Munu Bretar og Hollendingar taka gagntilboði?

Auðvitað er það von allra að fyrirvarar við Icesave-samkomulagið, sem kollvarpa samningnum og gjörbreyta, verði til einhvers gagns. Hinsvegar má búast við að Bretar og Hollendingar líti hornauga fyrirvara við samning sem var undirritaður fyrir tveim mánuðum. Samningurinn er auðvitað pólitísk afglöp þeirra sem bera ábyrgð á honum.

Fyrirvararnir bera þess merki að samningurinn er handónýtur.... í raun er verið að leggja drög að öðrum samningi en þeim sem Svavar Gestsson skrifaði undir í pólitískri ábyrgð vinstristjórnarinnar. Af hverju var ekki samið um þessa fyrirvara í samningsdrögunum hafi þeir skipt vinstristjórnina svo miklu máli?

Stóra niðurstaðan er sú að vinstristjórnin klúðraði málinu, gat ekki gert almennilegan samning né staðið vörð um hagsmuni Íslands. Þess vegna hefur málið verið stopp vikum saman, stjórnarflokkarnir höfðu ekki meirihluta fyrir þeim samningi sem skrifað var undir.

Beðið er nú viðbragða Breta og Hollendinga. Varla þarf að búast við að þeir verði sælir með þann nýja samning sem vinstristjórnin var neydd til að skrifa upp á vegna þingvilja... þegar sá gamli var fallinn í þingferlinu.

Viðbrögð Breta og Hollendinga rædd

Uppgjör í móðu - mistökin á vakt Geirs

Ég hlustaði áðan á Geir Haarde, fyrrverandi forsætisráðherra, á BBC World Service. Að mörgu leyti gott viðtal og ágætis umfjöllun, en enn og aftur virðist sem Geir geti ekki gert upp fortíðina hreint út og viðurkennt að margt fór úrskeiðis í aðdraganda hrunsins. Margir sem treystu Geir fyrir fjöreggi þjóðarinnar og halda utan um þau mál sem mestu skiptir urðu fyrir miklum vonbrigðum. Ég er einn þeirra.

Geir H. Haarde ber mikla ábyrgð á því að hafa ekki gripið í taumana. Sjálfur hefur hann vikið af sviðinu, þá ákvörðun ber að virða. Ríkisstjórn hans svaf á verðinum - ekki verður litið framhjá því að hún  brást algjörlega þegar á reyndi - var reyndar alltaf handónýt. Hún stóð sig ekki í stykkinu þrátt fyrir rúman þingmeirihluta.

Sjálfsagt er að hann viðurkenni þá ábyrgð. Hann átti að gera það fyrir löngu síðan, enda er hún svo augljós. Geir sem verkstjóri þeirrar ríkisstjórnar var þó allavega sýnilegri í þeim verkum en núverandi forsætisráðherra. Ósýnilegri forsætisráðherra höfum við ekki séð í nútíma fjölmiðlun síðustu áratuga.

Stóra vandamál Íslands síðustu árin er að okkur vantar alvöru leiðtoga - sem gætir hagsmuna Íslands og stendur sig í stykkinu, stappar stálinu í þjóðina og leiðir hana í blíðu sem stríðu. Margir treystu Geir í því hlutverki en mjög margt fór úrskeiðis. 

Greinilegt er þó að stjórnarsamstarfið við Samfylkinguna voru mikil pólitísk mistök. Sú ríkisstjórn skildi eftir sig vont bú og þessir flokkar náðu ekki að vinna heilsteypt saman. Eina sem hélt samstarfinu saman voru trúnaðarbönd Geirs og Ingibjargar. Stjórnin svaf á vaktinni.

Ég er einn þeirra sem varð fyrir gríðarlegum vonbrigðum með pólitíska forystu Geirs. Ekki aðeins hans heldur fleiri innan flokksins sem leiddu okkur út í stjórnarsamstarf sem var andvana fætt. Þeir sem voru þá á vaktinni eiga ekki skilið annan séns.

Met mikils að menn geti beðist afsökunar. Slíkt er manndómsmerki. Margir fleiri þurfa að gera það en stjórnmálamenn. Þeir sem leiddu okkur út í þetta fen, útrásarvíkingar og bankamenn bera stóra ábyrgð sem þeir verða að taka á sig. Þeir hafa sloppið of billega frá þessu.

Ég skynja að Geir iðrast sinna mistaka. En hann greinilega túlkar stóru mistökin sín að hafa treyst á Samfylkinguna. Æ betur sést hversu mjög hann þóknaðist þessum margsundraða flokki og lagði eigin örlög í hendur aðila sem voru ekki heilsteyptir.

Sá verður stóri dómur Geirs og þeirra sem áttu að vera á vaktinni með honum en brugðust algjörlega. Ekki er boðlegt að segja þjóðinni að það hafi verið of seint að gera eitthvað. Niðurstaðan er einföld og verður ekki umflúin: þau brugðust.

Of seint að bregðast við

Copy/paste fréttamennska íslenskra fjölmiðla

Mér finnst það merkilegt að allir fjölmiðlar birti kokkaða tilkynningu ríkisstjórnarinnar um 100 daga áætlunina sem einhvern sannleik. Þegar litið er á óháð mat er augljóst að tilkynningin er röng eða í besta falli mjög villandi... væntanlega til að róa þá sem eru hundfúlir með fyrstu íslensku vinstristjórnina... sem hefur litlu sem engu breytt í íslenskri stjórnmálasögu eða fyrir heimilin í landinu. Skjaldborgin varð jú gjaldborg... ekki satt?

Hvernig er það annars... birta fjölmiðlar alveg gagnrýnislaust allar fréttatilkynningar sem þeir fá sendar til sín? Er ekki lagst í neina vinnu á bakvið það sem til þeirra er sent... vinsað úr og reynt að kafa ofan í málin?

42 mál af 48 afgreidd á 100 dögum

Eru bankarnir algjörlega úr tengslum við þjóðina?

Sé það rétt að Landsbankinn hafi afskrifað skuldir Magnúsar Kristinssonar, útgerðarmanns, sýnir það veruleikafirringu í bankakerfinu - hversu þeir eru úr tengslum við þjóðina. Þetta er besta leiðin til að kalla fram aðra byltingu í þessu samfélagi - hví ætti Jón og Gunna úti í bæ að sætta sig við að skuldir stóreignamanna séu felldar niður þegar þau eru bundin og kefluð í skuldafangelsi... þurfa að borga sínar skuldir hvað sem tautar og raular.  

Hvað segir vinstristjórnin um þetta verklag á þeirra vakt? Ætla þau að taka í taumana eða horfa á svona vinnubrögð í þeirra ábyrgð? Eðlilegt er að krefja þá svara sem komust til valda undir formerkjum þess að auka gegnsæi og heiðarleika í samfélaginu en hafa litlu afrekað annað en gleypa hugsjónir sínar á mettíma.

Gamli Landsbankinn afskrifar skuldir Magnúsar

Þurfti að hugleiða hvort skuldir færu í innheimtu?

Sjálfsagt og eðlilegt er að Björgólfsfeðgar taki á sig skuldir sínar, eins og Jón og Gunna úti í bæ. Hví tók það einhverjar vikur að taka ákvörðun um að þeir þyrftu að borga - skuldin færi í innheimtu? Er ekki eðlilegt að þeir fái sömu meðferð og aðrir sem skulda? Var virkilega verið að íhuga tilboð þeirra um að borga helming en hitt yrði fellt niður?

Þar sem nokkrar vikur eru liðnar frá því að tilboð hinna skuldsettu feðga varð opinbert er eðlilegt að hugleiða hvort það hafi komið til greina að taka því? Allt hefði orðið vitlaust í samfélaginu hefðu þessir feðgar fengið sérmeðferð og hliðardyr út úr vanda sínum. Kaupþing þá fyrst kynnst hatri í samfélaginu, mun frekar en í lögbannsmálinu.

Milljarðalán Björgólfsfeðga í innheimtu

Dramatísk endalok á hjaðningavígum smáflokks

Skondið var að fylgjast með lokahluta farsans í Borgarahreyfingunni á Alþingi í dag þegar Þráinn Bertelsson gerðist óháður þingmaður og Margrét Tryggvadóttir baðst afsökunar á Alzheimer-tölvupóstinum. Trúverðugleiki þessarar hreyfingar er fyrir löngu gufaður upp... eftir standa aðeins hjaðningavíg og illdeilur fólks sem á greinilega enga samleið lengur.

Margrét verður væntanlega brennimerkt alla tíð af þessum tölvupósti. En hverskonar stjórnmálahreyfing er það annars þar sem allir birta tölvupósta hvers annars á netinu. Traustið er ekkert milli fólks innbyrðis.. varla þarf að búast við að þjóðin treysti þessu fólki.

Þráinn úr þingflokknum

Af hverju íslenskt Wipeout frekar en Kompás?

Mikill skaði var þegar yfirstjórn Stöðvar 2 slátraði fréttaskýringaþættinum Kompás, enda traustur og vandaður þáttur, undir yfirskini þess að þyrfti að spara. Merkilegt er að nú sé eytt stórfé í að gera íslenska útgáfu Wipeout fyrir vetrardagskrá Stöðvar 2 í stað þess að koma með Kompás aftur á dagskrá, einkum nú þegar þörf er á alvöru fréttaskýringaþætti til að gera upp ástandið í samfélaginu... hlúa að þjóðmálaumræðu frekar en léttmeti í sjónvarpi.

Ef marka má fréttir á að fljúga með tugi Íslendinga til Argentínu til að gera íslensku útgáfuna af Wipeout... er þetta góð forgangsröðun í dagskrárgerð? Reyndar hefur fréttavinnsla á Stöð 2 sífellt verið gengisfelld að undanförnu. Ísland í dag er orðið að séð og heyrt í sjónvarpi, glimmer í stað þess að vera alvöru fréttaþáttur með gagnrýnum efnistökum og fréttirnar eru alltaf að styttast og hádegisfréttirnar voru slegnar af. Ekki var kosningavakt í vor þar.

Er það kannski svo að einfalda skýringin á slátrun Kompáss sé sú rétta? Að eigendurnir hafi ekki viljað gagnrýna fréttamennsku í kjölfar hrunsins?

Heiðarlegt uppgjör á útrásartímanum

Eitthvað virðist hlakka í Bretum yfir stöðu okkar og því hvort hér fari fram uppgjör á öllum sviðum. Bretar hafa aldrei verið vinir okkar... ekki von á mikilli samstöðu úr þeirri átt. Þrátt fyrir það á auðvitað öllum að vera ljóst að það er þjóðarvilji á Íslandi að gera upp útrásartímann... aðdraganda efnahagshrunsins. Æ betur verður ljóst að sukkið hafði viðgengist án þess að tekið væri á því.

Ég er fullviss um að nefndir um hrunið muni fara yfir alla þætti þessa útrásartíma og fella afdráttarlausa dóma. Svo fara þessi mál eflaust fyrir dómstóla, enda augljóst að lög voru brotin og dansað á línunni í sumum þeirra. Næsti vetur verður vonandi tími uppgjörs.

Stærsti þátturinn í endurreisn Íslands er uppgjör á fortíðinni - fólkið í landinu finni að hér verði gert upp við liðna tíma. Við getum ekki litið til framtíðar fyrr en fortíðin hefur verið tekin fyrir og algjört uppgjör verði.

Telegraph: Ekkert venjulegt hrun

Glæsilegt hjá stelpunum

Vil óska stelpunum okkar til hamingju með glæsilegan sigur á Serbum. Margrét Lára er sem fyrr hetjan mikla í liðinu, skorar fernu. Getum verið stolt af henni... hún hefur margoft sýnt að hún verðskuldaði að verða íþróttamaður ársins á sínum tíma, þó það væri umdeilt hjá sumum.

Hef alltaf haft mikla trú á þessu liði... við getum verið stolt af þeim. Vonandi gengur þeim vel á stóra mótinu bráðlega.

Margrét Lára sá um Serbana

Níðingsleg framkoma við Íslendinga

Ánægjulegt er að dálkahöfundur í Financial Times taki málstað Íslands á örlagatímum. Framkoma Breta við íslensku þjóðina hefur verið lágkúruleg og níðingsleg í meira lagi. Þeir hefðu aldrei komið svona fram við þjóð sem hefði gripið til vopna og getað varið sig. Verst af öllu er að við höfum sætt okkur við þetta ofríki og ekki reynt að vígbúast. Bretar hafa komist upp með að níðast á þjóð sem hefur ekki herafla en er samt sem áður bandalagsþjóð í NATÓ. Þetta er algjörlega ólíðandi.

Eftir því sem málstaður Íslands er betur kynntur í Bretlandi og á alþjóðavettvangi mun staða okkar styrkjast. Íslensk stjórnvöld hafa algjörlega brugðist í að tala okkar málstað síðasta árið, sérstaklega á erlendum vettvangi. PR-hliðin hefur algjörlega brugðist. Ónýtir íslenskir stjórnmálamenn á ráðherrastólum á lykilstöðum hafa þar leikið mikilvægustu rulluna í að eyðileggja fyrir okkar hlið mála.

Það er sorgleg staðreynd, vægast sagt.

FT: Ábyrgðin sameiginleg

Borgarahreyfing í upplausn - víkur Margrét af þingi?

Skrípaleikurinn í Borgarahreyfingunni heldur áfram af krafti. Yfirlýsing stjórnar um að Margrét Tryggvadóttir eigi að kalla til varamann er vantraust á hana. Athygli vekur að Margrét situr sjálf í nýrri stjórn sem kynnt var til leiks í kvöld. Er hún þar með að lýsa vantrausti á sjálfa sig? Þvílíkur vandræðagangur. Þetta er eins og að horfa á hund elta skottið á sjálfum sér, reyna að bíta í það með reiðisvip á andlitinu. Þetta er kostuleg endalok fyrir stjórnmálahreyfingu sem ætlaði að vera öðruvísi en floppaði á mettíma.

En hvað gerir Margrét? Mun hún taka tilmælum stjórnarinnar sem hún situr sjálf í og víkja? Eða mun hún kannski auk Birgittu og Þórs dissa Borgarahreyfinguna og fara að vinna á eigin vegum? Ekki er að sjá annað en allir þingmennirnir gætu verið farnir að vinna á eigin vegum mjög fljótlega og eftir sitji stjórn Borgarahreyfingarinnar án þingmanna og nokkurra áhrifa, annað en senda tölvupóst sín á milli og birta á heimasíðum sínum.

Þvílík míkró sýn inn í ljónagryfju.... nema hvað þetta er fólkið sem ætlaði sér að breyta heiminum en skapaði pólitískt vandræðaheimili þar sem ekkert sameinar lengur, nema innri sundurlyndi.

Margrét kalli til varamann

Batakveðjur til Jóhannesar eftirhermu

Ég held að allir landsmenn hugsi hlýlega til Jóhannesar Kristjánssonar, eftirhermu, og voni að hann nái fullri heilsu sem allra fyrst. Jóhannes er besta eftirherman í sögu Íslands... hefur slegið eftirminnilega í gegn með túlkun sinni á Guðna Ágústssyni, Ólafi Ragnari, Steingrími Hermannssyni, Alfreð Þorsteinssyni og Halldóri Blöndal... svo nokkrir séu nefndir.

Þessi sena úr skaupinu 2002 er alltaf jafn góð.

Heppinn að vera á lífi eftir hjartaáfall

Sorgleg endalok hjá Borgarahreyfingunni

Meira en lítið súrrealískt er að sjá dauðateygjur Borgarahreyfingarinnar þar sem sjálfseyðingarhvötin hefur drepið nýjasta stjórnmálaaflið á þingi. Engin takmörk virðast á bakstungunum... allt púðrið fer í að slátra afkvæminu. Bréfin á milli Margrétar og Þráins... og félaga innan hreyfingarinnar gefa til kynna að þetta fólk hafi aldrei orðið vinir... aldrei átt neitt sameiginlegt nema baráttu fyrir einhverju óskilgreindu lýðræði sem þróaðist upp í drápsvél gegn hvoru öðru.

Er það kannski ekki bara heila málið? Þetta fólk var aldrei vinir... átti aldrei neitt sem tengdi þau saman. Um leið og nýjabrumið fór af afkvæminu og taka þurfti ábyrgð á einhverju var þetta í raun búið. Taugin var aldrei til staðar. Hvað með það.... þetta er grátleg sjálfseyðingarhvöt að sjá þetta lið vega hvort annað. Svona fólk þarf ekki á óvinum að halda... því nægja samherjar sínir.

Þráinn segir sig úr þingflokki

Borgarahreyfingin liðast í sundur

Augljóst er að Borgarahreyfingin heyrir sögunni til sem alvöru stjórnmálaafl eftir átök síðustu daga milli þingmanna og grasrótar. Límið var einfaldlega ekki sterkt í þessari hreyfingu og það heldur ekki lengur en þetta. Get vel trúað því að vonbrigðin séu gríðarleg fyrir þau sem töldu þessa hreyfingu alvöru. En því miður hefur stefnt í þetta allt frá því að hreyfingin fór inn á þing og þurfti að gera eitthvað annan dissa kerfið.

Þegar ég skrifaði í maí að þessi hreyfing myndi ekki lifa kjörtímabilið fékk ég fullt af tölvupóstum og kommentum frá fólki sem sagði að ég hefði rangt fyrir mér og ég vissi ekkert hvað ég væri að skrifa um. Jæja, svona er þetta. Ekki hlakkar í mér svosem hvernig komið er... ég vona bara að þeir sem eru sárir og reiðir vegna þess að hafa treyst þessari hreyfingu sem lifði ekki sumarið finni sér farveg á öðrum vettvangi.

Þingmenn okkar hafa brugðist

Jóhanna vaknar af þyrnirósablundi....

Eftir rúmlega hálft ár á forsætisráðherrastóli hefur Jóhanna Sigurðardóttir loksins gert eitthvað af viti... talar máli Íslands á alþjóðavettvangi í fjölmiðlum og reynir að standa sig í stykkinu. Jóhanna hefur verið ósýnilegasti forsætisráðherra lýðveldissögunnar síðan Björn Þórðarson gegndi embættinu - varla látið sjá sig í fjölmiðlum og þaðan af síður talað við erlendu pressuna. Sögusagnir um að hún væri mállaus í erlendum tungumálum fengu byr undir báða vængi þegar hún fór ekki á NATÓ-fundinn og hélt blaðamannafund með aðstoð Ellenar Ingvadóttur, túlks, á kjördag 25. apríl.

Seint og um síðir lætur hún sjá sig á þeim vettvangi þar sem tala þarf máli Íslands... taka slaginn og reyna að berja í brestina... leiða þessa þjóð og stappa stálinu í hana - með því að tala við erlendu pressuna og taka á vandanum. Þessi vandi er ekki bara á innanlandsvettvangi Jóhönnu heldur úti í hinum stóra heimi. Það þurfti Evu Joly til að þessi ósýnilegi forsætisráðherra vaknaði og færi að standa sig að einhverju leyti.

Reyndar eru sumir sem segja að Jóhanna hætti brátt í stjórnmálum og nýr yfirformaður taki við völdum í Samfylkingunni af henni og valdamesta stjórnmálamanni landsins, baktjaldamakkaranum Össuri Skarphéðinssyni, Raspútín sjálfum. Gott er að vita að enn er hægt að rita erlent mál í Stjórnarráðinu og tala til pressunnar... þó við séum með forsætisráðherra sem hefur ekki séð ástæðu til þess mánuðum saman.

Þetta hefur verið dýr bið eftir einhverri forystu en vonandi hefur þetta eitthvað að segja - til betri vegar fyrir íslensku þjóðina.

Jóhanna á vef Financial Times

Samstaða um Icesave - Davíð á Austurvelli

Mér líst vel á hversu vel heppnaður samstöðufundurinn var á Austurvelli. Mikilvægt er að klára þetta mál með heill og hag Íslands að leiðarljósi. Athygli vekur að Davíð Oddsson, fyrrverandi forsætisráðherra, var þar einn fundarmanna og tók þátt í þessum vel heppnaða fundi. Davíð hefur verið einn traustasti talsmaður farsællar niðurstöðu í Icesave-málinu fyrir Ísland og verið skeleggur í tali, eins og jafnan áður.

Þessi fundur hlýtur að verða upphafið á því að færa þetta mikilvæga mál úr skotgröfunum, tryggja þverpólitíska samstöðu og einkum það að unnið verði að því að treysta hagsmuni Íslands, tryggja farsæla niðurstöðu fyrir fólkið í landinu og afkomendur þeirra.

Sneisafullur Austurvöllur

Borgarahreyfingin fuðrar upp í hjaðningavígum

Á örfáum vikum hefur pólitískur trúverðugleiki Borgarahreyfingarinnar gufað upp. Púður hennar og kraftur fer mest í innbyrðis sundurlyndi og hjaðningavíg. Hreyfingin hefur á nokkrum vikum breyst í pólitískan vígvöll svipaðan þeim og Frjálslyndi flokkurinn var á síðasta kjörtímabili sínu á Alþingi.

Held að margir hafi efast um fyrir kosningar að þessi flokkur lifði kjörtímabilið, en átti varla von á að hann lifði ekki sumarið. Fólkið í þingsætum Borgarahreyfingarinnar virðist meira hugsa um sínar persónur... egóið hefur tekið öll völd... málefnin vikið fyrir persónulegu skítkasti.

Þetta er ögn neyðarlegt... en eflaust það sem búast má við frá stjórnmálahreyfingu sem var ekki sammála um neitt nema andstöðu og hafði fá mál almennt orðuð á stefnuskránni. Límið endist ekki þegar allt púðrið snýst um að naga skóinn af hvor öðrum innbyrðis.

Vilja Þráin af þingi

Erfiður línudans í Icesave-málinu

Augljóst er orðið að Icesave-samningurinn verður ekki samþykktur óbreyttur, enda stórgallaður og afleitur á marga kanta. Hinsvegar er öll breytingavinna við hann mikill línudans, erfiður pólitískur tangó þar sem allt getur farið á verri veg. Vandséð er hvernig hægt sé að setja einhliða fyrirvara á hann án þess að fella í raun þann samning sem er til staðar.

Heiðarlegast er að fara aftur á fundi með Bretum og Hollendingum og fara yfir þessi mál að nýju. Samningurinn á pólitískri vakt vinstri grænna er pólitískt vandræðabarn sem aldrei mun nást samstaða um.

Margar vikur tók fyrir Samfylkinguna og formannshópinn í vinstri grænum að viðurkenna að samningurinn var afleitur... viðurkenna að hann væri ekki álit meirihluta Alþingis og þjóðarvilji.

Svo verður að ráðast hver lendingin. Mikilvægt er að klára þetta mál þannig að þjóðin geti verið sátt við næstu skref, þverpólitísk samstaða náist og hugsað verði um hagsmuni Íslands.

Fundi fjárlaganefndar lokið

Aumingjaskapur Steingríms J - botnlaus mistök

Botnlaus mistök á pólitískri vakt vinstri grænna í Icesave-samninganefndinni koma æ betur í ljós. Einhver verður að taka þann skell á sig, tel ég. Þetta eru ófyrirgefanleg pólitísk afglöp. Nú loks er kallað eftir skoðun Lee Bucheit, bandarísks sérfræðings í þjóðarskuldum.

Ef það er rétt að aðstoð hans hafi verið afþökkuð í samningaferlinu er það til algjörrar skammar fyrir íslensk stjórnvöld. Ekki var hátt risið á Steingrími J. Sigfússyni áðan þegar hann sagði að þetta kæmi of seint fram... er maðurinn í lagi eða?

Hvað varð um Steingrím J. Sigfússon? Manninn sem reif kjaft fyrir kosningar og áður en hann hlaut lyklavöld í fjármálaráðuneytinu? Er ekki kominn tími á þennan misheppnaða Dr. Jekyll og Mr. Hyde íslenskra stjórnmála?

Leið Buchheits ekki fær

Alvarlegt mál

Manni er nokkuð brugðið við að heyra fregnir af því að Akureyringi hafi verið haldið föngnum og beittur líkamsmeiðingum. Þetta er nýr og skuggalegur veruleiki í samfélaginu okkar, sem við viljum helst ekki trúa að geti verið staðreynd. Mikilvægt er að taka á þessu máli og upplýsa það, svo vitað sé hvað gerðist og við séum viss um að við lifum í traustu samfélagi þar sem tekið er á alvarlegum afbrotum.

Héldu manni föngnum í íbúð