RIP meistari Hopper

Dennis Hopper var leiftandi og traustur leikari, ekki feiminn við að stuða og setti mark sitt á kvikmyndasöguna með afrekum sínum í fjölda kvikmynda. Myndin hans Easy Rider markaði viss þáttaskil í sögu kvikmyndanna, var í senn ferskt og nýtt upphaf þar sem kvikmyndabransinn breyttist umtalsvert.



En hans besta stund á hvíta tjaldinu var í Speed - leiftandi mynd og Hopper algjörlega í essinu sínu. Ein besta hasarmynd sögunnar og er alltaf jafn fersk og er á gríðarlegri siglingu.

En hann byrjaði sinn feril í Rebel Without a Cause og Giant með læriföður sínum í bransanum, James Dean. Hans stjarna reis eftir að Dean féll frá í blóma lífsins.

Og Easy Rider tær snilld, mikið meistaraverk sem mun ávallt vera stóra rósin í hnappagati Hoppers, sem leikara og leikstjóra.

Dennis Hopper látinn

Afsögn Steinunnar Valdísar - pressan eykst

Afsögn Steinunnar Valdísar Óskarsdóttur af þingi ætti varla að vera stórtíðindi... um nokkurra vikna skeið hefur verið ljóst að pólitískum ferli hennar væri lokið vegna styrkjamálsins og staða hennar innan Samfylkingarinnar væri svo til vonlaus. Forysta flokksins í borg og á þingi sneri við henni baki og setti pressu á hana, svo hún yrði fallkandidat flokksins í hrunkaflanum ásamt Björgvini G, sem greinilegt er að fórna á líka til að bjarga öðrum forystumönnum flokksins sem reyna að verjast falli.

Með afsögn sinni eykur Steinunn Valdís pressuna á aðra sem hafa verið í sviðsljósinu eftir hrunskýrsluna og styrkjaumræðuna. Afsögnin magnar ófriðarbálið gagnvart öðrum sem hafa staðið veikt og hafa misst stuðning og styrk innan flokka sinna. Eflaust hefur Steinunn metið stöðuna vonlausa. Frambjóðendur Samfylkingarinnar í Reykjavík sem eiga mjög undir högg að sækja höfðu beinlínis óskað eftir afsögninni með þöglum stuðningi flokksforystunnar.

En styrkjamálum lýkur ekki með afsögn Steinunnar Valdísar. Hún eykur hinsvegar enn frekar kröfuna um uppgjör eftir hrun og þeir sem veikast standa axli sína ábyrgð. Er það vel.

Steinunn Valdís segir af sér

Ísland áfram - glæsilegt hjá Heru Björk

Við getum verið stolt af Heru Björk og hennar hópi með árangurinn í kvöld. Þau áttu glæsilega frammistöðu á sviðinu í Telenor-höllinni, voru alveg í sérflokki. Þriðja árið í röð kemst íslenski hópurinn áfram í keppninni, ógæfan mikla á árunum 2005-2007 er öllum gleymd og allir í sæluvímu núna.

Þetta er líka glæsilegt fyrir Heru, eftir að hafa orðið fyrir neikvæðum röddum, bæði með að lagið væri kópering af framlaginu 2008 og illum röddum að hún myndi ekki komast áfram, lagið væri klisja og hvað eftir öðru var sagt.

Nú er bara að vonast eftir góðu gengi á laugardaginn. Það að komast áfram er þó stór sigur út af fyrir sig og bætir upp allt hið neikvæða í samfélaginu um þessar mundir.

Það verður þjóðargleði á laugardag og partý um allt, sama hvernig Eurovision og kosningar fara. Flott blanda reyndar. :)

Erum í hamingjukasti

Hversu lengi mun brandarinn endast hjá Jóni?

Jón Gnarr gerir góðlátlegt grín að stöðu Reykjavíkurborgar og velgengni sinni í skoðanakönnunum í viðtölum kvöldsins. Spurt er, hversu lengi mun þessi brandari endast hjá Besta flokknum? Varla er það raunhæft að hlæja sig út úr kreppunni - takast á við erfið viðfangsefni með því að snúa því upp í brandara, þó vissulega sé það skemmtilegt um stundarsakir.

Ansi margir hafa ekki gert sér grein fyrir því að atkvæðið er til fjögurra ára, ekki verður tjaldað til einnar nætur með Besta flokknum komist hann til valda. Allir heimsins brandarar verða súrir og hversdagslegir þegar til alvörunnar kemur.

En kannski verður brandarinn nógu traustur til að lifa af lokaviku kosningabaráttunnar... varla verður það langvinn gleði þegar á hólminn kemur.

Jón Gnarr: „Ég er stoltur“

Niðurlæging fjórflokksins í Reykjavík

Flest bendir til þess að grínframboðið Besti flokkurinn sé að komast til valda í Reykjavík og Jón Gnarr verði næsti borgarstjóri. Fari svo verður það skipbrot fjórflokksins, hin mikla niðurlæging þar sem allir hinir hefðbundnu stjórnmálaflokkar eru rassskelltir - refsað fyrir léleg vinnubrögð í aðdraganda og eftirmála hrunsins.

Þetta er líka visst uppgjör við ítalska ástandið í borgarmálunum meginhluta kjörtímabilsins, þar sem valdagræðgi og stólaplott réði för. Skilaboðin eru alveg skýr. Fólk vill uppstokkun á hefðbundnum flokkalínum - þar er engum treyst en öllum refsað. Við sjáum þess dæmi líka hér á Akureyri.

Þetta verða sennilegar kosningar uppstokkunar - nýrra pólitískra tíðinda. Nýtt pólitískt landslag er að myndast. En sennilega ætlar fólk að hlæja sig út úr kreppunni.

Er nema von að spurt sé... hvenær verður brandarinn uppþornaður? Varla mun hann endast í heil fjögur ár. Hvað tekur þá við? Ráðleysi eða meiri hlátur?

Besti flokkurinn með 8 fulltrúa?

Pólitískur jarðskjálfti á Akureyri

Verði könnun Fréttablaðsins og Stöðvar 2 á Akureyri að veruleika stefnir í pólitísk þáttaskil á Akureyri í kosningunum í næstu viku, þar sem ný framboð taka yfir stjórn Akureyrarbæjar og gömlu stóru flokkarnir sem hafa ráðið lögum og lofum er ýtt til hliðar. Aldrei hefur verið myndaður meirihluti þar án þess að gömlu fjórflokkarnir hafi ráðið lögum og lofum. Íhaldsemin hefur verið þar allsráðandi - lítið um drastískar breytingar og uppstokkun, þó vissulega hafi innbyrðis sveiflur orðið allnokkrar.

Staða Sjálfstæðisflokksins er skelfileg í þessari skoðanakönnun - algjört afhroð í kortunum. Eftir tólf ára meirihlutasetu og erfiðleika í aðdraganda kosninganna þar sem varð klofningur mátti jafnvel búast við miklu fylgistapi. Þar spilar líka inn í kaupmáli leiðtoga Sjálfstæðisflokksins og eiginmanns hennar, sem hafði mikil áhrif á umræðuna í bænum, þó meira hafi verið deilt um viðbrögð hennar en nokkru sinni kaupmálann beint.

Sjálfstæðisflokkurinn hefur alltaf verið sterkt afl í bæjarmálunum á Akureyri, annað hvort leitt minnihluta eða meirihluta af krafti. Hann hefur þó tekið sínar dýfur og misst stuðning bæjarbúa. Árið 1942 varð klofningur innan Sjálfstæðisflokksins og hlaut hann þá aðeins tvo bæjarfulltrúa. Það var sögulegt lágmark í fylgi við flokkinn hér í bænum. Hann mælist nú með minna fylgi en þá og stefnir í vonda útkomu.

Verði úrslitin á þessa leið er alveg ljóst að krafan er um uppstokkun, það er alveg á tæru. L-listinn hefur nú aðeins einn bæjarfulltrúa. Muni Oddur Helgi Halldórsson ná kjöri úr þriðja sætinu er hann sigurvegari kosninganna. Hann lagði mikið undir og virðist hafa spilað rétt. Hann virðist með pálmann í höndunum. Framsókn nær ekki því flugi sem að var stefnt. Skipbrot fjórflokksins er algjört.

Þessum meirihluta verður augljóslega hafnað í kosningunum í næstu viku. Tölurnar eru svo afgerandi að því verður ekki neitað - staðreyndin varla umflúin. Það verður eflaust uppgjör við bæjarstjórakapalinn, skipulagsmálin og fleiri umdeild mál þar sem sótt hefur verið að ráðandi öflum.

Við megum búast við pólitískum jarðskjálfa hér í næstu viku fari kosningar á þessa leið, þar sem íhaldsemin víkur fyrir breytingum.

Meirihlutinn fallinn á Akureyri

Endalokin hjá Jóni Ásgeiri

Engum dylst að stefna skilanefndar Glitnis er sem myllusteinn um hálsinn á Jóni Ásgeiri Jóhannessyni og markar endalokin á viðskiptaferli hans. Erfitt verður fyrir hann að verjast þeim atriðum sem vikið er að honum, enda er hann þegar byrjaður í útúrsnúningi og rangfærslum.

Pínlegt er að kenna Davíð Oddssyni um hvernig komið er. Þessi tugga er orðin svo þreytt að hún missir marks, meira að segja þeir sem hafa dekstrað Jón Ásgeir eru hættir að taka undir, vilja ekki bera þennan spuna á torg..

Eftir standa staðreyndir málsins og væri heiðarlegra fyrir Jón Ásgeir að horfast í augu við ábyrgð sína og verk í viðskiptalífinu og sýna iðrun. Staðreyndirnar munu allar verða lýðum ljósar í þessu máli.

Jón Ásgeir í The Times

Jóhanna reynir að sparka Jóni úr ríkisstjórn

Súrrealískt er að fylgjast með vinstristjórninni lánlausu og framgöngu veruleikafirrta forsætisráðherrans. Ekki er nóg með að hún hafi logið að þingi og þjóð um launakjör Más Guðmundssonar, heldur ætlar hún nú að sparka á dyr öðrum ráðherranum úr röðum vinstri grænna: ekki var næg lexía að henda Ögmundi Jónassyni úr stjórninni með einstrengingslegum vinnubrögðum heldur á að taka Jón Bjarnason nú fyrir.

Samfylkingin vill koma í veg fyrir að andstæðingur ESB-aðildar stýri landbúnaðar- og sjávarútvegsmálum í aðildarferlinu, sem er reyndar dauðvona, enda styður þjóðin ekki ESB-brölt Samfylkingarinnar. Þar vilja þeir fá auðsveipan ESB-fulltrúa við borðið.

Nú reynir á Steingrím J. Kyngir hann öllu fyrir völdin eða er eitthvað bein í nefinu á honum? Eða er hann bara auðmjúkur farþegi í hringekju Jóhönnu og Samfylkingarinnar? Valdasjúkur eða með snefil af hugsjónum?

Aukafundur í ríkisstjórn

Hreiðar Már fer á Litla Hraun

Ég skynja mikinn létti í samfélaginu með handtökurnar og gæsluvarðhaldsúrskurðinn yfir Hreiðari og Magnúsi. Skilaboðin eru skýr. Tekið verður á þeim sem brugðust trausti og voru lykilmenn í bönkunum sem hverja aðra afbrotamenn. Enda eðlilegt.

Nú fara Hreiðar Már og Magnús á Litla Hraun. Þetta er ekkert smá fall, fyrir tæpum tveimur árum var Hreiðar hæst launaði maður landsins, vegna þess að hann bar svo mikla ábyrgð í störfum sínum.

Þetta eru mikil tíðindi og eflaust mörgum órótt sem tengjast bönkum fyrir hrun.

Kaupþingsmenn í gæsluvarðhald

Handtaka Hreiðars Más markar góð tímamót

Handtaka Hreiðars Más Sigurðssonar markar jákvæð og góð tímamót - þjóðin þurfti að fá það á tilfinninguna að eitthvað væri virkilega að gerast hjá saksóknaranum. Þetta er upphafið á uppgjörinu sem þarf að fara fram eftir bankahrunið - menn svari til saka fyrir afbrot sín og axli ábyrgð á röngum ákvörðunum og áhættunni miklu sem keyrði íslensku þjóðina nær til glötunar.

Hreiðar Már handtekinn

Litlir karlar

Þeir eru ósköp litlir karlar og aumir sem ráðast að fólki á sjötugsaldri og ber það sundur og saman, eins og gerðist í Reykjanesbæ. Þetta er aumingjaskapur af verstu sort. Það á að taka af hörku á slíkum aumingjum.

Heimili fólks er jú friðhelgur staður, griðastaður og skjól hvers einstaklings. Árás á fólk á heimilum sínum er grafalvarlegt mál og ber að fara með málið í samræmi við alvarleika brotsins.

Þeir sem standa að slíkri aðför að fólki og það sérstaklega eldri borgurum eiga sér engar málsbætur.

Um dæmda ofbeldismenn að ræða

Þulurnar kveðja

Vissulega eru það tímamót þegar þulurnar kveðja í Sjónvarpinu - verða sparnaði ríkisrisans að bráð. Sumir hafa talið það einn helsta aðal Ríkissjónvarpsins að hafa þulur á skjánum, fagrar konur til að kynna dagskrána, í stað þess að hafa bara dagskrárrödd eins og hinar stöðvarnar hafa. Jóhanna Vigdís Arnardóttir, leikkona, mun eflaust sinna sínu nýja hlutverki vel við að vera rödd Sjónvarpsins. Endalokin hjá þulunum er tákn um nýja tíma og aðrar áherslur - líka að það er verið að spara.

Þulurnar hafa fengið á sig ljómakenndan blæ í gegnum árin. Flestar þeirra hafa líka orðið landsþekktar í kjölfarið; nægir þar að nefna Sigríði Arnardóttur, Ásu Finnsdóttur, Ellý Ármanns, Ragnheiði Clausen, Guðmundu Jónsdóttur, Jóhönnu Vilhjálmsdóttur, Sigurlaugu Jónasdóttur, Evu Sólan og Rósu Guðnýju Þórsdóttur. Sennilega mun þó Rósa Ingólfsdóttir verða þeirra allra eftirminnilegust, þegar hún braut upp formfast hlutverkið: fékk sér t.d. kaffi í beinni.

Einkareknu stöðvarnar hafa farið aðrar leiðir og haft rödd, oftar en ekki karlmanns sem aðalrödd. Stöð 2 hefur í tæpa tvo áratugi haft söngvarann Björgvin Halldórsson sem rödd stöðvarinnar og hefur hann sett svip á dagskrána með kynningum sínum, beitt röddinni bæði milt og léttilega og ennfremur talað með draugalegum hætti sérstaklega þegar að kynntar eru spennu- eða draugamyndir. Ólafur Darri Ólafsson var rödd Skjás 1 þar til Valur Freyr Einarsson tók við.

Að mínu mati voru þulurnar tákn síns tíma, liðins tíma, þó vissulega hafi verið gaman að horfa á fallegar konur lesa dagskrána. Þetta var skemmtilega gamaldags og sjarmerandi upp að vissu marki. Þó er augljóst að tími þulanna á skjánum minnkaði mjög eftir því sem árin liðu. Þær vöktu ekki fram yfir miðnættið eftir dagskrárlokum um helgar og byrjuðu seinnipartinn á vakt, fylgdu ekki lengur dagskránni alla daga frá byrjun. Þær voru þó á vakt á stórhátíðisdögum.

Þulurnar lifðu af tímana tvenna. Þórhallur Gunnarsson stóð vörð um þær og réði síðustu þulurnar fyrir nokkrum árum og varði þá hlutverk þeirra með sérstöðunni, hlutverki þeirra frá upphafi. En nú kveðja þær. Hvernig væri nú að Sjónvarpið heiðraði þulur liðinna tíma og sýndi vel valdar klippur með þeim, svona í kveðjuskyni.

Þakka þjóðinni samfylgdina

Kjósendur í borginni dissa stóru flokkana

Könnunin á fylgi flokkanna í borginni er vægast sagt stórmerkileg. Kjósendur dissa stóru flokkana svo um munar. Skilaboðin geta varla verið skýrari - fólk vill nýtt pólitískt landslag og stokka hlutina upp. Þarna kemur fram þreyta fólks á stjórnmálum og óánægja með það hvernig unnið hefur verið, ekki aðeins í borgarmálum á kjörtímabilinu heldur og í landsmálum fyrir og eftir hrun.

Enn eru fjórar vikur í kosningar. Haldist þessi sveifla eru stórpólitísk tíðindi í augsýn sem munu setja mikið mark á pólitíska umræðu í landsmálunum. Enda verður svo stórt diss kjósenda með stóru flokkana eins og mælist þarna þá mælanleg í þingkosningum, sem verða væntanlega fljótlega, enda vinstristjórnin vægast sagt veikburða og forystulaus.

Besti flokkurinn fengi fjóra kjörna

Skuldahringekja Jóns Ásgeirs í boði ríkisins

Sukkleikur Jóns Ásgeirs Jóhannessonar heldur áfram eins og ekkert hafi í skorist, þrátt að maðurinn eigi ekkert nema skuldir og svamli í skuldafeni. Hvernig ætlar vinstristjórnin lánlausa að verja að Landsbanki Íslands, banki í eigu ríkisins, láni lánakóngi útrásarsukksins, persónulega tæplega hálfan milljarð með veði í yfirveðsettum eignum?

Er ekki komið nóg af þessu andskotans rugli?

Jón Ásgeir fékk 440 milljónir króna að láni

Öll styrkjamál á borðið - þingmenn axli ábyrgð

Mjög mikilvægt er að öll vafamál varðandi styrki til stjórnmálamanna verði opinberuð. Nóg er komið af hálfkveðnum vísum. Stjórnmálamenn sem hafa þegið óeðlilega háa styrki eiga að axla ábyrgð og segja af sér þingmennsku. Staða þeirra er óviðunandi. Þeir eiga að víkja, kjósenda sinna og flokksfélaga vegna.

Rannsóknarskýrslan tekur vel á þessum málum - auðvitað voru þessir styrkir mjög óeðlilegir og ekki viðunandi að þingmenn ríghaldi í stólana sem þegið hafa milljónir í styrki. Trúverðugleikinn er mjög veikur, svo ekki sé meira sagt.

Óþægilegt fyrir Samfylkinguna

Vanhugsuð ummæli Ólafs Ragnars

Ólafur Ragnar Grímsson hefði átt að hugsa sig aðeins betur um áður en hann fór í erlendu pressuna með dómsdagsspár vegna yfirvofandi Kötlugoss. Stundum má satt orð kjurrt liggja. Engum er greiði gerður, allra síst forseta þjóðarinnar, að koma fram með svona svartar spár.

Forsetinn hefur með ummælum sínum vegið ómaklega að ferðaþjónustunni í heild sinni. Í raun má velta fyrir sér hvort hann hafi yfir höfuð eitthvað hugsað málin áður en hann fór í viðtalið. Þetta er varla viðeigandi.

Eftir nýjustu bommertur Ólafs Ragnars, í kjölfar rannsóknarskýrslunnar, þar sem hann var kominn í blóðugan slag upp að öxlum við að verja dekrið við auðmennina hefði verið rétt að pása sig.

Gosið nú lítið annað en æfing

Landsfundi flýtt - tafarlaust uppgjör eftir skýrslu

Forysta Sjálfstæðisflokksins gerir rétt með því að flýta landsfundi um rúmlega ár. Þar verða spilin stokkuð upp með kosningu forystu flokksins og málefnavinnu. Þetta er tafarlaust uppgjör eftir skýrslu rannsóknarnefndar Alþingis. Sjálfstæðisflokkurinn verður með þessu fyrsti flokkurinn sem fer í slíkt uppgjör eftir skýrsluna, kallar flokksmenn saman og lætur þá taka afstöðu bæði til flokksstefnunnar og forystunnar.

Eftir afsögn Þorgerðar Katrínar Gunnarsdóttur er með öllu óeðlilegt að miðstjórnin kjósi eftirmann hennar á varaformannsstóli. Það vald á að vera í höndum landsfundarfulltrúa. Vonandi er að margir gefi kost á sér og landsfundarfulltrúar fái val um forystusætin. Á landsfundi Sjálfstæðisflokksins er kosningin eins opin og hugsast getur, landsfundarfulltrúinn fær autt blað í hendur og getur ritað þar hvaða nafn sem er. Valdið er hans.

Bjarni Benediktsson hefur beitt sér fyrir uppgjöri í Sjálfstæðisflokknum eftir skýrsluna. Með því að kalla saman landsfund stokkar hann upp spilin, lætur reyna á stöðu sína og eflir stöðu flokksins til muna. Enginn vafi er á því að landsfundur einn getur stokkað spilin umtalsvert upp og tekið málin í sínar hendur. Enginn getur sakað Bjarna um léleg vinnubrögð í þessum efnum. Hann kallar til landsfundar til að uppgjör fari fram.

Forysta Sjálfstæðisflokksins hefði vissulega getað haft landsfund á áður ákveðnum tíma, í september 2011. Miðstjórn hefði getað kosið varaformann. Slíkt gerðist árið 1973 þegar Geir Hallgrímsson, varaformaður, tók við formennsku eftir afsögn Jóhanns Hafsteins. Þá kaus miðstjórnin Magnús Jónsson frá Mel sem varaformann. Þegar hann hætti síðar var Gunnar Thoroddsen kosinn varaformaður á landsfundi.

Staðan nú er hinsvegar þannig að kalla þarf saman landsfund. Það verður flokksmanna að kjósa forystuna og taka afstöðu til mála. Uppgjör þarf að fara fram og hefur skipan viðbragðsnefndar við rannsóknarskýrslunni verið gott fyrsta skref í þeim efnum. Sjálfstæðismenn hafa með þessu stokkað sín spil upp og ætla að fara í markvissa vinnu til að taka á málum eftir rannsóknarskýrsluna.

Tafarlaust uppgjör er nauðsynlegt eigi Sjálfstæðisflokkurinn að styrkja stöðu sína enn frekar í aðdraganda þingkosninga, sem verða væntanlega fljótlega enda er pólitískt kapítal vinstristjórnarinnar lánlausu nær uppurið.

Boða til aukalandsfundar

Þorgerður Katrín segir af sér varaformennsku

Þorgerður Katrín Gunnarsdóttir gerir rétt með því að segja af sér varaformennsku Sjálfstæðisflokksins - taka hagsmuni Sjálfstæðisflokksins og umbjóðenda hennar fram yfir sína eigin. Hún á heiður skilið fyrir það að höggva með því á neikvæða umræðu um mál hennar.

Staða Þorgerðar Katrínar Gunnarsdóttur hefur verið mjög veik frá efnahagshruninu, allt að því vonlaus. Betur hefði farið á því ef Þorgerður hefði vikið með Geir H. Haarde á landsfundinum í mars 2009. Þá þegar þurfti algjörlega nýja forystu í Sjálfstæðisflokknum.

Eitt er mikilvægt fyrir Sjálfstæðisflokkinn nú... flýta þarf landsfundi, gera upp málin og horfa til framtíðar.

Ákvörðun Þorgerðar Katrínar er mikilvægur liður í því að gera upp við liðna tíð.

Þorgerður stígur til hliðar

Mun Þorgerður Katrín segja af sér í Reykjanesbæ?

Mikil spenna er innan Sjálfstæðisflokksins um hvort Þorgerður Katrín Gunnarsdóttir muni segja af sér varaformennsku og þingmennsku á flokksráðsfundinum í Reykjanesbæ í dag. Ég finn mjög vel eftir að rannsóknarskýrslan kom að flokksmenn vilja uppgjör, hreinsa til og taka á málum sem allra fyrst.

Öllum er ljóst að Sjálfstæðisflokkurinn mun ekki halda trúverðugleika sínum meðan varaformaðurinn situr og nauðsynlegt að uppstokkun verði. Því má búast við líflegum fundi þar sem talað verður hreint út.

Ef forysta flokksins nær ekki að klára sín mál með viðunandi hætti í dag þarf að skipta henni út algjörlega.

Vilja að varaformaðurinn víki

Rétt ákvörðun Illuga - Þorgerður á að segja af sér

Illugi Gunnarsson tekur rétta ákvörðun með því að víkja af þingi. Nú er mikilvægt að Þorgerður Katrín Gunnarsdóttir, varaformaður Sjálfstæðisflokksins, segi af sér og stígi til hliðar, fyrst og fremst til að styrkja stöðu Sjálfstæðisflokksins. Það er algjörlega óviðunandi fyrir sjálfstæðisfólk um allt land að sætta sig við að hún sé í forystusveit flokksins eftir fjölmiðlaumfjöllun um stöðu þeirra hjóna.

Flokksráðsfundur Sjálfstæðisflokksins í Reykjanesbæ á morgun verður eflaust mjög líflegur og þar verður örugglega talað tæpitungulaust þekki ég rétt sjálfstæðisfólk um land allt sem mætir þar til fundar. Þarna er fólk sem hefur unnið fyrir flokkinn árum saman og sættir sig einfaldlega ekki lengur við að vera með í forystusveit flokksins fólk sem hefur í raun enga pólitíska stöðu til þess.

Eigi Sjálfstæðisflokkurinn að geta styrkt stöðu sína þarf að stokka upp spilin þar. Flokksráðsfundurinn er kjörin tímasetning til að vinna að þeim breytingum sem þurfa að verða.

Illugi fer í leyfi frá þingstörfum