Ekki óeðlilegt að krafist hafi verið uppstokkunar

Ekki þarf pólitískan sérfræðing til að sjá að mikil óánægja var meðal sjálfstæðismanna með forystu flokksins í janúar 2009. Landsfundur átti að vera í lok mánaðarins og eðlilega voru þeir komnir af stað sem vildu uppstokkun, breyta til í flokksforystunni. Enda hefði ekki verið óeðlilegt að það hefði verið kosið milli manna og gert upp fortíðina.

Eins og flestir vita kom ekki til þess: formaður flokksins vék vegna veikinda og hætti í stjórnmálum: landsfundi var frestað um tvo mánuði. Kosningar á landsfundi tóku á sig annan blæ og svo fór að tveir þingmenn sem aldrei höfðu setið í ríkisstjórn tókust á um formennskuna. Ekki var mikil eftirspurn eftir ráðherrum fyrri tíðar í það.

Enda er eðlilegt að horft sé til framtíðar með nýju fólki sem var ekki í eldlínu ákvarðana fyrir og eftir hrun.

„Átti bara að vera okkar á milli“

Jónína Ben slær á kjaftasögurnar

Ein lífseigasta kjaftasagan að undanförnu er að Jónína Benediktsdóttir og Gunnar í Krossinum eigi í ástarsambandi, en trúarhöfðinginn er nýskilinn eins og öllum ætti að vera kunnugt. Jónína Ben slær á kjaftasögurnar á facebook-síðu sinni og segir söguna ættaða frá Gróu á Leiti. Vel gert hjá henni, enda held ég að margir hafi haft gaman af því að koma sögunni áfram, og ekki alltaf leitað eftir hinu sanna.

Jónína Ben hefur lengi verið vinsæl hjá Gróu á Leiti. Væntanlega er hún orðin þreytt á hinum ýmsu sögum gegnum tíðina og hefur leiðrétt sumar ansi mynduglega. Sumir láta Gróu á Leiti stjórna hugsunum sínum og hugleiðingum. Forvitnin oft of mikil til að bíða eftir sannri frásögn í hinum ýmsu málum.

Mér finnst það töff hjá Jónínu Ben að tækla umræðuna og tala tæpitungulaust. Facebook er þannig vettvangur að þar er auðvelt að ná til margra. Hvað varðar Gróu á Leiti fékk hún vænt högg frá Jónínu. Hún er eins og venjulega ófeimin að tala hreint út.

Forsetinn á að birta öll bréfin

Ólafur Ragnar Grímsson hefur átt í miklum erfiðleikum með að svara fyrir bréfin sem hann hefur skrifað fyrir útrásarvíkingana í forsetatíð sinni. Leyna átti þeim í þrjá áratugi þrátt fyrir mikilvægi þeirra í rannsókn á efnahagshruninu. Þessi bréf eiga fullt erindi í umræðuna og þau á öll að birta sem fyrst.

Ólafur Ragnar er greinilega farinn að gefa eftir, enda veit hann að vandræðin eru fjarri því að baki vegna málsins. Hann ætti að klára málið með þeim hætti er bestur telst: að birta bréfin og leggja spilin á borðið.

Íhugar að birta bréf

Handrukkunarferlinu lokið - IMF heldur áfram

Seint og um síðir hefur Alþjóða gjaldeyrissjóðurinn komið málum Íslands áfram. Eins og fram kemur í yfirlýsingunni hefur allt verið stopp vegna þess að Bretland og Holland hafa haldið okkur í algjörri gíslingu. Þjónað hefur verið duttlungum þeirra mánuðum saman og við fryst á meðan. Lengi vel var því neitað að það væri ástæðan en auðvitað hefur handrukkunarblærinn verið augljós á vinnuferlinu með Ísland.

Hversu oft neituðu stjórnvöld hér heima að þetta tengdist; biðin eftir IMF og vinnubrögð viðsamjenda okkar. Þetta er til skammar fyrir IMF, enda var komið fram við Ísland af mikilli óbilgirni og óheiðarleika. En auðvitað er það svo að þessi stofnun er handrukkari stóru þjóðanna. Þessi yfirlýsing staðfestir það hafi einhver verið í vafa.

Lán AGS tilbúið í lok október

Aumingjaskapur stjórnvalda á örlagastundu

Fróðlegt var að sjá söguna á bakvið samskiptin við Bretland örlagadagana eftir hrunið í október 2008 í þætti Þóru Arnórsdóttur í kvöld. Sú spurning er áleitin hvers vegna íslensk stjórnvöld tóku ekki slaginn við Bretland í upphafi málsins, þegar einhver vörn var í boði. Auðvitað áttu stjórnmálamenn hér heima að fara með mál sitt fyrir NATÓ - ekki átti að sætta sig við að eitt NATÓ-ríki beitti hryðjuverkalögum gegn bandalagsþjóð.

Í staðinn var hummað og hóstað máttleysislega. Ekkert var gert. Íslenskir ráðamenn horfðu þegjandi á Gordon Brown vega að Íslandi og veita því mikið og þungt högg með orðum sínum á SKY 9. október 2008. Kippt var í einhverja diplómatíska spotta með því að kalla sendiherrann til forsætis- og utanríkisráðherra en ekkert meira var gert. Íslenskir ráðamenn höfðu ekki það í sér að taka til sinna ráða, ekki einu sinni tala við bresku pressuna.

Sumum fannst ég djarfur þegar ég sagði í bloggfærslu 9. október 2008, eftir viðtalið við durtinn Brown á Sky þar sem hann jós skít og skömmum yfir Ísland, að Ísland ætti að slíta stjórnmálasambandi við Bretland. Æ betur sést að það hefðum við átt að gera. Íslensk stjórnvöld áttu að svara fullum hálsi og taka málið föstum tökum frá fyrsta degi í stað þess að lympast niður.

Við höfum með þögn og aðgerðarleysi okkar í alþjóðasamfélaginu, t.d. með því að mótmæla ekki harðlega á leiðtogafundi NATÓ fyrr á þessu ári, vanið Bretana á að sparka í okkur án þess að svara í sömu mynt. Ég held að síðar meir verði þetta hik og aðgerðarleysi metið sem mikil og taktísk mistök. Slíkt blasir reyndar við öllum sem sjá þessa sögu nú ári síðar.

Þegar ein þjóð í NATÓ-samstarfinu beitir annarri hryðjuverkalögum og reynir að sparka henni til helvítis með því að eyðileggja orðspor hennar með vísvitandi hætti á slíkt heima innan NATÓ til umræðu.

Eitt annað var merkilegt í þessum þætti: mótmælin fyrir ári þegar allt var að fuðra upp. Ekki verður séð að mikið hafi breyst á þessu ári sem liðið er. Kosningarnar í vor skiluðu engum marktækum breytingum.

Ráðaleysið er enn algjört og leyndin engu minni, jafnvel meiri ef eitthvað er. Við vitum enn mjög lítið hvað er að gerast, erum enn í algjöru myrkri í lykilmálum.

Eina sem hefur breyst er kannski það að vinstrimenn eru hættir að mótmæla og eru á bömmer yfir því að stjórnin sem þeir kusu til valda er alveg máttlaus.

Telja hollensk stjórnvöld líka bera ábyrgð

Siggi stormur rekinn af Stöð 2

Ég held að þeir á Stöð 2 geri mistök með því að reka Sigga storm, Sigurð Þ. Ragnarsson, veðurfréttamann. Hann er einn af þeim örfáu mönnum í íslenskri sjónvarpssögu sem hefur tekist að gera veðrið skemmtilegt sama hvernig það er.

Hann hefur getað gert leiðinlega veðurspá að skemmtiefni með útskýringum og tjáningu um lægðir og veðurkerfi. Man í seinni tíð aðeins eftir Þór Jakobssyni og Páli Bergþórssyni sem komast nærri Sigga stormi í þeim efnum.

Veður er þurrt og fræðilegt sjónvarpsefni í sjálfu sér, en allir fylgjast með því. Þeir sem geta gert það að skemmtilegum og fræðandi dagskrárlið með tjáningu sinni og fasi eiga hrós skilið.

Siggi Stormur kominn á Kanann

Vinstristjórnin játar sig sigraða í Icesave-málinu

Enn einu sinni hafa Jóhanna Sigurðardóttir og Steingrímur J. Sigfússon komið fram með "viðunandi" niðurstöðu í Icesave-málinu að eigin mati. Eins og við mátti búast játar vinstristjórnin sig sigraða í málinu og ætlar nú að breyta lögfestum fyrirvörum Alþingis. Þetta er allt eftir bókinni.... Samfylkingunni langar jú svo mikið í ESB. Blautur draumur.

Væntanlega á að keyra þetta í gegn fljótlega, svipaðar tilraunir og í sumar þegar átti helst að keyra Icesave-málið í gegn án fyrirvara og almennilegrar umræðu. Helst án þess að enginn fengi að lesa samninginn hræðilega sem Svavar Gestsson kom með heim... stóra skuldabréfið.

Jóhanna er orðinn fagmaður í að gefa eftir... enn einu sinni segir hún að ekki verði lengra komist með viðsamjendur. Þetta er orðin svo auðveld rulla að Jóhanna fer orðið sannfærandi með eftirgjöfina. Á ekki erfitt með að játa sig sigraða.

Þeir höfðu greinilega rétt fyrir sér sem sögðu í sumar að það yrði dýrkeypt fyrir Samfylkinguna að reyna að koma Íslandi í Evrópusambandið.

Lengra varð ekki komist

Vanvirðing við Alþingi

Niðurstaðan í Icesave-málinu er algjör vanvirðing vinstristjórnarinnar við Alþingi: algjör eftirgjöf og ósigur Íslands. Ekki aðeins þurfa Íslendingar að taka á sig auknar byrðar heldur er þingræðið algjörlega beygt. Í sumar tók þingið af skarið og setti fyrirvara sem styrktu stöðu Íslands í málinu.

Í stað þess að láta þingræðið eiga lokaorðið af hálfu Íslands gefa vinstriflokkarnir eftir og semja af sér það sem þingið sagði. Þetta er ein mesta niðurlæging Alþingis í stjórnmálasögu Íslands.

Vel við hæfi að kynna þetta í skjóli nætur... þetta eru algjör myrkraverk.

Icesave-fyrirvörum breytt

Heiðarlegt uppgjör

Fyrir öllu er að hrunið og allir þættir þess verði gerðir upp með heiðarlegum og traustum hætti. Annað er ekki viðunandi. Síðustu vikur hefur almenningur loksins fengið á tilfinninguna að eitthvað sé verið að gera og farið verði markvisst yfir alla þætti fyrir og eftir hrunið.

Fyrr verður ekki friður en uppgjörið er frá, hversu sársaukafullt sem það má vera fyrir alla sem því tengjast. Fólkið í landinu vill gera upp hrunið og þá gildir enginn hvítþvottur.

Hlutabréfasala ráðuneytisstjóra rannsökuð

Grjóti kastað úr glerhúsi

Greinilegt er að Gunnar Björnsson ætlar að taka slaginn við Karl Sigurbjörnsson, væntanlega með því að fara í mál. Væntanlega er það besta leiðin fyrir hann til að verjast ef hann telur sig geta snúið aftur til starfa á Selfossi eftir allt sem á undan er gengið. Vandséð er hvernig hann geti sameinað söfnuðinn að baki sér eftir hið umdeilda mál.

Staða hans hefur gjörbreyst. Reyndar hefur óeining og ólga einkennt verk Gunnars hvar sem hann hefur starfað - hann hefur sundrað söfnuðum en ekki styrkt þá. Og það víðar um land. En það er réttur hans að berjast vilji hann reyna að halda í brauðið á Selfossi.... þó hann hafi sundrað söfnuðinum.

Viljum fá prestinn okkar aftur

Ómerkileg aðför að Rögnu

Mér finnst aðförin að Rögnu Árnadóttur, dómsmálaráðherra, í Háskólanum mjög ómerkileg. Sá skríll sem hefur sig þarna í frammi hefði átt að leyfa ráðherranum að flytja ræðu sína og heyra hvað hún hefur fram að færa. Hví er svona skríl ekki vísað á dyr?

Er leyfilegt að eyðileggja eitt stykki ráðstefnu af því nokkrir eru í fýlu og ekki fullorðnari en svo að leyfa ekki öðrum að tala?

Er þetta fólk í fýlu yfir því að ráðherra fer að landslögum í störfum sínum? Er þetta bara uppeldislegt vandamál?

Gerðu hróp að ráðherra

Hreyfingin fer til Sjálfstæðisflokksins

Könnun Fréttablaðsins færir okkur tvenn stórtíðindi: annars vegar að fjórflokkurinn hefur sjaldan ef aldrei verið traustari í sessi og að kjörfylgi Borgarahreyfingarinnar fer til Sjálfstæðisflokksins. Ég tel að mjög margir sjálfstæðismenn á höfuðborgarsvæðinu hafi ekki kosið flokkinn í vor en treyst nýja framboðinu fyrir atkvæðinu, viljað prófa eitthvað nýtt - bæði til að refsa Sjálfstæðisflokknum og senda honum skilaboð sem eftir yrði tekið.

Ég tel að það verði nokkuð langt í að nýtt grasrótarframboð muni fá traust kjósenda. Borgarahreyfingin spilaði rassinn úr buxunum á mettíma - allur trúverðugleiki á þeim bænum er löngu farinn. Hreyfingin virðist aðallega vera til Sjálfstæðisflokkins, í orðsins fyllstu merkingu.

Mér finnst þetta gefa til kynna að fylgi Borgarahreyfingar á kjördegi var að mestu ættað frá Sjálfstæðisflokknum og frjálslyndum. Borgarahreyfingin fór fyrst að mælast fyrir alvöru eftir styrkjahneykslið.

Margir flokksmenn úr Sjálfstæðisflokki og þeir sem áður hölluðu sér að frjálslyndum virðast hafa kosið Borgarahreyfinguna frekar en treysta vinstriframboðum og þannig stimplað hana inn á þing.

Nú er þetta fylgi komið "heim" í orðsins fyllstu merkingu. Í þessu felst að fáir kusu Borgarahreyfinguna frá vinstri - þeir á þeim kanti treystu frekar VG.

Ríkisstjórnin rétt héldi velli

Lágkúruleg aðför að Davíð

Mér finnst það auvirðilegt hvernig fréttastofa Ríkisútvarpsins fullyrti að brotthvarf Björgvins Guðmundssonar af Morgunblaðinu tengdist ráðningu Davíðs Oddssonar þrátt fyrir að Björgvin hefði sjálfur tekið fram í samtali við fréttamann að svo væri ekki. Þetta er ekki mjög fagmannleg fréttamennska, frekar lituð og ömurleg. Þetta er frekar lágkúruleg aðför, enda hljóta fréttamenn á fjölmiðli að vita að það eigi að vitna rétt í viðmælanda.

Mjög er reynt að sækja að Davíð Oddssyni eftir að hann varð ritstjóri Morgunblaðsins. Frægir eru tilburðir vissra fjölmiðla sem hafa manninn á heilanum, en enn verra er að fjölmiðill sem löngum hefur haft einhvern trúverðugleika reyni ekki að vinna sína vinnu almennilega.

Yfirlýsing vegna fréttar RÚV

Ys og þys út af engu

Hinn sex ára Falcon Heene fékk aldeilis sínar 15 mínútur af frægð í dag. Eins ánægjuleg og fréttin um að hann hafi ekki verið í loftbelgnum hlýtur þeim að hafa gramist sem voru á milli vonar og ótta í leit að honum eftir að loftbelgurinn fannst mannlaus. En það er gott að þessi saga fékk farsælan endi. En þarna gildir eins og jafnan að líklegasta skýringin sé sú einfaldasta.

Drengurinn fannst á lífi

Biskup færir Gunnar til - góð ákvörðun

Ég tel að Karl Sigurbjörnsson, biskup Íslands, hafi gert rétt í því að færa Gunnar Björnsson úr starfi. Ekki er hægt að bjóða íbúum á Selfossi upp á að prestur snúi aftur eftir svo umdeilt mál - slíkt hefði leitt til þess að söfnuðurinn hefði sundrast upp, í fylkingar með og á móti prestinum, og haft mikla eftirmála, meiri en málareksturinn hafði. Heiðarlegast og best er að skipt sé um prest.

Auðvitað hefði verið einfalt fyrir biskup að hafa mál áfram með sama hætti. En þessi ákvörðun er djörf en um leið ákveðin leið til að sýna að biskup þorir að færa presta til sem hafa verið umdeildir og skipt sókn sinni í fylkingar í erfiðu máli.

Gunnar til Biskupsstofu

Nafnlaus gunguskrif - umdeildur fjölmiðlamaður

Ég er að mörgu leyti sammála Sturlu Böðvarssyni, fyrrverandi ráðherra og forseta Alþingis, um netskrif. Mér finnst það alveg óþolandi þegar fólk þorir ekki að tjá sig digurbarkalega nema í skjóli nafnleyndar eins og t.d. í kommentakerfi Eyjunnar og hjá Agli Helgasyni. Slík skrif dæma sig þó alltaf sjálf. Hvað þau varðar er ég algjörlega sammála Sturlu.

Egill Helgason er umdeildur, hann kemur þannig fram að hann kallar eftir því að fólk dýrki hann eða þoli ekki. Ekkert að því kannski, skrif hans eru beinskeytt og afgerandi. Hann kallar ekki beint eftir hlutlausum skoðunum á sér með því að skrifa þannig. Þó ég sé ekki alltaf sammála Agli virði ég við hann að tala hreint út og þora að hafa skoðanir.

Svo er það annað mál hvernig það fer saman við þá stefnu RÚV að vera hlutlaust í umfjöllun. Það er svosem mál Egils og hans yfirmanna. En mér finnst það betra að menn hafi skoðun og séu ekkert að fela hana. Það gerir þáttinn eflaust beittari, og kallar fram skýrari línur á mati fólks á viðkomandi fjölmiðlamanni.

Sá sem þannig talar vill verða umdeildur, þannig er það bara. Því er kannski ekkert undarlegt að Sturla t.d. hafi á honum skoðun.

Sturla: Egill heldur úti ritsóðasíðu

Við erum enn á upphafsreit

Napri veruleikinn ári eftir hrun er sá að við erum enn á sama reit. Ekkert hefur breyst. Ekki verður séð að pólitíski veruleikinn sé öðruvísi eða við lifum í einhverju öðru eða betra andrúmslofti. Við erum enn að upplifa að okkur er ekki sagt frá öllu sem er að gerast... við erum enn í hálfgerðu myrkri.

Eins og ég sagði í gær er engu líkara en við séum komin í kvikmyndina Groundhog Day með Bill Murray þar sem hann upplifir sama daginn aftur og aftur.

Flestir lykilmennirnir farnir frá Íslandi

Kemst forsetinn upp með að leyna bréfunum?

Eðlilegt er að spyrja hvort Ólafur Ragnar Grímsson komist upp með að leyna í þrjá áratugi bréfunum sem hann skrifaði til að tala máli útrásarvíkinganna. Ætlar Jóhanna Sigurðardóttir, forsætisráðherra, að skrifa upp á þessa leynd? Ef þessi þriggja áratuga leynd verður staðreynd er það leynd skrifuð upp á af ríkisstjórninni ekki síður en forsetaembættinu.

Raunalegt er að sjá bréfaskrif forsetaembættisins til Fréttablaðsins í dag, þegar blaðið reynir að fá bréfin til birtingar. Það er mjög dapurlegt að sjá forsetaembættið, sem forðum var táknmynd virðingar og var sameiningartákn þjóðarinnar, á kafi í slíku máli, að reyna að leyna óþægilegum bréfaskriftum forsetans fyrir auðmenn.

Illa er komið fyrir þessu embætti, enda er það rúið trausti og engum dettur í hug að nefna íslenska forsetaembættið eitthvað sameiningartákn hérlendis. Eitt prósent sagði það þó í nýlegri könnun. Þessi forseti er rúinn trausti og reyndar er það rannsóknarefni að hann skuli reyna að sitja áfram eins og komið er málum.

Rætt við yfir 300 manns

Skýrslu rannsóknarnefndar seinkað

Seinkun á skýrslu rannsóknarnefndar Alþingis eru nokkur vonbrigði. Ég tel að margir hafi beðið spenntir eftir uppgjörinu um næstu mánaðarmót og séð þá dagsetningu sem ljóstýru í því mikla myrkri sem er yfir íslensku samfélagi um þessar mundir. Fjölmargir binda miklar vonir við skýrsluna og niðurstöðu í rannsókn saksóknarans sem þáttaskil í þessu máli.

Eftir heilt ár frá hruninu hefur lítið breyst. Upprifjun á atburðarás októberdaganna fyrir hrunið 2008 í þætti Þóru Arnórsdóttur kallar enn frekar fram þá tilfinningu að við séum í algjöru tómi, ekkert hafi gerst. Enda er engu líkara en við séum komin í kvikmyndina Groundhog Day með Bill Murray þar sem hann upplifir sama daginn aftur og aftur.

Vonandi er þessi seinkun ekki merki um annað en nefndin þurfi meiri tíma. Seinkunin gerir að verkum að biðin verður enn lengri og væntingarnar verða enn meiri. Vonandi verður þessi bið einhvers virði. Þjóðin þarf á uppgjörinu mikla að halda.

Rannsóknarskýrslu seinkar

Sótt að landsbyggðinni

Ályktun bæjarstjórnar Grundarfjarðar er í takt við skoðanir mjög margra á landsbyggðinni með stöðuna sem blasir við nú. Sótt er að landsbyggðinni þegar þrengir að, svæði sem aldrei sáu neitt góðæri sitja uppi með að taka á sig skellinn stóra þegar á reynir. Þrengt er að hinum dreifðu byggðum landsins alveg miskunnarlaust.

Aðgerðir ríkisstjórnarinnar hafa að mörgu leyti sérstaklega slæmar afleiðingar fyrir fólk á landsbyggðinni. Greinilega á að láta niðurskurðarhnífinn ganga þar alveg miskunnarlaust. Ekki er þessi ríkisstjórn heldur að tala upp nýjar framkvæmdir sem skipta lykilmáli til að rífa okkur upp úr lægðinni.

Þar er ekki horft til framtíðar... heldur mun frekar fortíðar... reyna að rífa niður frekar en byggja upp. Það er sorgleg framtíðarsýn.

Telja vegið að landsbyggðinni