Siðlaus verknaður - aðför að einkalífi fólks

Þeir sem ráðast að fólki í skjóli nætur eru í hefndarþorsta af einhverju tagi... vilja ráðast að einum manni en gleyma að bakvið hann eru fjölskylda og nágrannar sem ekkert hafa gerst af sér. Held að það hljóti að vera ömurleg lífsreynsla að tengjast þeim sem verður fyrir svona siðlausri aðför og þeir sem búa nærri hljóta að verða fyrir áfalli ekki síður.

Aðför að einkalífi fólks ber að fordæma. Hafi einhverjir eitthvað að athuga við verk þeirra sem ráðist er að er miklu betra að mótmæla með því að skrifa greinar gegn því sem þeir telja athugavert. Árás á húsnæði eins manns er árás á einkalíf hans, eiginkonu og börn. Þar er ekki bara ráðist að einni manneskju.

Þeir hafa veikan málstað fram að færa sem ráðast svona að fólki. Þetta er algjör aumingjaskapur... árás í skjóli nætur, árás frá fólki sem þorir ekki að standa við skoðanir sínar.

Nágrönnum auðmanna líður illa

Jón Ásgeir heldur dauðahaldi í síðustu leifarnar

Nú blasir við að verslunarveldi Baugsfeðga verði tekið upp í skuldir. Þetta eru óumflýjanleg endalok fyrir menn sem eiga ekkert nema skuldir og verða að gera upp sínar skuldir. Fjarstæða er að setja reksturinn hér heima út fyrir sviga og eðlilegt að spurt sé hvort þeir séu borgunarmenn fyrir skuldum. Nú reynir á það þegar kröfuhafar reyna að taka verslunarveldið til að fá upp í skuldir.

Jón Ásgeir virðist enn í afneitun yfir hruni viðskiptaveldisins - viðtalið við hann í kvöld vekur spurningar um hvort hann sé að grínast í þjóðinni eða sé hreinlega í algjörri veruleikafirringu. Ekki getur hann kennt Davíð Oddssyni og Sjálfstæðisflokknum um þetta núna. Svona er það þegar menn missa andstæðinga sína... stundum sjá þeir eftir þeim.

Þetta er eðlilegur endir á flugi Baugsfeðga... allt tekur enda um síðir. Flóttinn frá skuldunum er dæmdur til að mistakast... þeir verða að taka skellinn á sig.

Jón Ásgeir: Stenst enga skoðun

Óánægja eykst með ESB-aðildarviðræður

Ég er ekki undrandi á því að andstaða aukist mjög við aðild Ísland að ESB. Eftir atburðarás undanfarinna mánaða er ekki við því að búast að áhugi Íslendinga á að tilheyra Brussel-valdinu hafi aukist. Merkilegasta niðurstaðan í þessari könnun er einmitt sú að Íslendingar telja hag sínum ekki betur borgið innan ESB.

Forðum sögðu mestu stuðningsmenn aðildar að aðildarviðræður einar og sér myndu styrkja krónuna og efla trú á henni. Auk þess myndu Íslendingar eiga auðveldar með að vinna úr sínum málum. Allir sjá að það hefur ekki gerst.

Samfylkingin virðist vera í vanda með þetta mál sitt. Fyrir nokkru var sagt að Samfylkingin væri aðeins að hugsa um tvennt: ESB og að tryggja Einari Karli atvinnu. Hið síðarnefnda virðist ganga vel en hitt ekki.

Fleiri andvígir en hlynntir ESB-aðild

Forsetinn er algjörlega rúinn trausti

Ólafur Ragnar Grímsson, forseti Íslands, er algjörlega rúinn trausti og ætti að hugleiða að segja af sér. Þjóðin ber enga virðingu fyrir honum lengur, né telur hann vera sameiningartákn eða leiðtoga í þessari erfiðu stöðu sem við blasir.

Eðlilegt væri að Ólafur Ragnar viki af forsetastóli og myndi gefa landsmönnum tækifæri til að velja nýjan þjóðhöfðingja sem er ótengdur útrásarvitleysunni sem Ólafur Ragnar var svo órjúfanlega tengdur.

Reyndar er það sennilega hámark niðurlægingarinnar fyrir þennan forseta að Davíð Oddsson sé metinn meira sameiningartákn Íslendinga en hann.

Fáir telja forsetann sameiningartákn þjóðarinnar

Kemur skilnaðurinn í Krossinum okkur við?

Opinber yfirlýsing Gunnars og Ingu í Krossinum um skilnað þeirra er merkileg, enda er það ekki á hverjum degi sem hjón gefa út yfirlýsingu um að þau hafi sagt skilið hvort við annað. Er þetta ekki einkamál þeirra? Hví þarf að gefa út sérstaka yfirlýsingu um þetta? Kannski líta þau svo á að staða Gunnars leyfi ekki skilnað og þetta sé vandræðalegt mál fyrir trúarhöfðingjann með hina fornu sýn á trúarlegar áherslur og gildi hjónabandsins.

Skilnaður er að mínu mati einkamál. Allt fólk er mannlegt. Ekki er sjálfgefið að tveir einstaklingar geti búið saman og elskað hvort annað alla tíð. Skilnaður og breytingar á lífi okkar eru eðlileg þegar tveir einstaklingar geta ekki lengur búið saman. Slíkt á ekki að vera stórtíðindi. En væntanlega samrýmist skilnaður illa í huga þeirra sem lifa eftir fornu regluverki kristinnar trúar, sem hafa predikað að hjónabandið sé heilagt og því geti í raun ekki lokið.

En þetta er svosem lífsins gangur.... sama hvað trúaráherslum í Krossinum líður.

Forstöðuhjón Krossins að skilja

Kanye West missir niður um sig á MTV

Rapparinn Kanye West fór yfir strikið með því að ræna Taylor Swift um augnablikið sitt á myndbandaverðlaunum MTV. Eflaust algjört career-sjálfsmorð fyrir rapparann að hafa stolið sviðsljósinu af Swift og úthúða henni. Enda er hann úthrópaður um öll Bandaríkin fyrir að vera ruddi og ekki húsum hæfur. Ætli þetta sé ekki í fyrsta skipti vestanhafs sem sigurvegari tónlistar- eða kvikmyndaverðlauna fær ekki að klára ræðuna sína vegna þess að einhver rústar augnablikinu?

Kanye baðst afsökunar

Allar upplýsingar upp á borðið

Guðlaugur Þór Þórðarson gerir hið rétta með því að krefjast fundar í viðskiptanefnd um hin miklu og alvarlegu mistök við gjaldþrot LÍ í Lúx. Allar upplýsingar þarf að fá á borðið og gera upp þetta mál. Þetta er grafalvarlegt mál og þarf að vita hver staðan er með skilanefndina og verkferla bakvið tjöldin. Þetta gengur einfaldlega ekki.

Hvað varð um allt gegnsæið og upplýsingamiðlunina sem stjórnvöld lofuðu forðum daga? Hafa þau algjörlega gleymt hverju þau lofuðu - þarna eru spurningar sem þarf að fá svör við.

Vill fund um Landsbanka

Pínleg endalok Borgarahreyfingarinnar

Við blasir að þingmenn Borgarahreyfingarinnar séu á förum þaðan - eftir stendur grasrótarhreyfing án þingmanna innan við hálfu ári eftir alþingiskosningar. Þvílík endalok - pínleg sögulok í hreyfingu sem átti að vera svo frjáls og laus við allt regluverk og lagaumgjörð... þetta átti að vera svo "öðruvísi" - án þess að útlista það nánar svosem.

Hreyfingin hrynur svo á mettíma vegna sundurlyndis og ólgu vegna þess að engin umgjörð er utan um - grasrótin er algjörlega ótengd við þingmennina sem vinna í nafni hreyfingarinnar. Þetta er nett tragedía - en miðað við deiluefnið í fréttumfjöllun í gær eru þetta helst egósentrískar erjur.

Borgarahreyfingin sem átti að vera upphaf á nýjum tímum í íslenskum stjórnmálum hefur á undraskömmum tíma fest hinn hefðbundna fjórflokk í sessi... hann er traustari en jafnan áður.

Íhuga áframhald á samstarfi

Hörkutólið á vaktinni

Eva Joly er mikið hörkutól - við getum verið stolt að hafa hana á vaktinni. Hún hefur sýnt mikið þor, með því að þora að tala gegn stjórnvöldum sé hún ósammála og hefur velt við öllum steinum í sinni rannsókn. Hún talar á mannamáli. Ég kann að meta þetta og verð æ sáttari við þá ákvörðun að fá hana til verksins. Við þurftum einmitt á henni að halda, enda er hún fagleg en ákveðin í sínum verkum.

Hún er traustur málsvari Íslands á þessum erfiðu tímum - allir kunna að meta framlag hennar með greinaskrifunum fyrir nokkrum vikum þegar hún þorði að rífa kjaft á alþjóðavettvangi meðan íslenskir ráðherrar sögðu ekki múkk þegar að landinu var sótt til að reyna að halda dyrum opnum hjá Evrópusambandinu. Hún þorði meðan aðrir lympuðust niður.

Hörkutólið á vaktinni hefur fyrst og fremst stuðning þjóðarinnar - við getum treyst henni til að gera rétt og þora að verja Ísland á alþjóðavettvangi.

Bankahrun líkist máli Madoffs

Magnús Árni víkur - hvað varð um Sigmund?

Magnús Árni Skúlason átti að segja sig úr bankaráði Seðlabankans fyrr í dag, þegar ljóst var að honum væri ekki sætt, frekar en reyna að koma sér úr vandanum með pínlegum afsökunum og ásökunum í garð blaðsins sem sagði frá staðreyndum málsins. En hvað varð um Sigmund Davíð Gunnlaugsson, formann Framsóknarflokksins? Af hverju tók hann ekki fyrr á þessu máli með því að slá það út af borðinu þegar um hádegisbil.

Þetta er vandræðalegt mál fyrir Framsóknarflokkinn og hinn nýja formann. Hann átti að klára þetta mál sjálfur en ekki láta það dankast gegnum daginn og bíða eftir að Magnús Árni viki sjálfur með vandræðalegri tilkynningu sem viðurkennir ekki pínleg vinnubrögð hans og er í ásökunartón gagnvart fjölmiðlum.

Framsókn reynir að hreinsa sig af spillingarstimpli en er samt á bólakafi í svo pínlegu máli. Nýr formaður var hvergi sýnilegur í umræðunni við að klára það fumlaust og traust.

Fer fram á lausn frá störfum

Munu þingmennirnir yfirgefa Borgarahreyfinguna?

Vandséð er hvernig Birgitta Jónsdóttir, Margrét Tryggvadóttir og Þór Saari geti verið þingmenn Borgarahreyfingarinnar áfram eftir ósigur þeirra í kosningu um lög hreyfingarinnar. Niðurstaðan virðist fela í sér að hreyfingin sé algjörlega ótengd þingmönnunum, enda verða þeir að velja á milli hreinna afarkosta og lögum sem þau geta ekki samþykkt.

Í raun má segja að hreyfingin hafi liðið undir lok í deilumáli Margrétar og Þráins Bertelssonar fyrir nokkrum vikum - eftir það hefur hún varla verið starfhæf og óeiningin augljós bak við tjöldin. Þingmennirnir standa nú frammi fyrir því að vinna eftir lögum sem þau telja óaðgengileg eða fara ella úr hreyfingunni.

Fari þingmennirnir burt er hreyfingin í raun búin að vera enda hefur hún þá ekki lengur nein tengsl við þingið og stendur eftir sem hópur þeirra sem standa utan þingflokksins. Þetta eru kostuleg endalok á grasrótarframboðinu, sem fór úr tengslum við grasrótina á innan við hálfu ári.

Tillaga þingmanna féll

Sættir Framsókn sig við svona vinnubrögð?

Vandséð er hvernig Magnús Árni Skúlason geti setið áfram í bankaráði Seðlabankans eftir uppljóstranir um vinnubrögð hans. Nú reynir á hvernig hin nýja forysta Framsóknarflokksins tæklar svona vandræðalegt mál, hvort þeir sætta sig við verklagið eða taka á svona vandræðamáli ákveðið og fumlaust strax. Sigmundur Davíð Gunnlaugsson er sem formaður Framsóknarflokksins í þeirri stöðu að verða að taka af skarið strax, af eða á með bankaráðsmanninn.

Fyrir nokkrum mánuðum var gerð tillaga um Magnús Árna í annað sætið á framboðslista Framsóknar í Reykjavík norður - Sigmundur Davíð stillti honum upp í sætið á eftir sér. Eins og flestir muna fór Alfreð Þorsteinsson þar í pontu og gerði út af við uppstillinguna með þeim orðum að óþarfi væri fyrir Framsókn að sækja inn spillingu í flokkinn. Magnús Árni dró framboðið til baka.

Þetta er vandræðaleg staða fyrir Framsóknarflokkinn - flokk sem hefur á bakinu gamlan spillingarstimpil og hefur reynt mjög ákveðið að hreinsa hann af sér, t.d. með kynslóðaskiptum í forystu og flestir forystumenn gömlu tímanna hafi vikið af sviðinu. Þarna reynir á hvort það var ekta eður ei.

Gegn markmiðum Seðlabanka

Af hverju sagði Anna Kristine þessa sögu ekki fyrr?

Algjörlega óskiljanlegt er að Anna Kristine Magnúsdóttir hafi beðið í rúm tvö ár með að segja frá hvernig komið var fram við hana eftir skrifin um Kumbaravogsmálið. Þetta var ekki síður frétt en þau skrif. Tengslin milli Landsbankans og bankastjórans við kortamálið tengt Önnu Kristine er þess eðlis að þetta átti að verða forsíðufrétt á þeim tíma... nú hefur fréttin minna vægi en þá hefði verið... en er samt sem áður stórfrétt.

Hvernig stendur á því að þaulvanir fjölmiðlamenn sem hafa fréttanef og skynja stórfrétt þegar þeir komast á sporið þagna þegar annað eins mál gerist? Það er stórmál þegar einn banki lokar á viðskiptavin af engum sökum og reyna að koma henni í mikil vandræði, enda hefði hún verið handtekin með "stolið" kort hefði verslunarstjórinn ekki þekkt hana.

Hvernig er hægt að þaga yfir svona í yfir tvö ár?

Anna Kristine var þjófkennd

Tvíkynja afreks"kona" svipt gullverðlaunum

Ég get ekki séð hvernig Caster Semenya getur haldið gullverðlaunum sínum. Eftir rannsóknir á henni og niðurstöðu um að hún sé tvíkynja er öllum ljóst að hún stóð öllum öðrum í hlaupinu framar vegna yfirburða sinna og líkamsbyggingar - varla verður hægt að una þeirri niðurstöðu. Erfitt verður að átta sig á hvort hún sé í raun kona eða karlmaður... sennilega bæði.

Þetta minnir óneitanlega á mál ólympíuhafans Stellu Walsh - við andlát hennar árið 1980 kom í ljós að hún var engu síður karlmaður en kona... enn er deilt um hvort hún var í raun og hvort öll afrek hennar yrðu útmáð og strikað yfir að hún hafi unnið ólympíugullverðlaun sem kona.

En tímarnir eru aðrir - þessi niðurstaða leiðir til þess að tekið verði á umdeildum álitaefnum og varla séð að Caster hin suður-afríska geti hafa unnið þessi verðlaun sem kona eftir þessar uppljóstranir.

Umfjöllun um Stellu Walsh

Fjölskylda Semenya bregst reið við

Barnalegar árásir Jóns Ásgeirs á Egil Helgason

Jón Ásgeir Jóhannesson fer mikinn í viðtalinu við Viðskiptablaðið. Barnalegar árásir hans á Egil Helgason eru frekar slappar. Held að það væri meiri sómi fyrir Jón Ásgeir að viðurkenna að hann talaði gegn betri vitund í Silfursviðtalinu um Tortola á sínum tíma og reyndi að afvegaleiða almenning á lokahring Baugshringekjunnar, sem tókst að teyma þorra þjóðarinnar allt of lengi með því að stýra fjölmiðlum og almenningsumræðunni með peningaaustri í allar áttir.

Jón Ásgeir talar mikið um hvað þetta hefði verið gott ef svona hefði verið gert og þetta verið gert öðruvísi. Þetta er uppgjör manns sem vissi fyrir löngu í hvað stefndi og hafði fullt vit á hvað var að gerast. Hann hélt samt hringekjunni áfram og reyndi að ráðast að öllum sem bentu honum á augljósar staðreyndir... sýndi engan áhuga á að gera upp ósómann og breyta rétt... hann er ekki rétti maðurinn til að gera upp eigin mistök og afglöp.

Ætlar kannski einhver að segja manni að þetta hafi allt hrunið yfir Jón og vini hans upp úr þurru? Partýið var búið löngu áður en allar veitingarnar kláruðust.

Áttum að hætta árið 2005

Endurskipulagning í Valhöll

Ég sé að mikið er gert úr endurskipulagningu í Valhöll og breytingum þar innanhúss. Held að það sé eðlilegt að stokkað sé þar upp eftir að fylgi flokksins minnkaði í þingkosningum og ýmsar aðrar breytingar hafa orðið í þjóðfélaginu. Mikilvægt var að færa þar til verkefni og mér finnst Jónmundur Guðmarsson, framkvæmdastjóri Sjálfstæðisflokksins, hafa staðið sig vel í þeirri uppstokkun.

Varla var því að búast að allt yrði eins í starfsemi flokksins eftir úrslit þingkosninganna og full þörf á að breyta til. En breytingar af öllu tagi verða sjaldan sársaukalausar fyrir alla hlutaðeigandi. En fyrst og fremst tel ég lykilatriðið í þessum breytingum að þær efli bein tengsl við flokksmenn og skilvirkni verði meiri í flokksstarfinu.

Augljóst er að mikið verk er framundan fyrir Sjálfstæðisflokkinn. Þar skiptir mun meira máli hvernig hugað er að flokkskjarnanum frekar en skrifstofuhaldi.

Starfsmönnum í Valhöll sagt upp

Sigurði sparkað - vinstrierjur á Álftanesi

Seint verður sagt að það komi að óvörum að Sigurði Magnússyni hafi verið sparkað af bæjarstjórastóli á Álftanesi. Vinstristjórnin þar hefur verið stjórnlaus og hvorki getað stjórnað Álftaneslistanum og hvað þá sveitarfélaginu - þar hefur verið stjórnarkreppa í allt sumar og í raun verið frekar vont andrúmsloft meginhluta kjörtímabilsins... erjur innan meirihlutans hafa sligað sveitarfélagið og þar er algjört stjórnleysi nú í boði vinstrimanna.

Svona staða er ömurleg fyrir eitt sveitarfélag - þegar eitt framboð getur ekki höndlað umboð bæjarbúa og komið sér saman um aðgerðir eða vinnubrögð er eðlilegt að aðrir taki við. Bæjarstjóranum hefur mistekist að leiða þennan hóp og fær reisupassann. Stutt er til kosninga og vont að meirihlutinn sem vann með þremur atkvæðum í kosningum 2006 hafi ekki ráðið við verkefnið.

Þetta er vandræðalegt fyrir þennan hóp og leitt fyrir sveitarfélagið að búa við stjórnleysi of lengi. Verst af öllu er ef enginn meirihluti er fyrir hendi og þörf á stjórnleysi allt fram í júní þegar ný bæjarstjórn tekur við völdum. En þetta er sameiginlegt átak vinstrimannanna - aðrir koma þar ekki nærri.

Sigurður lætur af störfum

Heldur Guðmundur að fólk sé heimskt?

Heldur þykir mér vandræðaleg yfirlýsing Guðmundar Haukssonar um að hann hafi ekki vitað af innherjaviðskiptunum í SPRON. Heldur hann að fólk sé heimskt eða hreinlega fífl? Flestir sjá örugglega í gegnum þessi vinnubrögð. Í sannleika sagt held ég að öllum ofbjóði þessi vinnubrögð og hvernig unnið var bakvið tjöldin.

Þetta er ekki eina málið af þessum toga - við erum öll að verða vön að fá skammt hér og þar af vinnubrögðunum bakvið tjöldin. Þetta mál í SPRON er eitt af mörgum, en með þeim óhuggulegri.

Guðmundur: Bjó ekki yfir upplýsingum

Fjármálaeftirlitið fær ekki að skjóta sendiboðana

Góð tíðindi eru að Fjármálaeftirlitið fái ekki að skjóta sendiboða hinna válegu tíðinda, blaðamennina sem birtu upplýsingar um alvarlegt verklag í bönkunum, glæpsamlegu verkin umdeildu. Auðvitað er eðlilegt að þessar upplýsingar séu gerðar opinberar og mun frekar á að verðlauna þessa blaðamenn fyrir góð störf frekar en ráðast að þeim. Kannski er þetta skólabókardæmi um hvernig vinnuferlið hefur verið í Fjármálaeftirlitinu, eftirlitsstofnun sem svaf gjörsamlega á verðinum.

Mikið er talað um bankaleynd og hversu langt hún eigi að ganga. Mér finnst blasa við að ýmislegt miður geðslegt á að fela bakvið tjöldin með bankaleyndinni, hún eigi að ná mun lengra en eðlilegt er. Eðlilegt er að velta fyrir sér hvort ekki eigi að afnema hana og koma með allt á borðið.

Mjög mikilvægt er að hreinsa út og greinilegt að þeir eru í bönkunum sem leka gögnum og koma málum á borðið framhjá þeim sem yfir þeim eru og hefur verið falin forysta í bönkunum þó þeir hafi verið á kafi í ruglinu þar áður fyrr.

Öllum kærum á hendur blaðamönnum vísað frá

Er vinstristjórnin á Álftanesi fallin?

Allt frá því að vinstrimenn unnu hreinan meirihluta í bæjarstjórn Álftaness með þremur atkvæðum fyrir rúmum þremur árum hefur verið vægast sagt merkilegt að fylgjast með verklaginu og ákvörðunum þeirra - ekki síður frægu deilumáli vegna Kristjáns Sveinbjörnssonar sem leiddi til þess að hann varð að víkja úr bæjarstjórn. Endurkoma hans virðist hafa fellt vinstrimeirihlutann og nú bendir flest til þess að bæjarfulltrúi Álftaneslistans ætli að fella Sigurð Magnússon úr stóli bæjarstjóra fyrir lok kjörtímabilsins.

Auðvitað er það erfitt fyrir eitt sveitarfélag að horfa upp á aðra eins sundrung eins stjórnmálaframboðs og þessa Álftaneslista. Vandræðalegt er þegar menn geta ekki klárað kjörtímabilið sem þeir hafa verið kjörnir til, þó vissulega með mjög naumum meirihluta. En eftir átökin í þessu sveitarfélagi og allt sem á undan er gengið þarf varla að koma að óvörum að þeim hafi mistekist að klára árin fjögur.

Vonandi fá íbúar þarna betri stjórn og farsælli en þá sem ráðið hefur för og er fyrir nokkru komin út í skurð.

Bæjarstjóraskipti á Álftanesi?