leikhús með góðum hætti. Þorsteinn J. og Andrea passa vel í að halda utan um þáttinn og úr verður áhugaverður blær umfjöllunar. Ásgrímur tekur kvikmyndir fyrir með skemmtilegum hætti, er ekki ofstúderaður í pælingum sínum og gerir sitt mjög vel, sem ávallt fyrr. Þetta er þáttur sem er ekki bara fyrir elítuna, heldur alla áhorfendur með snefilsáhuga á listum. Ekki ofsnobbaður þáttur eins og Mósaík áður.

Logi í beinni
Notalegur spjallþáttur með Loga Bergmanni. Er vissulega í anda Laugardagskvölds með Gísla Marteini sem var vinsælasti þáttur Sjónvarpsins fyrir nokkrum árum, en samt eru hlutirnir gerðir með þeim hætti sem hentar Loga. Góðir gestir, góð tónlist og yndislegt andrúmsloft. Getur ekki klikkað. Logi Bergmann er í essinu sínu þarna.

Spaugstofan
Langlífasti gamanþáttur íslenskrar sjónvarpssögu. Fjallar um fréttir vikunnar með sínum gamla góða hætti í grunninn. Brotthvarf Randvers var umdeilt og ekki bætti það þáttinn. Gestaleikarar setja svip sinn á þættina en gera misjafnlega mikið fyrir stemmninguna. Spaugstofan á það til að gera heilsteypt og vandað gamanefni en getur klikkað stórlega inn á milli. Heilt yfir alltaf áhugavert að fylgjast með. Þegar að þeir eru góðir toppar þá enginn en þeir eru orðnir gloppóttari en áður.

Sunnudagskvöld með Evu Maríu
Einlægir og vandaðir spjallþættir. Eva María er snillingur í að skapa hið rétta andrúmsloft, lætur viðmælandann tjá sig hreint út og nær inn að hjartarót með næmum spurningum og persónulegum. Kemur beint að kjarna málsins og kann sitt fag. Eva María er einn besti sjónvarpsmaðurinn sem við eigum í dag og er svona einskonar Jónas Jónasson nútímasjónvarpsins.

Allt í drasli
Áhugaverðir þættir þar sem skyggnst er inn í sóðaveröld landsmanna. Eva Ásrún og Margrét passa vel saman sem teymi í þessu þáttaformi og eru bæði einbeittar og líflegar. Rödd þulsins á milli atriða á vel við. Það er ótrúlegt að sjá hvað sumir geta safnað upp miklu af "drasli" inn í híbýli sín. Skemmtilega hversdagslegt sjónvarpsefni.

Kompás
Frábær fréttaskýringaþáttur sem þorir að taka á málum og talar mannamál í umfjöllun sinni. Stöð 2 gerir betur en Sjónvarpið í þessum efnum, en það er auðvitað með ólíkindum að ríkismiðillinn hafi ekki almennilegan fréttaskýringaþátt á dagskrá sinni. Það var reynt með Brennidepli, en svo var hann tekinn af dagskrá, eins kostulegt og það hljómar.

Tekinn 2
Áhugaverðir þættir, að bandarískri fyrirmynd Punk´d með Ashton Kutcher, þar sem þekkt fólk er tekið fyrir og hrekkt, oftast nær með sprenghlægilegum afleiðingum. Pottþéttur pakki og Auddi Blö er rétti maðurinn til að halda utan um hann.

Stelpurnar
Góðir gamanþættir með skemmtilegri blöndu af tvíræðum bröndurum og notalega svínslegum. Með bestu gamanþáttum síðustu ára. Stelpurnar klikka ekki.

Ertu skarpari en skólakrakki
Líflegir og snarpir þættir þar sem fullorðnir keppa við skólakrakka í gáfum. Gunnar Hansson stendur sig vel sem stjórnandi - klárir og skemmtilegir þættir.


Það sem mér finnst í heildina leiðinlegast eru auglýsingahléin inni í íslensku þáttunum, sem stundum eru sponseraðir af stórfyrirtæki og eru sýndir á áskriftastöðum. Þetta er alveg ólíðandi. Varð að bæta þessu við í blálokin.

Vítisenglarnir farnir frá Íslandi

Jæja, þá eru vítisenglarnir farnir af landinu og mesta hasarnum lokið í máli þeirra. Sýnist á öllu að flestir sem hafa tjáð sig um málið séu sáttir við þessi málalok og hversu vel lögreglan hélt á málum. Með þessu er tekið vel á máli sem vissulega getur verið umdeilt en ég held að flestir hafi fullan skilning á og styðji verklagið.

Fékk bæði tölvupósta og komment hér um skrif mín um þetta mál. Langflestir þeirra voru ánægðir með skrifin og sammála þeim. Það er mikilvægt að taka vel á þessu og sýna vítisenglum hver stefna íslenskra stjórnvalda er í þeim efnum. Það er talað um að þeir fari jafnvel í mál vegna þessara aðgerða. Það er auðvitað þeirra mál. Ég fæ ekki betur séð en að lögreglan hafi tekið á vanda með skynsömum hætti.

Það er kómískt að heyra suma líkja þessu máli við Falun Gong-málið fyrir fimm árum. Þetta tvennt á ekkert sameiginlegt. Þá kom til landsins hópur friðsamra mótmælenda sem vildi tjá skoðun sína vegna opinberrar heimsóknar Jiang Zemin. Vítisenglar eru útlent glæpagengi, þekkt fyrir hrotta. Þeir eiga ekkert erindi hingað. Þessar aðgerðir voru nauðsynlegar að öllu leyti.

Vítisenglarnir farnir af landi brott

Jafntefli í háspennuleik

Það er óhætt að segja að háspenna hafi einkennt leik Manchester United og Arsenal. Gallas tókst að jafna metin á síðustu mínútu, þegar að flestir stuðningsmenn Manchester United voru farnir að fagna sigri, og er því hetja Arsenal í dag. Spennan heldur áfram í deildinni og eflaust eru stuðningsmenn ManUtd hundfúlir með úrslitin.

Það stefnir í áhugavert einvígi Arsenal og Manchester United á næstu vikum. Þess sáust öll merki í leiknum í dag hversu baráttan er hörð. Hef jafnan verið stuðningsmaður Manchester United. Hef fylgst með enska boltanum nokkuð lengi og haft gaman af. Það er lykilatriði að hver eigi sitt lið og fylgi þeim út í rauða dauðann.

En þetta var sannarlega spennandi leikur og vonandi verður baráttan um titilinn í ár hörð og spennandi.

Gallas jafnaði á síðustu mínútu, Arsenal - Man.Utd 2:2

Lögreglan heldur vel á málum í Leifsstöð

Lögreglan hefur haldið vel á málum í Leifsstöð í dag með handtöku sjö vítisengla og með því að meina þeim landgöngu hér á Íslandi. Það skiptir lykilmáli að íslensk stjórnvöld sendi skýr skilaboð í þessum efnum með ákvörðunum sínum. Þetta er afgerandi og traust ákvörðun að mínu mati sem lögregluyfirvöld eiga hrós skilið fyrir.

Það er reyndar með ólíkindum að íslenskir bifhjólamenn vilji samstarf með einum eða öðrum hætti við útlend glæpagengi, sem þekkt eru fyrir gróft ofbeldi og dópmál, og vilji greiða götu þeirra hérlendis. Af því stafar áberandi ógn sem taka verður á án þess að hika hið minnsta.

Greiningardeild lögreglunnar hefur gert sitt vel og heilt yfir eru þetta ákvarðanir sem skipta máli og ég held að meginþorri landsmanna sé ánægður með þessa niðurstöðu sem blasir við.

Félögum í Vítisenglum neitað um landgöngu

Mikill áhugi fyrir jólatónleikum Björgvins

Það er ekki undrunarefni að uppselt hafi orðið á innan við klukkutíma á jólatónleika Björgvins Halldórssonar í Höllinni í desember. Björgvin hefur sungið ótalmörg jólalög í gegnum tíðina og fáir hafa sungið þau fleiri hérlendis. Tónleikarnir verða eflaust upplifun af svipuðu tagi og þeir sem Björgvin hélt í fyrra með Sinfó, en þeir voru alveg frábærir. Þá áttu upphaflega að vera tveir tónleikar, en bætt var við vegna mikillar eftirspurnar. Ekki er hún minni vegna jólatónleikanna.

Er hreinlega ekki viss hvað Björgvin hefur sungið mörg jólalög. Sennilega eru þau nærri að fylla hundraðið. Hann hefur hinsvegar gefið út hið minnsta fjórar jólaplötur sjálfur og sungið á mörgum öðrum plötum með hinum ýmsu listamönnum úr ólíkum áttum. Ætlar hann að vera með gesti á jólatónleikunum og eflaust verða tónleikarnir yndislegir. Björgvin hefur jafnan gert hlutina annaðhvort upp á 110% eða sleppt þeim. Það má því stóla á vandaða umgjörð, rétt eins og fylgir plötum hans og tónleikum jafnan.

Það verður reyndar áhugavert að sjá núna hvort bætt verður við tónleikum fyrst uppselt var á innan við klukkutíma á þessa einu. Ekki yrði ég undrandi á því að reynt yrði að bæta við tónleikum fyrst áhuginn fyrir þeim er svo mikill sem raun ber vitni.

Uppselt á jólatónleika Björgvins Halldórssonar

Vítisenglar handteknir á Keflavíkurflugvelli

Það kemur sannarlega ekki að óvörum að félagarnir í Vítisenglum sem komu til landsins síðdegis hafi verið handteknir. Fleiri eru á leiðinni og væntanlega verður öllu þessu fólki vísað úr landi fyrir dagslok. Þetta eru góð viðbrögð hjá lögreglu. Það þarf að taka á þessum málum hratt og vel, sýna að ekkert hik sé yfir málum.

Ég held að enginn vilji sé meðal landsmanna fyrir því að taka á móti þessu fólki. Lögreglan hefur tekið sömu ákvörðun oft og er farið yfir sögu þess síðustu árin í fréttinni sem tengill er á neðst í færslunni. Þetta er rétt stefna. Vítisenglar eru að mestu leyti samansafn glæpamanna sem ferðast um heiminn. Saga þeirra er þekkt og talar sínu máli í gegnum síðustu árin sérstaklega.

Mikill aðbúnaður hefur verið á Keflavíkurflugvelli, sem er til marks um hversu alvarlegt þetta mál er metið. Lögreglan hefur unnið gott verk. Það er vert að hrósa henni gott verk.

Vítisenglum snúið við

Englar vítis á leiðinni til Íslands

Það er sem flesta grunaði í gær; englar vítis hinir dönsku eru á leiðinni til Íslands í heimsókn. Ekki verður sagt að þetta séu aufúsugestir okkar hér og viðbúnaður við komu þeirra því enn meiri en gengur og gerist þegar að von er á farþegum frá Norðurlöndunum hingað á Frón. Það verður áhugavert að sjá hvað gerist á Keflavíkurflugvelli síðar í dag. Hversu harkalegt andrúmsloftið verður yfir komu gestanna.

Þessir englar vítis hafa komið hingað áður og ekki verið teknir neinum vettlingatökum. Árið 2002, að mig minnir, kom fjöldi þessara manna hingað til lands og þeim var vísað úr landi án tafar, áður en gestgjafarnir gátu svo mikið sem spurt hinnar margteygðu lykilspurningar til allra ferðamanna; How do you like Iceland? Sama hefur gerst nokkrum sinnum síðan.

Þessi heimsókn engla vítis á sér stað innan við sólarhring eftir að dóp og vopn voru gerð upptæk hjá Fáfni í Reykjavík. Margir spyrja sig í hvaða átt svartasti hluti þessa bransa er að þróast. En það er vonandi að tekið verði á komu þessara manna.

Að mínu mati eru þeir ekki velkomnir til Íslands. Það sést vel af viðbúnaði á Keflavíkurflugvelli þar sem um 70 lögreglumenn bíða komu vítisenglanna. Væntanlega verða þeir sendir aftur til síns heima í kvöld.

Ríkislögreglustjóri með viðbúnað vegna komu Vítisengla til landsins

Sorgarsaga af öryrkja

Það er óhætt að segja að sagan af kynnum Guðmundar Inga Kristinssonar við kerfið sé hrein sorgarsaga. Það er eitthvað að í samfélaginu ef svo er komið að fólk sem slasast er betur komið með að sleppa bæturnar en halda þeim. Það að fólk stórtapi á að þiggja bætur er vond sýn inn í kerfið okkar. Öll sagan út í gegnum hjá Guðmundi Inga er því miður ein af þessum sögum sem hafa heyrst áður en ekki allir vilja segja undir nafni, veikindasaga af þessu tagi og kynnin af kerfinu enda oftast sem raunasaga þeirra sem fyrir verða.

Mér finnst það ekki þægileg tilhugsun í þessu samfélagi ef svo er komið að fólk sem slasast og fær dæmdar bætur er betur komið með að sleppa þeim en þiggja. Þetta er eitt af þessum dapurlegu dæmum sem blasa við, sem varla er hið eina sinnar tegundar. Þetta er að mínu mati hreint og beint til skammar.

Stórtapaði á að þiggja bætur eftir slys

Million Dollar Baby - rífleg fatakaup

Það er nett skondið að fylgjast með fréttaflutningi af ríflegum fatakaupum glamúrgellunnar Britney Spears, sem eyðir milljón á mánuði í spjarirnar. Það væri reyndar áhugavert að vita hvernig það er eiginlega hægt að eyða svo miklum peningum per mánuð í fatakaup ein og sér. Það hlýtur að vera bara einblínt á dýrustu og flottustu merkin sem til eru og allan annan umbúnað sem dýrastur telst. Eitt er þó víst að ekki fer stóri hluti tólf milljónanna á ári í nærbrækurnar.

Það er oft erfitt að hugsa sér heiminn séð með augum þessara stjarna vestanhafs sem lifa sínu lífi í myndavélablossum og mismikilli óreglu í og með. Það er vissulega svo að flestar þessar stjörnur þurfa að eyða vænni fúlgu í að hugsa um útlitið, fötin og allt annað sem máli skiptir.

Samt eru þetta upphæðir sem meðaljóninn í mannlífshafinu botnar ekkert í. Ekki færa þessir peningar fólkinu hamingju en það þarf vænan skilding til að halda þeim lífsstandard sem mestu skiptir.

Britney kaupir föt fyrir milljón á mánuði

Vopn og fíkniefni finnast hjá Fáfnismönnum

Það er óhætt að segja að lögreglan hafi komist í feitt við húsleit í félagsheimili bifhjólafélagsins Fáfnis í dag. Þar hefur verið lagt hald á vopn og fíkniefni. Verklag lögreglu er til fyrirmyndar að mínu mati. Ef vaki lék á málum þurfti að fá stöðuna fram í dagsljósið og kanna það betur. Það eru skuggahliðar á þessum bransa og greinilega margt annað gert í svona félagsskap en að þeysa á bifhjólum.

Mikið er talað um mögulega yfirvofandi komu meðlima Hells Angels hingað til lands í ellefu ára afmælishóf Fáfnis. Það eru nokkur ár síðan, sennilega fimm til sex, síðan að mikið var fjallað þá um komu fulltrúa danskra bifhjólamanna, sem hafa verið mjög umdeildir og var þeim vísað úr landi með hraði.

Mér finnst Hells Angels lítið hafa hingað að gera og fagna því að lögreglan taki á þessu máli fljótt og vel. Árangur húsleitarinnar segir allt sem segja þarf um stöðuna í þessum geira.

Lögreglan lagði hald á vopn í félagsheimili Fáfnis

Hörð átök borgar og bissnessmanna framundan?

Ef marka má yfirlýsingu stjórnar Geysis Green Energy síðdegis er von á hörðum átökum fyrirtækisins við Reykjavíkurborg vegna ákvarðana stjórnmálamanna í borgarráði Reykjavíkurborgar í dag. Þeir telja bæði tuttugu ára einkaréttarsamninginn og samrunann sem slíkan enn í fullu gildi þó pólitískt munaðarlaus ákvörðun fyrrverandi borgarstjórnarmeirihluta hafi verið felld úr gildi. Aldrei var meirihluti í borgarstjórn fyrir samrunanum.

Það gæti verið mjög stórt og mikið mál framundan. Tíðindi dagsins hafa verið óvænt fyrir suma en aðrir fagna. Í heildina held ég allir fagni að tekið var á þessum málum af hálfu hinna kjörnu fulltrúa, að þeirra skoðun á málinu kæmi fram loksins. Það var ljóst frá fyrsta degi að engin sátt var við samrunann innan Sjálfstæðisflokksins og fyrri meirihluti sprakk á málinu, öllum hliðum þess. Aldrei var séð að sátt yrði heldur innan nýs meirihluta með verklagið og ákvarðanirnar.

Það er ljóst að þessu máli er fjarri því lokið. Línur hafa þó skýrst. Hið pólitíska vald í Reykjavík hefur talað. Það virðist vera nær algjör samstaða kjörinna fulltrúa að þessi samruni sé út úr kortinu við allar aðstæður sem uppi eru. Er með ólíkindum að farið var af stað í málið með svo lélegum hætti sem fyrri meirihluti gerði og áhugavert að sjá hvaða áhrif það verklag hafi er yfir lýkur.

Geysir Green segir samninga vera fullgilda

Björn Ingi barinn til hlýðni í nýja meirihlutanum

Svo virðist vera sem að Björn Ingi Hrafnsson hafi verið tuskaður til í nýja vinstrimeirihlutanum og hafi orðið undir fyrir vilja Svandísar Svavarsdóttur. Fyrst varð hann að víkja úr starfshópnum margumtalaða og nú er samruni REI og GGE úr sögunni með ákvörðun borgarráðs. Málið er komið á byrjunarreit og þær ákvarðanir sem Björn Ingi barðist fyrir að haldið yrði til streitu hafa verið ómerktar. Eftir stendur hreint borð og vonandi nýr grunnur í öllu málinu.

Eftir stendur að Svandís hefur sigur í málinu og Framsóknarflokkurinn hefur orðið að lúffa. Það er athyglisverður sigur fyrir þessa vonarstjörnu vinstri grænna. Það er svosem ekki óeðlilegt að litið sé á niðurstöðuna sem ósigur Björns Inga. Hann barðist mjög fyrir sinni hlið málsins og valdi frekar að sprengja meirihluta Sjálfstæðisflokks og Framsóknarflokks en að beygja sig undir breytta stefnu í REI-málinu. Nú á að taka Orkuveituna fyrir í stjórnsýsluúttekt og samruninn heyrir sögunni til.

Björn Ingi er í þeirri stöðu að vera innilokaður pólitískt. Nýr vinstrimeirihluti er endastöð hans í því pólitíska tafli sem er í borgarstjórn. Það færir Degi B. Eggertssyni, Margréti Sverrisdóttur og Svandísi Svavarsdóttur öflug tromp. Öllum er enda ljóst að aldrei framar verður talað um samstarf Sjálfstæðisflokks og Framsóknarflokks í borginni meðan að Björn Ingi leiðir Framsókn. Þarna er óbrúanleg gjá milli aðila.

Þessi gjá gerir það að verkum að vinstrileiðtogarnir geta tuskað Björn Inga til, jafnáberandi og raun ber vitni í dag. Þetta gefur vonandi fyrirheit um framhaldið og valdaminni Framsókn í borginni, þar sem hún þarf að éta ofan í sig sín fyrri stóru orð við slit fyrri meirihluta.

Björn Ingi: Alls ekkert skipbrot

Samruna hafnað - skynsamlega tekið á málunum

Það er jákvæð niðurstaða að samruna REI og GGE hafi verið hafnað af borgarráði og þar með sé málið sett á byrjunarreit. Þetta er hið eina rétta fyrsta skref til að vinna úr þeim erfiðu flækjum sem mynduðust í REI-málinu síðustu vikurnar. Nauðsynlegt er að fara ofan í saumana á öllum þáttum málsins, jákvætt er að stjórnsýsluúttekt verði gerð á Orkuveitu Reykjavíkur, enda ljóst að margt hefur þar farið úrskeiðis og samstarf embættismanna og stjórnmálamanna verið mjög ábótavant á þeim vettvangi.

REI-málið var eitt klúður frá upphafi til enda. Meirihluti Sjálfstæðisflokks og Framsóknarflokks hélt illa á málum og úr varð risavaxið pólitískt klúður sem lyktaði af mikilli spillingu. Í því áttu sér stað ákvarðanir sem ekki var hægt að una við og því er það auðvitað mjög ánægjulegt að bakkað verði með samrunann, einkaréttarsamningarnir blásnir af með áberandi hætti og farið ofan í saumana á vinnuferlum í Orkuveitu Reykjavíkur. Það virkar á fólk sem svo að þar vinni menn eins og fyrirtækið sé ríki í ríkinu, sem lúti ekki ákvörðunum borgaryfirvalda. Það þarf að taka af skarið og bæta úr því.

Heilt yfir er ég ánægður með fyrstu skref þessa starfshóps. Margir voru í heildina mjög efins um að þar yrði þorað að taka á erfiðum málum og reyna að þoka málum fram á við, leiðrétta ruglið og reyna að laga það sem aflaga fór í þessu REI-máli á vakt fyrri meirihluta. Svandís Svavarsdóttir, borgarfulltrúi, hefur með þessu sýnt að hún ætlar ekki að éta ofan í sig þetta mál og ætlar að taka á því. Eða ég vona það. Þessi fyrstu verk gefa manni von um að tekið verði á hinu ranga og unnið úr vandanum.

Stjórnmálamenn verða að vera með það öflugt bein í nefinu að þora að taka svona stórar ákvarðanir. Heilt yfir er vonandi að tekið verði á þeim vanda sem til staðar er, horfast í augu við mistökin sem gerð voru og laga þau til þess sem eðlilegt á að vera. Þetta skref borgaryfirvalda hlýtur að teljast jákvætt fyrsta skref á þeirri vegferð.

Borgarráð samþykkir að hafna samruna REI og Geysis Green

Nektin selur

Það er ekki hægt að segja annað en að nektin selji í nútímasamfélaginu sem við lifum í. Það þarf ekki að horfa lengi í kringum sig í blöðum, á netinu og sjónvarpi... eða mörgum öðrum þáttum til að sjá það. Tímarnir eru afgerandi og boðskapurinn er það líka. Hilmir Snær Guðnason er orðinn þekktur fyrir nektina og hann hefur því ekki beint fetað í fótspor Egils Ólafssonar, í laginu Slá í gegn, sem söng um að hann myndi gera allt fyrir frægðina nema að koma nakinn fram. Hann hefur þorað að sýna allt í kvikmyndum og á sviði og hikar ekki beint.

Nekt er líka orðin meira áberandi í kvikmyndum og leikhúsi. Öll höfum við sennilega upplifað það að með einhverjum hætti er haldið á þær brautir. Ekki er langt síðan að við sáum alþjóðakynningu á leikriti, bresku leikriti meira að segja. Þar var nekt grunnþema í kynningu. Aðalleikarinn gerði Harry Potter ljóslifandi á hvíta tjaldinu fyrir tæpum áratug. Það þarf sennilega varla að taka það fram að með kynningarmyndunum einum var tryggð metaðsókn á verkið. Það blasti bara við öllum, þurfti ekkert að ræða það neitt meira.

Fyrir áratug var leikritið Blue Room kynnt með nektinni. Í verkinu sem sýnt var í London var nekt grunnurinn og aðalleikkonan var Nicole Kidman, sem síðar hlaut óskarsverðlaunin fyrir The Hours og er ein vinsælasta leikkona sinnar kynslóðar. Leikritið sem slíkt féll í skuggann. Þið megið geta þrisvar hvað stóð mest eftir sýninguna. Fyrir nokkrum árum var svo The Graduate sýnt í London líka. Vita nú allir um hvað það snýst eftir myndina guðdómlegu frá 1967 með Dustin Hoffman og Anne Bancroft. Allir vita líka hvað vakti mesta athygli í sviðsuppfærslunni.

En er þetta kannski bara tákn tímans? Það hefur sjálfsagt hver og einn sína skoðun, sína sýn á það. En þetta vekur athygli.

Hilmir Snær nakinn í kvikmyndum