Fréttnæmur hárvöxtur fréttamanna

Hló vænt þegar að ég sá hversu fréttnæmt það þykir að fréttamaðurinn Haukur Hólm sé með veglega hliðarbarta. Tók reyndar fyrst eftir þessu þegar að Hólmararnir; Haukur, Svansí og Sturla voru öll saman við Rauðavatn um daginn að tala um flipp bílstjóranna. Merkilegt hvað hárvöxtur fréttamanna verður fljótt frétt.

Við sjáum þetta fólk svosem á hverjum degi, en common, hví er þetta frétt? Mér skilst að allar konur yfir fertugu hafi fengið flogakast þegar að Bogi Ágústsson skipti um hárgreiðslu og síminn í Efstaleitinu hafi rauðglóað þegar að kvenkyns aðdáendur hins gráhærða akkeris hringdu unnvörpum til að reyna að koma vitinu fyrir kallgreyið og fá hann til að vera með gömlu greiðsluna áfram.

Fréttakyntröllið Logi Bergmann stuðaði allar konur með virka sjón, held ég, þegar að hann fór að safna skeggi og þær tóku varla gleði sína á ný fyrr en hann hafði rakað sig. Þeir Bogi og Logi voru fljótir að fá viðbrögð á það hvernig þeir ættu að hafa andlitið á sér þegar að þeir breyttu út af venjunni.

Svo var fyndið hvernig allt stuðaðist til þegar að Sigmundur Ernir hafði smáskegg hérna í denn. Eitthvað lengra síðan en það endaði með því að kappinn rakaði sig fyrir húsfreyjur þessa lands, sérstaklega þær hérna fyrir norðan held ég.

Hár er fljótt að verða frétt í fréttamennskunni greinilega.

Hárvöxtur Hauks Holm eykst

Eru heimilistækin okkar stórhættuleg?

Hlýtur að hafa verið óskemmtileg lífsreynsla að vakna upp við það að ísskápurinn springi. Ekki hægt annað en velta því fyrir sé hvað það séu eiginlega miklar líkur á að svona geti almennt gerst og fróðlegt að vita hvað kom eiginlega fyrir.

Þetta leiðir hugann að því hvort að heimilistækin okkar séu í raun öll stórhættuleg að einhverju leyti. Lengi hefur verið varað við að eldhætta sé af sjónvörpunum og þau geti verið stórhættuleg, sérstaklega gömlu týpurnar auðvitað.

Talandi um ísskápa. Er eiginlega stórhissa að gamli ísskápurinn sem ég átti um árabil hafi ekki sprungið, fyrst þessi gerði það. Hann var kominn mjög til ára sinna, gaf frá sér leiðinleg hljóð undir lokin og var farinn að frysta sig, myndaðist ísklumpur reglulega.

Þvílík hljóð og hann var svo gjörsamlega búinn með sínu bestu daga undir lokin. Fór sæll með hann á haugana og sá ekki mikið eftir honum. Datt hann þó strax í hug, einhverra hluta vegna, þegar að ég las þessa frétt.

Kannski eru heimilistækin okkar stórhættuleg að einhverju leyti, má vera. En lífið án þeirra væri frekar leiðinlegt.

Ísskápurinn sprakk í tætlur

Kveikt í fjölbýlishúsi - þvílík mannvonska

Enn einu sinni hefur eldur nú verið kveiktur af mannavöldum í fjölbýlishúsi í Reykjavík. Held að þetta sé í fimmta eða sjötta skipti sem það gerist á innan við ári. Dapurlegra er en orð fá lýst að kveikt sé í heimili fólks - eiginlega ótrúleg mannvonska sem í því felst. Heimili fólks er þeirra helgasti staður og skelfilegt sé eldur kveiktur til að vinna því skaða.

Á stundum sem þessum er hreinlega spurt hvað sé að gerast í samfélaginu, þegar að eldur er kveiktur í húsi og greinilega gert hreint tilræði við fólk sem býr þar.

Eldur lagður að íbúðarhúsi

Voru umdeildar aðgerðir lögreglunnar réttar?

Deilt hefur verið um hlut lögreglunnar í mótmælunum við Rauðavatn á miðvikudag. Er sammála Láru Ómarsdóttur, fyrrum fréttamanni Stöðvar 2, í Kastljósviðtali í kvöld að lögreglan hafi ekki átt annarra kosta völ en taka á stöðu mála af ábyrgð og festu á miðvikudag. Mótmælin voru komin út í vitleysu. Ekkert benti til að bílstjórar ætluðu að færa bílana - engin stjórn var á því sem gerðist þar og flest sem benti til að ráðast ætti að lögreglumönnum.

Held að enginn sé hlynntur því að gas sé notað á fólk í mótmælum. En lögreglan þarf að beita valdi til að verjast ágangi þeirra sem veitast að henni. Sem betur fer eru ekki mörg dæmi um það í seinni tíð. Þarna var ástandið við suðumörk og flest sem benti til að stjórnleysið í hópnum væri orðið það mikið að taka yrði af skarið. Pétur Tyrfingsson ritaði ágætis grein á vef sinn um það hvernig öflugur leiðtogi hefði leitt sinn hóp í mótmælum en það hafi ekki gerst við Rauðavatn, þar sem enginn alvöru leiðtogi hefði frontað.

Mæli með þessari grein. Hann þekkir mjög vel mótmælasnilld og hvernig á að berjast frá verkalýðsdögunum og ég tel að hann hafi rétt fyrir sér hvar þetta varð að þeim skrípaleik sem blasti við þegar að leið á miðvikudaginn og unglingar í skemmtanaleit voru farnir að henda eggjum á lögreglumenn, bara vegna þess að það væri svo gaman en ekki vegna þess að þeir væru að verja af hugsjónaeldi málstað bílstjóranna. Lögreglunni ber að hafa stjórn á aðstæðum og ég tel að hún hafi orðið að grípa inn í.

Ekki ætla ég að segja hvort hún gekk of langt, en aðstæður voru þess eðlis að allt var farið út í vitleysu hvort eð er. Vonandi læra allir eitthvað á þessu máli, löggan sem og aðrir. Sérstaklega þó þessir bílstjórar, sem tókst undraskjótt að eyðileggja mótmælin fyrir sér, með lélegri taktík og afspyrnuslöppum talsmanni, sem því miður hefur alveg hjálparlaust gengisfellt í senn sjálfan sig og málstað þeirra sem hann frontar.

Lögreglan eyddi gögnum af farsíma

Rétt ákvörðun hjá Láru - trúverðugleikinn í húfi

Mikið hefur verið rætt og ritað um uppsögn Láru Ómarsdóttur eftir eggjakastsmálið margfræga sem skaddaði trúverðugleika hennar. Mikið hefur gengið á hjá henni og eðlilega hefur hún gengið í gegnum erfið kaflaskil eftir mikil mistök. Hún stóð sig misjafnlega við að svara fyrir sig í spjallþáttum kvöldsins, var fín í Kastljósi en öllu slappari í Íslandi í dag, en þar var líka gengið nær henni og hún átti greinilega í meiri erfiðleikum með að verjast og var þar að auki í meiri tilfinningalegu uppnámi.

Lára gerði rétt með því að segja upp. Þetta mál skaddaði bæði hana og fréttastofu Stöðvar 2 - stefndi í allsherjarvandræðagang fyrir alla þá sem þar vinna. Enda snýst fréttamennska fyrst og fremst um trúverðugleika, verði fréttamaður uppvís að því að tala óviðeigandi eða reyna að krydda fréttirnar á vettvangi þeirra er illt í efni. Trúverðugleiki fréttastofunnar var undir í þessum efnum og Lára vissi vel að málið myndi ekki gufa upp nema með því að hún tæki af skarið. Hún kláraði þetta mál því bæði af skynsemi og röggsemi án þess að hika og á réttum tímapunkti.

Efast ekki um að Lára er dugleg og samviskusöm í sínu. Efasemdir hafa þó heyrst um hvort hún væri alltaf hlutlaus og ekki hafa allir verið sáttir við hana. Ekki ætla ég að dæma hana fyrir það. Fannst Lára oft standa sig vel og gera hlutina vel, hún var ófeimin við að taka á fréttunum, spyrja erfiðra spurninga og sauma að þeim sem gera mistök í pólitíkinni eða hafa ekki gert hlutina í takt við það sem þeir lofuðu sjálfir í kosningum eða í dagsins önn þess einmanalega lífs sem oft fylgir stjórnmálum. Í eigin klúðri var eðlilega spurt um hvort hún ætti ekki að taka ábyrgð á þeim. Ekkert annað kom til greina og hún náði að ljúka málinu áður en það varð stórslys fyrir fréttastofuna.

Kemur mér samt mest á óvart að Steingrímur Sævarr Ólafsson, fréttastjóri, hafi ekki sjálfur tekið á þessu máli. Sé frásögn hans rétt af því að hann sem fréttastjóri hafi ekki tekið til sinna ráða eða viljað ljúka málinu af ábyrgð og án þess að skuggi félli á trúverðugleika vinnustaðarins er eðlilegt að spurt sé hversu sterkur fréttastjóri hann sé eiginlega. En kannski er óþarfi að spyrja: Lára lauk málinu áður en trúverðugleiki stöðvarinnar gufaði upp. En vissulega er hann skaddaður á eftir, það er ekki hægt að neita því.

Vona að allir fréttamenn læri sitt á þessu klúðri Láru. Í fréttamennsku skiptir máli að koma fram af ábyrgð og fjalla um fréttir en ekki búa þær til, hvort sem það er gert með vandræðagangi eða ásetningi.

Steingrímur Sævarr: Lára er maður að meiri

Freaky Friday á Miklubraut

Jæja, það er gott að löggan hefur tekið á málum á Miklubraut og náð að koma umferð þar á aftur eftir flipp ungmennanna. Einhver skilaboð er æska landsins sennilega að reyna að koma með á þessu föstudagssíðdegi og væntanlega fáum við að heyra eitthvað af því í kvöldfréttatímunum.

Hef aldrei verið á móti því að æska landsins hafi skoðanir á hitamálum og berjist fyrir einhverju sem það telur rétt. Sjálfur var ég einu sinni á þessum aldri og hafði mínar skoðanir, enda mjög pólitískur alla tíð og fylgdist vel með fréttum og stjórnmálum. Eðlilegt er að allt ungt fólk finni hugsjónum sínum farveg og berjist fyrir pólitískum áherslum eða það sem það einlæglega telur rétt.

En það er öllu verra þegar að æska landsins berst fyrir einhverju sem það hefur enga tilfinningu fyrir eða skilur ekki neitt í því. Því miður sást vel á mótmælunum á miðvikudaginn, sem enduðu í móa í orðsins fyllstu merkingu, að unga fólkið sem var að kasta eggjum var bara að gera það vegna þess að þeim þótti það kúl og flippaði með í takt við bílstjórana á staðnum. Ekki voru það neinar hugsjónir sem þar réðu för, allavega gátu þau ekki útskýrt hversvegna þau væru þarna. Þeim fannst þetta bara flott og spáðu ekki meira í því.

Stemmningin á Miklubraut virkar svipuð. Eitthvað flipp á föstudegi. Eða hvað?

Rýmingu lokið á Miklubraut

Ungmenni feta í fótspor atvinnubílstjóranna

Ekki er það nú gáfulegt að ungmenni feti nú í fótspor bílstjóranna og blokkeri umferð. Hver er tilgangurinn? Ekki nema von að spurt sé. Ungmenni voru áberandi við mótmælin við Rauðavatn í fyrradag og voru þar mun meira áberandi við eggjakast en bílstjórar og þeir sem hafa fylgt þeim í mótmælunum. Undir lokin varð þetta eins og skrípaleikur.

Sýnist að flestir séu orðnir langþreyttir á mótmælum bílstjóranna. Þeir hafa reyndar klúðrað þeim sjálfir með sínu verklagi síðustu dagana og talsmaður þeirra hefur slúffað þeim alveg hjálparlaust. Svolítið sérstakt er að sjá ungmenni landsins leggja þeim lið núna, en varla er hægt að líta á þetta nema sem móralskan stuðning við bílstjóranna.

Í kvöldfréttum Stöðvar 2 á miðvikudag voru nokkur ungmenni við Olís-stöðina spurð af hverju þau væru að kasta eggjum. Ein stelpan sagði að það væri bara stemmning í þessu og var greinilega ekki mjög kjaftstopp þegar að leitað var eftir alvöru ástæðum. Þetta leit út eins og sport fyrir þeim. Enda var þetta komið út í stjórnlaust rugl, sannkallaðan skrípaleik. 

Væri gaman að vita fyrir hverju ungmennin eru að berjast með mótmælastöðu sinni. Eru þau bara að tjilla út á föstudegi eða eru þau að leggja fram móralskan stuðning við Sturlu og félaga?

Ungmenni tefja umferð

Lára axlar ábyrgð á dómgreindarbresti sínum

Lára Ómarsdóttir hefur gert hið eina rétta í veikri stöðu sinni og hætt sem fréttamaður á Stöð 2. Dómgreindarbrestur hennar í starfi var mjög alvarlegur og ekki hægt aðeins að biðjast afsökunar á ummælunum um eggjakastið. Hún reyndi að bæta stöðu sína með því að gefa í skyn að aðeins um grín hefði verið að ræða en það virkaði ekki sannfærandi þegar að upptaka af ummælunum varð opinber.

Í þessum efnum var fyrst og fremst spurt um trúverðugleika fréttastofu Stöðvar 2. Um leið og ljóst var að Lára hefði látið þessi umdeildu ummæli falla varð augljóst að fréttamannsheiðri hennar yrði í raun ekki bjargað. Stóra spurning málsins varð um það lykilatriði hvernig yfirmenn hennar myndu taka á málunum. Að óbreyttu hefði trúverðugleiki fréttastofunnar beðið hnekki af og bæði Láru og einkum yfirmönnum hennar varð ljóst að ekkert yrði lagað í þessu nema að Lára tæki ábyrgð á ummælunum og segði upp, ella yrði látin hætta.

Lára er manneskja að meiri að taka sjálf þessa ákvörðun og hverfa á braut. Dapurlegt er vissulega að hún hafi brugðist sínu hlutverki með ummælum sínum, sem ekki var hægt að taka trúanlegt að hefðu aðeins verið sett fram í gríni. Hefði það átt að verða gild afsökun hefði tónninn í röddinni þurft að verða annar og jafnvel þurft að fylgja hlátur með. Enginn trúði því að þetta væri aðeins húmor. Eftir stóðu aðeins óafsakanleg mistök á fréttamannsvakt.

Hættir sem fréttamaður á Stöð 2

Ágústi sleppt - óánægja vegna ummæla Sturlu

Óánægja mun vera meðal bílstjóra í kjölfar þess að Sturla Jónsson vildi ekki kannast við að þekkja Ágúst Fylkisson, þó að hann hafi verið mjög virkur í mótmælum þeirra, eftir að hann sló lögregluþjón á Kirkjusandi. Sturla missti út úr sér að Ágúst væri nýkominn úr hnéaðgerð en sagðist í sömu andrá ekki þekkja hann. Deilt er um hæfileika Sturlu til forystu, öllum er ljóst að hann hefur skaðað mótmælin með orðavali sínu.

Auðvitað er það lélegt hjá Sturlu að vilja ekki kannast við mann sem hefur fylgt honum eins og skugginn í mótmælunum og tala um hann eins og þar fari maður sem ekkert tengist hópnum sem hefur verið að mótmæla að undanförnu. Enda finnur maður það vel á viðbrögðunum að þeir sem ekki höfðu snúið baki við bílstjórunum séu orðnir mjög hugsi og velta fyrir sér hæfileikum Sturlu til að fronta þennan hóp og hversu mikinn skaða hann hafi unnið.

Talað hefur verið um að bílstjórar utan af landi myndu fara suður til að leggja félögum sínum þar lið. Eftir atvikið í gær mun hafa sljákkað í þeim fyrirætlunum.

Þess má reyndar geta að bróðir hins umdeilda Ágústs, Guðmundur Fylkisson, er aðalvarðstjóri hjá Ríkislögreglustjóra.

Sleppt úr haldi

Stóra klúðrið - trúverðugleiki bílstjóra gufar upp

Ég tel að trúverðugleiki bílstjóranna hafi gufað endanlega upp þegar að ljóst varð að Sturla Jónsson laug um tengsl sín við manninn sem réðst á lögregluþjóninn á Kirkjusandi. Hann tengist vel bílstjórahópnum, hefur verið framarlega í flokki þeirra og áberandi, bæði við að tala og taka þátt í fronti mótmælanna. Að neita þeirri staðreynd er mjög alvarlegt mál og er lokahöggið á þessi mótmæli.

Vilji menn leita að einni stórri ástæðu þess að bílstjórum tókst að eyðileggja fyrir sér þessa réttindabaráttu sína með mótmælunum ættu þeir að líta á talsmann sinn, Sturlu Jónsson, sem var afleitur í hlutverki sínu sem verkalýðsleiðtogi og traustur talsmaður málstaðar fjöldahreyfingar, hversu umdeild baráttan og baráttuaðferðirnar mega vera. Talsmaðurinn stóð ekki undir nafni, spilaði illa úr sínum spilum og frontaði ekki hópinn með þeim hætti sem vænlegt yrði til árangurs fyrir þá.

Undarlegt er að Sturla ljúgi nú um tengslin við þann sem sló lögregluþjóninn og vita vonlaust í sjálfu sér að ætla að leika þann leik. Fjölmiðlar hafa afhjúpað hver þessi maður er og allir vita um tengsl hans við mótmælin. Þetta er ekki bara einhver maður úti í bæ. Hann fylgdi hópnum og var með þeim á vettvangi sem stuðningsmaður og væntanlega bílstjóri ennfremur. Þetta er alvarlegt klúður hjá Sturlu, sem reynir í vandræðum sínum og rugli að afneita þeim sem fylgdi honum að málum og hefur verið myndaður með honum oftar en tölu verður á komið, enda hafa þeir fylgst að í gegnum mótmælin.

Bílstjórarnir hafa spilað algjörlega út og talsmaðurinn hefur slúffað þessu fyrir þeim, með framkomu sinni og lélegum stælum. Þvílíkt megaklúður.

Sturla: „Ekki á okkar ábyrgð"

Hver barði lögregluþjóninn á Kirkjusandi?

Dapurlegt er að sjá upptöku af því þegar að lögreglumaður var barinn á Kirkjusandi í dag, algjörlega af tilefnislausu. Atvinnubílstjórar sverja af sér manninn sem lagði til lögreglumannsins og kýldi hann. Eðlilegt er að spurt sé hver hafi þá barið lögguna og af hverju hann gerði það, sé hann ekki bílstjóri með yfirráð yfir þeim bílum sem átti að afhenta?

Þessi mótmæli bílstjóranna eru runnin út í sandinn og orðið eitthvað flipp og rugl, því miður þeirra vegna. Þeir hafa misst öll sín tromp og ættu að hætta þessu rugli meðan að þeir geta. Nóg hafa þeir skemmt fyrir sér. Ekki er gott ef einhver er að skemma enn frekar fyrir þeim með því að berja löggu að tilefnislausu og eðlilegt að fá því svarað hver gerði það og af hverju.

Annars er mál að linni í þessu rugli og vonandi að takist að lægja öldur, allra aðila vegna. Hvað bílstjóra varðar er ljóst að þeir hafa fokkað þessum mótmælum fyrir sér og þurfa því ekki á skemmdarverki á borð við þetta að halda í viðbót, þ.e.a.s. ef þeir standa ekki að þessu, sem hefur reyndar ekki enn verið svarað almennilega.

Ráðist á lögregluþjón

Alvarleg mistök - verður Lára rekin af Stöð 2?

Láru Ómarsdóttur, fréttamanni, urðu á alvarleg mistök í gær þegar að hún hvatti til þess að eggjum yrði kastað í lögguna, án þess að vita að hún væri í beinni. Lára á að sjá sóma sinn í að segja upp, ella verða rekin. Svona vinnulag er ekki boðlegt á fjölmiðli sem vill láta taka sig alvarlega. Ef ekki verður tekið á svona megaklúðri fréttamanns að þá er fréttastofan sem hefur svona fólk á sinni vakt að gengisfella sig.

Eitt er að taka myndir af vettvangi og lýsa aðstæðum, annað að missa sig í vitleysunni á staðnum og missa dómgreindina. Lára missti dómgreindina með framgöngu sinni í gær og hefur slúffað sínum trúverðuleika algjörlega.

Ætlar fréttastofa Stöðvar 2 að láta trúverðugleika sinn sökkva með Láru?

Gáfu ekki lagalegar skýringar

Ógeðslegar árásir að Birni Bjarnasyni

Frekar dapurlegt er að sjá brot af því persónulega skítkasti sem Björn Bjarnason, dómsmálaráðherra, hefur fengið eftir þarfar aðgerðir lögreglunnar við Rauðavatn í gær þegar að mótmæli atvinnubílstjóra runnu endanlega út í sandinn. Þar er honum óskað dauða og öllu illu. Ekki er það neinum til sóma að skrifa svona, þó mögulega séu ólíkar skoðanir uppi á deiluefnum í samfélaginu.

Held að það væri gott fyrir suma að fara að róa sig aðeins niður úr vitleysunni sem hefur heltekið þá í þessum glötuðu mótmælum. Svona orðaval og framkoma styrkir engan málstað og sýnir aðeins þroskaleysi þeirra sem þannig skrifa.

Tel að Björn hafi gert rétt í því að birta brot af þessu ógeði sem til hans hefur verið beint. Ekki hefðu allir birt svona skrif á vef sínum en í þessu tilfelli tel ég að nauðsynlegt sé að birta brot af þessu. Þó ógeðslegt sé það.

Fyrst að þessi tvö tölvubréf til Björns voru svona ógeðsleg er nema von að spurt sé hvernig öll hin hafi verið?

„Gerðu þjóðini greiða og skjótu þig"

Þvílíkur dagur - mótmæli verða að skrípaleik

Jæja, þvílíkur dagur. Ekki á hverjum degi sem táragas er notað á mannfjölda hérlendis. Í dagslok voru mótmælin orðin algjör vitleysa og skrípaleikur. Bílstjórarnir misstu þau fáu tromp sem þeir höfðu enn á hendi eftir mörg mistök sín síðustu vikurnar. Held þó að þeir hafi tapað slagnum þegar að þeir vissu ekki sjálfir grunnatriði um bensínverðið og um hvað leikurinn snerist.

Í dag varð þetta hreinræktað rugl. Fannst stórmerkilegt að sjá Sturlu Jónsson þenja sig í Kastljósi kvöldsins. Þar vildi hann kenna ríkisstjórninni um hvernig allt fór við Rauðavatn og að allt varð vitlaust. Ekki var hann til í að líta neitt í eigin barm og sagan hans um að þeir hafi nú verið að fara þegar að allt fór í vitleysu hljómar frekar fölsk og ósannfærandi. Allt benti til að bílstjórarnir ætluðu að hjóla í sérsveitina.

Í upphafi skildi ég eins og svo margir fleiri gremju bílstjóra og þörf þeirra fyrir að koma með statement af einhverju tagi. Þeir gerðu það og náðu athygli fljótt. En leikurinn byrjaði fljótt að þynnast út með lélegu skipulagi og framsetningu mótmælanna. Þeir áttuðu sig ekki á grunnatriðum mála, neituðu að hlusta á staðreyndir og lokuðu sig af með rörlaga sjónarhorn á lífið og tilveruna. Þeir misstu yfirsjón á mótmælunum og misstu sig í hreint rugl.

Síðan hafa þeir verið að tapa dampi og missa sig hreint út. Ekki hefur talsmaðurinn hjálpað til, með mjög afleit rök og lélega rökfimi í tali sínu. Held þó að hann hafi endanlega spilað sig yfir og út með tali sínu í kvöld. Þar stóð varla steinn yfir steini og vandræðagangurinn algjör. Myndirnar af dramatíkinni við Rauðavatn sýna vel að bílstjórar lögðu til gegn lögreglunni og hún svaraði fyrir sig. Eðlilega. Annað hefði verið óeðlilegt og ég tel að lögreglan hafi gert það eina sem í stöðunni var. Það sauð endanlega upp úr. Hafði svosem blasað við lengi.

Bílstjórunum tókst á mjög skömmum tíma að gera það sem ég varaði við á fyrsta mótmæladegi - að missa mótmælin úr höndum sér og ná ekki að tækla þau vel. Það sem átti að vera mikið statement um lykilmál þeirra varð að algjöru rugli á skömmum tíma. Stóru mistökin voru að beina mótmælunum að almenningi, ergja hann og missa yfirsjón á grunnatriðum mála, t.d. að hafa ekki á hreinu staðreyndir um bensínverð og reyna að afneita þeim.

Eftir standa bílstjórar með flippuð mótmæli sem hafa runnið út í sandinn. Eftir allt varð það veganestið sem þeir náðu sér í með þessu öllu saman.

Undarlegast finnst mér þó að sjá suma líkja þessu rugli við Rauðavatn við Gúttóslaginn. Afsakið, meðan að ég hlæ.

21 handtekinn í dag

Bílstjórar reknir fyrir að taka þátt í mótmælum?

Kjaftasagan er að nokkrir bílstjórar sem handteknir voru í morgun vegna mótmælanna á Suðurlandsvegi verði reknir fyrir að taka þátt í þeim. Vinnveitendur þeirra hafi bannað þeim að taka þátt og gegn þeirra ákvörðunum hafi bílar fyrirtækja þeirra verið í mótmælunum og notaðir til að blokkera umferð.

Alls voru 21 handtekinn í aðgerðum lögreglunnar í dag og hald var lagt á bílana sem notaðir voru í mótmælunum á Suðurlandsvegi og mun lögreglan væntanlega hafa þá í sinni gæslu næstu dagana. Sumir eigendur bílanna vilja frekar fá bílana en bílstjórana aftur, skilst manni.

Það hlaut að koma að því að syði upp úr milli bílstjóra og lögreglu. Fannst mótmælin renna endanlega út í sandinn í dag. Bílstjórar hafa misst sín spil, færðu ekki bílana eftir skamma stund við mótmæli og gengu alltof langt. Greinilegt er að þeir sem hafa þá í vinnu vilja ekki heldur sjá þá framar við að keyra þessum bílum sem blokkeruðu Suðurlandsveginn.

Mótmælin fóru úr böndunum

Ólafur ráðinn ritstjóri Morgunblaðsins

Líst mjög vel á að Ólafur Þ. Stephensen hafi verið ráðinn ritstjóri Morgunblaðsins í stað Styrmis Gunnarssonar, sem lætur af störfum eftir farsælt verk áratugum saman hjá Mogganum í júníbyrjun. Ólafur hefur staðið sig mjög vel sem ritstjóri 24stunda og gert það blað að því besta í morgunlestrinum dag hvern, ferskt og vandað í senn.

Tel að það sé vel valið hjá eigendum Árvakurs að velja Ólaf til að stýra Mogganum inn í nýja tíma, sem óneitanlega fylgja ritstjóraskiptum þegar að Styrmir hættir eftir að hafa stýrt Mogganum í hartnær fjóra áratugi. Hann hefur verið aðstoðarritstjóri Moggans og unnið þar í fjöldamörg ár, þekkir allt þar og hefur þekkingu og reynslu, þrátt fyrir að vera aðeins fertugur.

Ólafur var alla tíð vænlegasta ritstjóraefni Morgunblaðsins við væntanlega uppstokkun og hefur sýnt með á 24stundum að hann kann sitt fag. Held að Mogginn muni endurnýja sig og verða ferskur og traustur fjölmiðill undir hans stjórn á komandi árum.

Ólafur nýr ritstjóri

Mótmælin komin út í algjöra vitleysu

Get ekki betur séð en að mótmæli bílstjóranna séu komin út í tóma vitleysu, stjórnlaust rugl. Hefur snúist upp í hálfgerð skrílslæti nú eftir hádegið þar sem framhaldsskólanemendur leika lykilhlutverk við að kasta eggjum í lögreglumenn, koma í búningum til að vekja á sér athygli. Svolítið sérstakt að sjá þetta í netútsendingu rúv.is.

Held að þetta styrki ekki mótmæli bílstjóranna, eða hvað sem á orðið að kalla þetta. Er eiginlega að fara út í bláinn, enda flokkast þetta varla undir mótmæli bílstjóra og er orðið eitthvað allt annað, skrílslæti kannski eftir gasið í morgun og að einhverjir vilji vekja á sér athygli við að tala málstað sem er eitthvað orðinn útþynntur á vettvangi.

Fannst þetta verða fyndnast þegar að nemendur úr Iðnskólanum í Hafnarfirði komu í búningum frá tímum þýska þriðja ríkisins, voru að dimmitera og notuðu tækifærið til að mæta. En kannski varð þetta rugl súrrealískast þá. Get ekki séð að einhver heildstæður bragur sé á þessum mótmælum og þetta sé orðið eitthvað flipp bara.

Eggjakast og nasistabúningar

Allt á suðupunkti við Rauðavatn

Þvílíkt drama er þetta við Rauðavatn. Allt á suðupunkti, bílstjórar leggja allt undir fyrir baráttuna og löggan er með allan viðbúnað og gasaði mótmælendur. Er frekar súrrealískt að sjá lögreglumenn öskra Gas! Gas! Gas! og gasa liðið beint í andlitið. Steinum er kastað, lögga fær einn í hausinn og einn mótmælandinn er eltur uppi og barinn í klessu.

Ekki skrítið að fólk líki þessu helst við bandaríska hasarmynd. Ekki nema von að því sé velt fyrir sér hvað gerist eiginlega næst. Getur þetta orðið dramatískara og hvassara en hasarinn við Rauðavatn í morgun? Sá viðtal við einn bílstjóra áðan sem var að hóta því að næst myndu bílstjórar láta hlöss vaða fyrir utan opinberar byggingar og daðraði við stóra stoppið.

Haldi mótmælin áfram má búast við að það verði stál í stál og hart mæti hörðu. Óttast það mest að þetta verði einmitt svona, grjóti verði kastað og fólk verði bara gasað. Löggan muni beita öllu sínu. Finnst það afleitt að mótmælendur láti grjót vaða í lögreglumenn sem eru að vinna sitt verk. Hafði í upphafi samúð með mótmælendunum en það hefur verið að gufa upp, eins og ég rakti hérna fyrr í morgun. Löggan nýtir sín úrræði, hversu umdeilt sem það annars má vera.

Ætli það verði ekki pottþéttur endir á þessum degi annars að setja ekta bandaríska hasarmynd í DVD-spilarann?

Lögreglumaður á slysadeild

Þolinmæðin á þrotum - táragas við Rauðavatn

Held að það minni einna helst á bandaríska kvikmynd að horfa á það sem er að gerast við Rauðavatn. Óeirðirnar milli bílstjóra og lögreglu, sem lauk með því að táragasi var beitt sýnir hversu langt lögreglan er tilbúin að ganga. Kannski mátti eiga von á að lögregluyfirvöld væru búin að fá nóg og myndu beita valdi, ekki hefur vantað skilaboðin í þá átt en þetta eru mjög skýr skilaboð sem gefin eru í dag.

Man ekki eftir svo harkalegum aðgerðum gegn mótmælendum hérlendis mjög lengi. Lögreglan var framan af mótmælum bílstjóranna mjög róleg, gaf þeim meira að segja í nefið og talaði vinalega til þeirra. Eftir því sem mótmælin hafa orðið beittari hefur samskipti þeirra kólnað og nú er valdi beitt og send þau skilaboð að þolinmæðin sé á þrotum.

Lögreglan er með þessu fyrst og fremst að minna á sig, hún geti beitt valdi og muni gera það óhikað úr þessu. Eðlilega er spurt að því hvort að þetta sé það sem koma skal úr þessu. Lögreglan muni klippa á mótmælin með táragasi og valdboði en hlusti ekki meira.

Held að flestir hafi átt von á eftir ólguna síðustu daga að reynt yrði að berja mótmælin niður með valdboði, en það gerist mun hraðar og harkalegra en búast mátti við.

Lögregla beitir táragasi

Hvíldartími bílstjóra á háannatíma í umferðinni

Eftir að hafa sleppt mótmælum um skeið minna atvinnubílstjórar nú enn og aftur á sig og sína baráttu þessa dagana - taka nú hvíldartímann sinn á háannatíma í umferðinni. Efast um að þeir séu að styrkja sína stöðu með þessum baráttuaðferðum og undrast enn að þeir beini mótmælunum gegn almenningi í umferðinni. Ljóst er að það er ekki til þess fallið að bæta þeirra málstað og eiginlega hafa þeir misst baráttuna algjörlega út á tún með röngum ákvörðunum að undanförnu.

Bílstjórarnir tóku sér pásu að ég tel meðvitað áður, enda sködduðust þeir frekar en styrktust á orðavali talsmannsins og aksturslagi við mótmæli, auk þess að gera ökumenn í umferðina reiða. Orðrómur hefur verið uppi um að bílstjórar stefni jafnvel að stóra stoppinu umtalaða á næstunni. Ætli sér að lama höfuðborgarsvæðið með mótmælum, leggja bílum sínum og skilja þá eftir á aðalumferðaræðum borgarinnar.

Stóra stoppið mun verða mjög umdeilt, verði af því. Það eru einfaldlega það stór mótmæli að það myndi aðeins kalla á hörð viðbrögð almennings og reiðiöldu, frekar en stuðning. Finnst staðan vera mjög afgerandi í þessa átt, að bílstjórar standi einir og almenningur hafi ekki lengur samúð með aðferðum þeirra og málstað. Þeir hafi klúðrað þessu.

Þeir höfðu mikinn stuðning almennings fyrst en hann hefur dvínað mjög að undanförnu, að mestu vegna taktískra mistaka í mótmælunum.

Bílstjórar „taka hvíldartíma"