Samstaða á örlagastundu

Mjög mikilvægt er fyrir Sjálfstæðisflokkinn að trúnaðarmenn innan hans hafi komið saman í dag og farið yfir erfiðustu viku í sögu þjóðarinnar í lýðveldissögunni. Mikill einhugur er innan flokksins með forystu hans, sem hefur staðið sig vel í erfiðum verkefnum þessa síðustu daga sem markar væntanlega hið nýja Ísland. Þetta eru erfiðir tímar og mikilvægt að samstaða sé á milli flokkanna um aðgerðir. Þetta er ekki tími fyrir pólitískt hnútukast, nú þegar barist er fyrir heill og hag þjóðarinnar allrar.

Geir H. Haarde, formaður Sjálfstæðisflokksins, hefur staðið sig vel í kastljósi fjölmiðla, innlendra sem erlendra hér í þessari viku. Ræða hans í Valhöll í morgun var mjög góð samantekt á stöðu þjóðarinnar og mikilvægustu áherslum í ljósi hennar. Nú reynir á Sjálfstæðisflokkinn á krossgötum þjóðarinnar þegar útrásinni og góðærinu er lokið með svo skelfilegum hætti. Sem stærsti flokkur landsins leitar fólk til hans um forystu á þessum vandasömu tímum rétt eins og áður þegar allt lék í lyndi.

Á þeim árum þegar ég var virkur í innra starfi Sjálfstæðisflokksins sá ég vel hversu mikilvægur Kjartan Gunnarsson var Sjálfstæðisflokknum. Hann stýrði skrifstofu flokksins mjög vel og hélt utan um mikilvægustu þræðina í formannstíð fjögurra forystumanna flokksins í vel á þriðja áratug. Kjartan er mikils metinn innan flokksins og orð hans skipta miklu máli fyrir okkur öll. Hann hefur orðið fyrir þungu áfalli persónulega vegna falls Landsbankans og ekkert óeðlilegt að hann tali um stöðuna.

Ég sé að gefið er í skyn að Kjartan Gunnarsson hafi ráðist að einhverjum í ræðu sinni og gefið er í skyn vinslit hans við Davíð Oddsson. Því hefur hann neitað opinberlega eftir dramatískan fréttaflutning. Sterk staða Kjartans varð ljós á þessum fundi, rétt eins og síðasta landsfundi þegar hann hlaut yfirburðarkosningu í miðstjórn Sjálfstæðisflokksins.

Tár felld á flokksráðsfundi

Samningar og eftirmálar IceSave-málsins

Samningurinn við Hollendinga ber vitni vel heppnuðum diplómatískum viðræðum þar sem sest er niður að borðinu til að semja, sem er eitthvað annað en segja má um Bretana. En vonandi tekst að lægja öldur og reyna að koma málum svo fyrir að samstaða náist um næstu skref. Þetta er viðkvæmt mál en einhliða fjölmiðlayfirlýsingar bæta ekki úr skák. Því er gott hversu vel hefur tekist til í málum með hollensku stjórnina og ber vitni einlægum vilja þeirra til samninga.

Annars er þetta IceSave-mál allt með því dapurlegasta sem fyrir finnst. Þessi mynd sem Egill Helgason birti í dag kemur eflaust illu blóði í marga Íslendinga, sem þurfa nú að standa undir þessu ævintýralega rugli á alþjóðavísu hjá útrásarliðinu.

Samkomulag náðist við Holland

Bush beinir samstöðuorðunum til Browns

Vel mátti sjá hvert George W. Bush, forseti Bandaríkjanna, beindi orðum sínum um samstöðu í erfiðri stöðu í efnahagskreppunni sem skekur heiminn. Þar talaði hann til breska forsætisráðherrans og undirsáta hans sem réðust harkalega að Íslandi til að upphefja sjálfa sig. Gott innlegg í umræðuna. Auðvitað verða allir að standa saman við þessar aðstæður, en finna ekki tækifæri bara til að upphefja sig eins og Brown gerði.

Bush hvetur til samstöðu

Slíta á stjórnmálasambandi við Bretland

Loksins hefur Geir H. Haarde, forsætisráðherra, talað hreint út um níðingslega framkomu breska forsætis- og fjármálaráðherrans í garð Íslands. Í þessum efnum á ekki að vera neitt svar í diplómasíu heldur á að grípa til sömu vinnubragða og fordæma hina auvirðilegu forystumenn breskra stjórnmála sem ætluðu að bjarga sér með því að kynda undir bál gegn Íslandi. Ég er að verða nokkuð harðákveðinn í þeirri afstöðu að við eigum að slíta stjórnmálasambandi við Bretland. Eigum ekki að sætta okkur við þetta.

Ég finn að það er mikil reiðialda að magnast upp í samfélaginu gegn hinum lágkúrulega durti Gordon Brown og undirsátum hans sem ætluðu að færa hinum fylgislitla Verkamannaflokki færið á fjórða kjörtímabilinu með því að slátra Íslandi á alþjóðavettvangi. Ómerkilegt pakk í alla staði og við eigum að fara lengra með þetta mál. Þetta er ekki mál sem við eigum að taka á af diplómasíu heldur eigum við að grípa til aðgerða.

Bretar knésettu stærsta fyrirtæki Íslendinga með valdníðslu

Fínn þáttur hjá Birni Inga - Egill fær samkeppni

Ég má til með að hrósa Birni Inga Hrafnssyni fyrir nýjan spjallþátt sinn á laugardagsmorgnum. Horfði á þáttinn af miklum áhuga og fannst margt þar bæði mjög áhugavert og gott. Viðtal Björns Inga við yfirmann sinn, Þorstein Pálsson, ritstjóra Fréttablaðsins og fyrrum forsætisráðherra, var tvímælalaust hápunktur þáttarins, en þar talaði Þorsteinn í Evrópuátt um stöðuna og sendi margar pillur í Seðlabankann, til mannsins sem felldi hann af formannsstól Sjálfstæðisflokksins.

Egill Helgason hefur til þessa ekki fengið verðuga samkeppni í spjallþáttum hérlendis, nema mögulega síðasta árið með þátt Sigmundar Ernis, Mannamáli. Þessi þáttur er mjög vandaður og vel gerður og er sannarlega upp að hlið Silfursins ef haldið verður áfram með svipuðum brag og var í morgun. Við sjónvarpsáhorfendur hljótum að fagna því að fá fleiri trausta spjallþætti um pólitík og viðskipti.

Mér finnst það reyndar skondið að þátturinn byrji í dag. Ár er í dag liðið frá því að Björn Ingi sleit meirihluta Sjálfstæðisflokks og Framsóknarflokks og var örlagavaldur í borgarmálunum. Sá meirihluti sprakk því ekki var full samstaða um að rétta útrásarvíkingunum beinan aðgang í orkuauðlindir þjóðarinnar.

En það er önnur saga....

Minningarnar um þorskastríðið rifjast upp

Hafi einhver Íslendingur ekki munað eftir þorskastríðunum eða kannski gleymt þeim rifjast þau upp þessa kuldalegu haustdaga í nýrri milliríkjadeilu við Bretland. Á örfáum dögum hefur allt hið góða sem gert var í samskiptum þjóðanna í rúma þrjá áratugi gufað upp og kuldaleg milliríkjadeila blossað upp aftur. Nú er ekki barist um veiðar á þorski heldur yfirráð yfir peningum. Sumir kalla þetta þorskhausastríð, til að finna einhvern fyndinn punkt á þessu, en ég tel að þetta sé spurning um hvort Íslendingar láta valta yfir sig.

Þeir gerðu það ekki í gamla daga og eiga ekki að gera það aftur. Ég hef heyrt margar sögur um þorskastríðin. Ef við hefðum lympast niður og gefið eftir hefðum við ekki náð yfirráðum yfir fiskimiðum okkar og tryggt stöðu okkar. Við börðumst, tókum slaginn við stórt ríki sem ætlaði að níðast á okkur og taka okkur á hörkunni. Þar var ekki hugsað að neinu leyti um okkar lífsafkomu. En við börðumst áfram og unnum sigur á hörkunni. Gáfum ekki þumlung eftir og við áttum öfluga menn til að leiða okkur til sigurs.

Ekki eru mörg ár síðan ég sá þáttaröð um þorskastríðin. Þar kynntist ég þessum tíma enn betur, en bara úr sögubókunum. Þar var rætt við Breta sem enn formæltu okkur og vildu okkur allt hið illa en grétu samt um leið eigin örlög, að hafa gefið eftir fyrir okkur á örlagastundu. Þetta nísti enn að hjartastað hjá þeim. Ekki virðist kuldinn hafa minnkað og enn er Ísland hatað í Bretlandi vegna baráttunnar um þorskinn. En kannski er erfitt að gleyma þessari baráttu. Hún á ekki að vera það fjarlæg.

Nú þegar bresk stjórnvöld hafa knésett Kaupþing og beitt hryðjuverkalögum á okkur er eðlilegt að minningarnar um þorskastríðin rifjist upp. Við skuldum Bretlandi ekki neitt og eigum að taka þessa baráttu alla leið, rétt eins og forðum daga þegar barist var um þorskinn. 

Íslendingar þrjóskir og ósveigjanlegir

Skelfileg staða íslenskra námsmanna erlendis

Ég hef fengið nokkra tölvupósta frá íslenskum námsmönnum erlendis þar sem farið er yfir stöðuna hjá þeim. Hún er vægast sagt ófögur og útlitið fjarri því bjart. Auk þess hef ég heyrt frá ættingjum sem eru erlendis. Þetta eru ekki ánægjulegar sögur og leitt til þess að hugsa hvernig komið er. Sérstaklega vorkenni ég sárlega ungu íslensku fólki sem hefur lagt mikið á sig að fara erlendis í nám og lenda svo í slíku; hafa varla efni á mat og vera í algjörri örvæntingu um næstu skref.

Get ekki betur séð en við Íslendingar verðum að brjóta odd af oflæti okkar og leita eftir aðstoð í þessari erfiðu stöðu, þó væntanlega verði það erfið skref fyrir einhverja. Væntanlega mun það fara svo að Alþjóða gjaldeyrissjóðurinn leggur okkur lið og hjálpar íslensku þjóðinni í gegnum erfiðasta hjallann. Mig minnir að við höfum ekki leitað til hans í ein 25 ár og höfum verið skuldlausir við hann síðan árið 1987.

Svo verður að ráðast hvort Rússar leggja okkur lið, eins og útlit hefur verið fyrir í þessari viku. Í viðræðunum í Moskvu mun væntanlega koma fram hvort og þá hvaða skilyrði Rússar setji fyrir að veita okkur lán. Þegar er farið að tala um að Rússar ætli sér að kaupa velvild við Atlantshafið. Vel má vera. Kannski fer það svo að Bretum og Bandaríkjamönnum muni svíða framkoman við okkur þó síðar verði.

Rússar og IMF sameinist um lán

Grípum til aðgerða gegn bresku ríkisstjórninni

Ég get ómögulega skilið aðgerðir Gordons Browns, forsætisráðherra Bretlands, öðruvísi en hann vilji gera út af við íslensku þjóðina til að upphefja sjálfan sig. Þetta er auvirðilegur stjórnmálamaður og pólitískur hræsnari sem vonandi verður sparkað mjög fljótlega úr öllum pólitískum ábyrgðarstöðum, helst af eigin flokksmönnum. Held að hann eigi ekki annað skilið eftir framkomuna sem hann hefur sýnt Íslendingum í þessari viku. Þetta eru sorgleg endalok á traustri samvinnu þjóðanna eftir að samningar tókust í lok þorskastríðsins.

Ég er sammála Guðna Ágústssyni að nú sé kominn tími til að fara í aðgerðir gegn bresku ríkisstjórninni. Tek undir hvert orð Guðna og finnst gott að loksins tali einhver íslenskur stjórnmálamaður mannamál í því hvað eigi að gera. Þetta er ólíðandi framkoma og engin evrópsk ríkisstjórn myndi sætta sig við svona vinnubrögð af hálfu vinaþjóðar og samstarfsaðila í alþjóðasamstarfinu.

Stefna á bresku ríkisstjórninni ekki síðar en strax til skaðabóta af íslenska ríkinu. Gordon Brown er að gera alvarlega tilraun til að eyðileggja mannorð okkar í heiminum og talar af miklu gáleysi um stöðu okkar og gerir hana verri til að upphefja sjálfan sig. Auk þess eigum við að leita til alþjóðlegra samtaka vegna framferðis Bretanna.

Svo er það í stöðunni að slíta stjórnmálasamstarfi við Bretland, líkt og gert var í þorskastríðinu. Ég tel að það eigi hiklaust að gera haldi árásir breska forsætisráðherrans áfram og hann haldi áfram að sýna heimsku sína.

„Sparkað í liggjandi (Ís)land"

Konurnar taka til í bönkunum í kreppunni

Mér finnst það mjög merkileg staðreynd að konur taki við bankastjórastöðunum nú í krepputíðinni - sé falið það verkefni að taka til þegar þess er þörf. Í góðærinu fengu konur ekki tækifæri til að leiða bankana en nú er greinilega komið að þeim. Held að það sé góðs viti. Nú þarf virkilega að taka til hendinni, horfa fram á veginn og breyta um kúrs. Líst mjög vel á að öflugar konur fái nú að sýna hvað í þeim býr.

Eflaust munu einhverjir tala um kvennabyltingu nú þegar Elín Sigfúsdóttir er orðin bankastjóri Landsbankans og þegar Birna Einarsdóttir tekur við sem forstjóri Glitnis. Ég hef fulla trú á því að þær komi sem ferskur vindblær í forystu bankanna og taki til þegar þess er helst þörf. Ég hef fulla trú á þessum kjarnakonum og líst vel á að fá þær yfir bankana.

Annars fannst mér sérstaklega áhugavert að horfa á þrjár konur í hagfræðingastétt tala um efnahagsmálin í Íslandi í dag á Stöð 2 í gærkvöldi. Þar kom svolítið ný nálgun á stöðuna - leist vel á þetta viðtal. Nú eiga stelpurnar næsta leik. Held að það sé góðs viti.

Birna verður væntanlega bankastjóri Glitnis

Kaflaskil hjá þjóðinni

Þetta hefur verið ótrúleg vika. Enn er maður að vonast eftir að vakna upp við að þetta sé bara martröð, skelfileg upplifun sem sé einn stór misskilningur eins og Georg Bjarnfreðarson segir svo oft í krísunum sínum. En við verðum að rífa okkur upp og ná að koma undir okkur fótunum aftur. Íslendingar hafa alltaf barist áfram og komist í gegnum erfiða tíma og ég er viss um að okkur tekst það núna.

Lífsstíll þjóðarinnar breytist í þessu árferði. Því þarf varla að koma að óvörum að kortafyrirtækin taki upp ný vinnubrögð og breyti úttektarheimildum hjá sér. Ég heyrði reyndar að fyrsta hræðslan á mánudag þegar stefndi í að bjarga þyrfti bönkunum var hvort hægt yrði að nota kortin daginn eftir. Þetta hefur gengið allt ótrúlega vel fyrir sig þrátt fyrir miklar breytingar.

Auðvitað eru erfiðir mánuðir framundan, aðstæður breytast og fjöldi fólks tekur þungan skell. Vorkenni mest þeim sem missa vinnuna sína og hafa misst sparifé, þurfa að byrja upp á nýtt og fóta sig aftur. Ég vona að við náum öll að halda áfram og komast í gegnum þetta.

Úttektarheimildir endurskoðaðar

Samskipti Íslands og Bretlands að hruni komin

Lágkúruleg framganga Gordons Browns, forsætisráðherra Bretlands, gjörbreytir samskiptum Íslands og Bretlands. Ekki verður hægt að treysta á traust samskipti við Bretland meðan hann er í Downingstræti 10 og vonandi fer að líða að lokum á þeim valdaferli. Ég tek undir með skrifum Bronwen Maddox að breskum yfirvöldum hefur orðið stórlega á. Ég get ekki betur séð en Kaupþing, og helst íslensk stjórnvöld, eigi að stefna breskum stjórnvöldum vegna aðfarar þeirra að rekstrinum.

Ég varð var við að sumir voru hissa á skrifum mínum í gær og töldu mig tala of harkalega. Ég sé að sú gagnrýni er horfin, enda held ég að þeir hafi verið frekar barnalegir og ekki skilið diplómatísk tengsl landanna. Þegar þjóð á borð við Bretland tekur á Íslandi með hryðjuverkalögum er alvarleg staða komin upp og varla hægt að líta framvegis á þá þjóð sem trausta bandalagsþjóð. Samskiptin eru gjörbreytt og ég held að enginn neiti því lengur að breskum stjórnvöldum varð á.

Varla verður það stíll Íslendinga að sætta sig við svona framkomu, alveg sama þó þjóðin sé Bretland og hafi mikil áhrif í alþjóðasamfélaginu. Bein aðför breskra stjórnvalda gegn íslenskum hagsmunum og starfsemi þar var aðför að íslensku þjóðinni og við pössum okkur á því meðan Verkamannaflokkurinn ræður ríkjum í landinu að hafa sem minnst saman við þá valdhafa að sælda.

Mestu mistökin

Össur kallar breska sendiherrann á teppið

Ég er ekki hissa á því að Össur Skarphéðinsson, starfandi utanríkisráðherra og æðstráðandi í Samfylkingunni í veikindaforföllum Ingibjargar Sólrúnar, hafi boðað breska sendiherrann í utanríkisráðuneytið eftir ummæli Gordons Browns síðdegis. Þessi ummæli eru algjör stríðsyfirlýsing við íslensku þjóðina og ekki hægt að sjá annað en milliríkjadeila sé hafin milli landanna, nema þá takist að settla málið mjög fljótlega.

Engu er líkara en Gordon Brown hafi ekki verið í neinu sambandi við elskuna sína, Alistair Darling, en sá síðarnefndi er í Washington. Ég tek undir það að hafi Brown vitað af samtali Darlings við Geir í dag, sem hann hefur greint frá, er þetta alveg rosaleg framvinda mála og ekkert nema algjör stríðsyfirlýsing. Auðvitað er Brown líka að upphefja sig á stöðunni - þetta bægir frá miklum pólitískum vanda hans og hann lítur út eins og hetja einhverra.

En íslensk stjórnvöld hljóta að hugsa sitt þegar svona stríðsyfirlýsing kemur frá þjóð sem við höfum talið til vina, þó vissulega hafi samband þjóðanna tekið miklar sveiflur og gengið hafi á ýmsu í sögulegu samhengi.

Sendiherra kallaður á fund

Brown fer yfir strikið - stjórnmálasambandi slitið?

Ég er eiginlega orðlaus eftir að horfa á Gordon Brown, forsætisráðherra Bretlands, ráðast að íslensku þjóðinni með skít og skömm á Sky fyrir stundu. Hann gefur ekkert eftir og talar um okkur eins og sína svörnustu fjandmenn. Sú spurning hlýtur að fara að gerast áleitin hvort við eigum að slíta stjórnmálasambandi við Bretland. Mér finnst þeir dagar í það minnsta liðnir að við lítum á Bretland sem vinaþjóð okkar.

Þetta er sorglegt, mjög sorglegt, enda hafði tekist að byggja samskipti landanna upp eftir hin harðvítugu þorskastríð. Þá var stjórnmálasambandi við Breta slitið af okkar hálfu en með diplómatískum viðræðum tókst að laga tengslin og leysa þessa alvarlegu milliríkjadeilu okkar á milli.

Yfirlýsingar Browns eru sérstaklega dapurlegar eftir að íslenski fjármála- og forsætisráðherrann hafa talað vinalega til hans og Darlings og komið málinu af stórsprengjusvæðinu. En kratarnir bresku gefa ekkert eftir.

Samskipti Bretlands og Íslands eru á ís og kannski verður erfitt að bæta fyrir þennan skaða. Sú spurning verður áleitin hvort hinir lélegu stjórnmálamenn Brown og Darling (sem eru rúnir traustir) séu að slá sér upp á þessu.

Brown: Viðhorf íslenskra stjórnvalda óviðunandi

Transcript á samtal Árna og Darling strax, takk!

Ég tel mikilvægt að samtal Árna og Alistair Darling verði gert opinbert, í það minnsta í transcript-formi. Öll viljum við örugglega fá það rétta fram. Mér finnst samt margir hafa viljað hengja bakara fyrir smið í þessu máli áður en allar staðreyndir liggja fyrir. Þeir hinir sömu eru ekki miklir bógar sýnist mér - að dæma áður en nokkuð er vitað um megin staðreyndir málsins.

„Sagði honum að við stæðum við yfirlýsingar“

Hvað sögðu Árni og Darling við hvorn annan?

Mér finnst mikilvægt að farið verði ofan í saumana á því hvað í samtali Árna M. Mathiesen, fjármálaráðherra, við Alistair Darling hafi orðið til þess að komið var fram við íslensku þjóðina eins og hryðjuverkamenn og úrþvætti heimsins. Nú er ljóst að yfirlýsingar Árna urðu undanfari þess sem varð en ekki viðtalið við Davíð Oddsson, seðlabankastjóra, eins og sumir snillingarnir hafa reynt að telja öllum trú um í dag. Fara þarf yfir þetta mál og gefa upp hvað ráðherrarnir sögðu við hvorn annan.

Mér finnst viðbrögð bresku ríkisstjórnarinnar fram úr öllu hófi. Ég veit að Íslendingar hafa ekki alltaf verið vel þokkaðir í Bretlandi. Ekki eru nema þrír áratugir síðan við áttum í harðri milliríkjadeilu við þá og það oftar en einu sinni. En þessi framkoma er Bretum ekki sæmandi. Ég veit að breska stjórnin er rúin trausti með fylgislítinn Brown fremst í flokki en það vantar svörin við því hver ástæðan sé í raun.

Ég hugleiði hvort Brown og kratarnir hafi viljað slá pólitískar keilur á þessu. Taka hart á Íslendingunum og upphefja sjálfan sig í leiðinni. Í öllu falli þarf að upplýsa betur um samtalið. Allir Íslendingar hljóta að krefjast þess að rétt sé rétt í þeim efnum.

Samtal við Árna réð úrslitum

Nýi Landsbankinn rís upp á gömlum grunni

Ég fagna því að Landsbankinn er að rísa upp að nýju undir nýjum merkjum. Vonandi mun ganga vel að fóta sig áfram eftir áföllin að undanförnu. Vil óska Elínu Sigfúsdóttur til hamingju með að verða bankastjóri Landsbankans. Auðvitað hefði maður viljað að þau tímamót að fyrsta konan yrði bankastjóri yrði við gleðilegri aðstæður en þessar, en engu að síður eru það söguleg þáttaskil sem einhver ögn af gleði ætti að vera við.

Ég finn vel að Elín nýtur trausts, ekki aðeins þeirra sem taka nú við bankanum heldur og líka fólksins innanhúss. Slíkt skiptir lykilmáli nú. Svo er bara að vona að bjartir tímar blasi við bankanum í öllu svartnættinu.

Nýi Landsbanki tekur við

Fjármálaeftirlitið yfirtekur Kaupþing

Yfirtakan á Kaupþingi eru nöpur þáttaskil í íslensku efnahagslífi. Á innan við þrem sólarhringum fara allir þrír bankarnir, þar af gömlu ríkisbankarnir tveir sem voru einkavæddir árið 2002, undir vald Fjármálaeftirlitsins. Þegar neyðarlögin voru sett á mánudagskvöld vonaði öll þjóðin að hægt yrði af afstýra því, sem þá var yfirvofandi, að bankarnir yrðu allir yfirteknir. En þetta hefur farið svona.

Eins og ég sagði í gærkvöldi er þessi sorglega atburðarás söguleg fyrir landsmenn alla og vonandi mikil lexía fyrir þá sem hafa farið um heiminn í útrásinni. Þetta eru svartir dagar fyrir þjóðina alla. Fjöldi fólks hefur tapað miklum peningum og er fært jafnvel áratugi aftur í einu vetfangi er sparnaður til fjölda ára fuðrar upp. Ég vorkenni mjög því fólki sem tók áhættuna og féll fyrir fagurgalanum í bönkunum.

Öll munum við heyra sorglegar hversdagslegar sögur af skipbroti almennings vegna þessara sorglegu þáttaskila sem fylgja endalokum útrásarinnar. Þetta eru nöpur endalok en vonandi verður hægt að byggja á þeim rústum sem fylgja uppstokkun þessara kuldalegu haustdaga í sögu þjóðarinnar.

FME yfirtekur Kaupþing

Er Fjármálaeftirlitið að taka yfir Kaupþing?

Ekki verður annað séð af fréttum síðustu klukkutíma en Kaupþing sé að fara sömu leið og Landsbankinn og Glitnir - hann verði yfirtekinn af Fjármálaeftirlitinu innan nokkurra klukkutíma hafi það ekki þegar verið gert. Fundahöldin í Fjármálaeftirlitinu sem nú eru orðin opinber boða fátt gott fyrir Kaupþing, svo mikið er alveg víst.

Eiginlega er óraunverulegt að verða vitni að þessari atburðarás - að allir bankarnir séu fallnir í valinn í þeirri mynd sem við höfum þekkt þá. Mikil verður uppstokkunin nú. Breyttir tímar eru sannarlega framundan.

Erfitt er að sjá hverjir standa og falla þá uppstokkun af sér. Óvissan er algjör og örlög gulldrengja útrásarinnar nöpur og sorgleg. Þessi endalok útrásarinnar verða vonandi lexía fyrir alla sem fylgjast með.

Hryðjuverkalög gegn Landsbanka

Óvissa í loftinu - skilaboð ráðherranna

Blaðamannafundurinn með forsætisráðherranum í dag lægði öldur í samskiptum Bretlands og Íslands. Samt er mörgum spurningum ósvarað og staðan er mjög erfið. Enda sýnist mér að fullkomin óvissa sé með erlend lán og ekkert fast í hendi þar um. Auðvitað er slíkt aldrei gott, en þetta búum við Íslendingar við nú um stundir.

Mér finnst samt bjartara yfir en var í upphafi vikunnar. Krónan er farin að styrkjast til muna. Eins og Gylfi Magnússon bendir á er mjög líklegt að hún muni halda áfram að styrkjast nú þegar þrýstingur á hana minnkar. En við erum fjarri því komin út úr þessum ólgusjó. Þetta verður ekki leyst á örfáum dögum.

En vonandi fæst traust erlent lán til að koma hlutum hér á fulla ferð áfram. Verkefnið er það eitt nú og mikilvægast nú. Og auðvitað þarf að fara að lækka stýrivextina. Vonandi gerist það þegar á morgun.

Geir og Björgvin eiga að halda þessu formi og hafa blaðamannafund daglega þar til eitthvað ræðst meira. Þó ekki séu svör við öllum spurningum þarf að tala til þjóðarinnar af ábyrgð og festu þó við erfiðar aðstæður.

Viðskipti milli landa verða tryggð

Fjöldi fólks mótmælir með Bubba í kreppunni

Enn einu sinni styður þjóðin Bubba Morthens í baráttuóð sínum. Hann virðist eiga auðvelt með að ná til hennar, hvort sem það er góðæri eða hallæri. Hann sagði um daginn að það hlyti einhver að lögsækja Hannes Smárason og þá sem stýrðu FL Group með honum. Spekingarnir ráðlögðu víst Bubba að fjárfesta í Exista, Eimskip og FL. Ekki góð ávöxtun þar. Hægt er því að skilja að Bubbi sé argur og ósáttur við sinn hlut.

En það eru svo margir aðrir. Bubbi er bara einn fjöldamargra sem hafa farið flatt á verðbréfaviðskiptum og standa mjög illa núna. Hann sameinar þennan hóp og frontar óánægjuna í dag. Vel gert hjá honum.

Hvernig er það annars, gerir ekki Bubbi lag um útrásarvíkingana og endalok þeirra?

Fjöldi fólks á mótmælasamkomu Bubba