Vestfirskir barnavagnadekkjaþjófar

Ekki finnst mér nú mikil reisn yfir því að sautján ára strákar geti ekki fundið sér önnur dekk á kassabílinn sinn nema að stela því að barnavagni. Ekki mjög frumlegt og eiginlega pínlega slappt að öllu leyti. Get ekki ímyndað mér að þeir séu stoltir af því að verða þekktir sem barnavagnadekkjaþjófar. Ekki mikil karlmennska yfir því, satt best að segja.

Þeir sem hafa ekkert við tímann að gera nema að stela frá smábörnum eru ekki beint merkilegir. En vonandi gengur þeim betur við kassabílinn og geta fengið sér almennileg dekk án þess að leita til smábarnanna.

Stálu dekkjum undan barnavagni

Veikburða ríkisstjórn - vandræðagangur á Alþingi

Atburðir dagsins sýna mjög vel hversu veik vinstristjórnin er í sessi á Alþingi. Hún kemur engu í gegn nema framsóknarmenn blessi öll þeirra verk án beinnar aðkomu og þeir geta niðurlægt hana með því að setja stólinn fyrir dyrnar. Mjög vandræðalegt er þegar ríkisstjórn þarf þrisvar að fresta þingfundi til að reyna að tryggja stuðning við þau mál sem eru á dagskrá og í raun er eðlilegt að spyrja hvort ríkisstjórnin hafi ekkert annað við tíma sinn að gera þessa fáu starfsdaga þingsins en ræða málefni Seðlabankans.

Hvar eru hugmyndir hennar í efnahagsmálum til lausnar vandanum og hvar er skjaldborgin um heimilin? Þessi veikburða ríkisstjórn hefur eftir þrjár vikur ekki sýnt á sín spil ennþá og fáir vita fyrir hvað hún stendur í raun. Þegar við bætist að minnihlutastjórnin getur ekki haldið þingfundi vegna þess að þeir óttast að verða undir með eina málið sem þeir hafa náð samstöðu um en gleymt að framsóknarmenn ráða þó úrslitum verður niðurlægingin þess þá meiri.

Vandræðagangurinn á Alþingi er algjör og stjórnleysið mjög áberandi við þessar pínlegu aðstæður. Þessi farsi er mjög fyndinn en verst er að hann afhjúpar algjörlega veikleikana á þeim sem með valdið fara. Umboð þeirra er mjög takmarkað.

Þingfundi enn frestað

Höskuldur stöðvar Seðlabankafrumvarpið

Ég er ekki hissa á því að Framsóknarflokkurinn hafi bremsað af Seðlabankafrumvarpið og átti satt best að segja von á því. Auðvitað er eðlilegt að þetta frumvarp verði ekki afgreitt með einhverri fljótaskrift og farið verði vel yfir að það sé hreinlega í lagi. Miklar efasemdir eru um það á þessu stigi, enda frumvarpið meingallað frá fyrstu stundu og hefur verið breytt gríðarlega í meðförum þingsins. Þó er enn deilt um marga þætti þess, t.d. hversu valdamikill forsætisráðherra verður í verklagi Seðlabankans, enda má færa rök fyrir því að forsætisráðherra hafi aldrei áður orðið eins valdamikill beinn aðili að yfirstjórninni.

Höskuldur Þórhallsson færir mjög sannfærandi rök fyrir afstöðu sinni. Enda er algjör óþarfi að samþykkja þessi lög með fljótaskrift og einhverju ofsakeyrslu á færibandinu. Reyndar hefur þetta frumvarp afhjúpað að þessi ríkisstjórn hefur ekki náð samstöðu um neitt nema semja frumvarp í skjóli nætur með ekkert annað markmið en losa sig við Davíð Oddsson, sama hvað það kostar. Flýtirinn og vandræðagangurinn í þessu máli hefur verið þeim frekar dýrkeyptur og greinilegt að framsóknarmenn vilja ekki samþykkja hvað sem er.

Skynsamlegt að bíða

Slumdog vinnur 8 óskara - Bretar sigursælir

Bretar voru mjög sigursælir á Óskarsverðlaunahátíðinni í nótt. Kvikmyndin Slumdog Millionaire kom, sá og sigraði og hlaut 8 óskarsverðlaun, Danny Boyle hlaut leikstjóraóskarinn og breska leikkonan Kate Winslet hlaut loksins óskarinn í sjöttu tilraun sinni, en 33 ára gömul var hún yngsti leikarinn í sögu akademíunnar sem hafði tapað fimm sinnum. Sean Penn hlaut leikaraóskarinn fyrir túlkun sína á Harvey Milk, samkynhneigðum stjórnmálamanni í San Francisco sem var myrtur árið 1978, Heath Ledger, sem lést fyrir þrettán mánuðum, vann fyrir Dark Knight og spænska leikkonan Penelope Cruz fyrir leik í Woody Allen-mynd.



Með því að vinna átta óskarsverðlaun fer Slumdog Millionaire í flokk með kvikmyndunum Gone With the Wind, From Here to Eternity, Gandhi, On The Waterfront, Amadeus, My Fair Lady og Cabaret, sem náðu allar sama árangri. Aðeins sjö kvikmyndir hafa hlotið fleiri óskarsverðlaun í sögu akademíunnar en Slumdog; Ben-Hur, Titanic og The Lord of the Rings: The Return of the King sem hlutu ellefu óskarsverðlaun, West Side Story sem hlaut tíu óskarsverðlaun og The English Patient, Gigi og The Last Emperor sem hlutu níu óskarsverðlaun.



Loksins hlaut Kate Winslet óskarinn. Löngu kominn tími til. Hún hafði áður verið tilnefnd fyrir Sense and Sensibility, Titanic, Iris, Eternal Sunshine of the Spotless Mind og Little Children. Flutti trausta ræðu. Sagðist hafa beðið eftir þessu augnabliki síðan hún var átta ára. Pabbi hennar blístraði til hennar utan úr sal. Einlæg og traust ræða, tilfinningar og ekta bresk fágun sem einkenndu hana. Engin tár í tilfinningunum. Breskara verður það varla.



Sean Penn vann mörgum að óvörum fyrir stórfenglega túlkun sína á Milk. Mickey Rourke sat eftir með sárt ennið, en margir höfðu spáð honum hnossinu. Tap hans á SAG-verðlaununum var einkennandi um hvert stramurinn lá. Penn er orðinn eftirlæti akademíunnar, vann síðast óskarinn fyrir fimm árum fyrir leik sinn í Mystic River, og Hollywood gaf út sterka yfirlýsingu um andstöðu við samþykkt fylkisbanns á hjónaband samkynhneigðra í leiðinni.

Penn flutti frábæra ræðu, eins og hans er von og vísa. Talaði um pólitísku áherslurnar í valinu, sem eru augljósar, og um leið talaði hann vinalega til Rourke, kallaði hann bróður sinn. Penn hefur alltaf verið mjög pólitískur og ekki við öðru að búast en hann talaði vel um nýjar áherslur með Obama í Hvíta húsinu. Augljóst er að Penn lék Milk til að vekja athygli á pólitískum málstað sínum og vinnur á þeim grunni auk auðvitað sannkallaðrar stjörnutúlkunar.



Heath Ledger markaði söguleg skref með því að vinna óskarinn, eins og fyrr segir hér á vefnum, enda aðeins annar leikarinn í 81 ára sögu akademíunnar sem fær óskarinn eftir andlát sitt. Mjög tilfinningarík stund þegar foreldrar Heaths og systir hans fóru upp á svið til að taka við verðlaununum. Margir grétu og sýndu tilfinningar meðan Heath var minnst. Sigurinn er táknrænn að öllu leyti en er fyrst og fremst verðskuldaður heiður.



Penelope Cruz vann aukaleikkonuóskarinn, aðeins annar spænski leikarinn í sögu akademíunnar sem hreppir það hnoss. Javier Bardem var sá fyrsti er hann vann í aukaleikaraflokknum í fyrra fyrir stórleik sinn á Anton í No Country for Old Men. Cruz fer í fríðan hóp leikkvenna sem fær óskarinn eftir að hafa unnið með Woody Allen. Cruz er í sérflokki meðal evrópskra leikkvenna. Gott að Hollywood heldur áfram að heiðra evrópska leikara.



Handritsverðlaunin voru nokkuð fyrirsjáanleg, enda Slumdog og Milk sem báru þar af. Homminn Dustin Lance Black, sem skrifaði óskarshandritið að Milk, átti að mínu mati bestu ræðu kvöldsins þegar hann talaði um sigur samkynhneigðra á hátíðinni og hvaða merkingu niðurstaðan hefði fyrir sig og baráttuna sem Harvey Milk hóf í raun og gerði opinbera á áttunda áratugnum. Frábær ræða og mjög tilfinningarík. Wall-E vann svo verðskuldað sín verðlaun.

Verðlaunaathöfnin var í heildina mjög vel heppnuð. Í fyrsta skipti frá árinu 1985 stjórnaði grínisti ekki hátíðinni. Hugh Jackman fetaði nýjar slóðir sem kynnir og átti góða spretti, þó ekki hafi hann nú jafnast á við Billy Crystal, sérstaklega ekki í misjafnlega ágætu söngatriði í upphafi. Sumir hlutar þess voru lala og aðrir rétt rúmlega ágætir. Sviðinu var breytt, var hringlaga og skapaði það nálægð við fólk í sal og áhorfendur heima - tók smátíma samt að venjast því.

Óskarinn er kominn á níræðisaldur og ber aldurinn vel. Stjórnendur hátíðarinnar gerðu gott í að ferska aðeins upp á pakkann, breyta umgjörðinni verulega á sumum sviðum. Leitað var til fortíðar og yfirbragðið meira gamaldags en verið hefur. Þetta var vægast sagt notaleg andlitslyfting á gamalgrónum verðlaunapakka. Best af öllu fannst mér að fá fimm leikara til að afhenda leikverðlaunin, þar af þann sem vann í leikflokknum árið áður og auk þess fræg nöfn fyrri tíðar.

Gaman að sjá Evu Marie Saint, Goldie Hawn, Whoopi Goldberg, Christopher Walken, Robert DeNiro, Anthony Hopkins, Sophiu Loren, Kevin Kline, Ben Kingsley, Shirley MacLaine og Alan Arkin afhenda verðlaun. Saknaði samt myndaklippunnar með leikframmistöðu tilnefndra en góð viðbót var að talað var beint til þeirra um þá sjálfa og eiginleika persónanna sem þeir léku.



Allavega, þetta var gott show og gekk vel fyrir sig. Snarpt og vel gert. Stóra rúsínan í pylsuendanum fannst mér reyndar þegar Queen Latifah fór upp á svið og söng I´ll be seeing you á meðan minnst var látinna leikara og annarra sem tengst hafa kvikmyndum.

Frábær stemmning á meðan myndir af leikurunum Charlton Heston, Roy Scheider, Cyd Charisse, Richard Widmark, Paul Scofield, Paul Newman og fleirum runnu yfir á skjánum. Yndislegt og hugljúft. Viðeigandi að goðsögnin Newman ætti lokaorðið.

Í heildina frábært óskarskvöld og notaleg kvikmyndastemmning í Hollywood, sú besta í mörg ár. Skemmtilega bresk stemmning og svolítið hugljúft innst inni að sjá Slumdog-hópinn taka yfir Hollywood einu sinni.

Viltu vinna milljarð? sigraði

Heath Ledger vinnur óskarinn fyrir Dark Knight

Heath Ledger varð fyrir stundu annar leikarinn í sögu Óskarsverðlaunanna til að hljóta Óskarinn eftir andlát sitt fyrir túlkun sína sem Jókerinn í The Dark Knight. Sir Peter Finch fékk óskarinn fyrir túlkun sína í Network árið 1977, tveimur mánuðum eftir andlát sitt. Ledger lést eins og kunnugt er í New York í janúar á síðasta ári, þegar hann var að ná hápunkti síns ferils og átti svo margt enn eftir.

Ledger var leiftrandi og yndislega illkvittinn sem Jókerinn - lagði allt í þessa túlkun og færði okkur enn dýpri og kuldalegri karakter en Jack Nicholson gerði í fyrstu Batman-kvikmyndinni fyrir tveim áratugum. Þetta er að mínu mati ein besta leikframmistaða áratugarins og ég er sannfærður um að hún hefði verið verðlaunuð þó hann hefði ekki dáið, hún er svo traust.

Í raun tel ég að hún verði ekki síður eftirminnileg í sögubókum framtíðarinnar en leiksigrar James Dean á sjötta áratugnum í East of Eden, Giant og Rebel Without a Cause, ógleymanlegum meistaraverkum sem halda minningu hans á lofti um eilífð. Dean dó ungur en afrek hans voru verðskuldaðir leiklistarsigrar sem eru í minnum hafðir.

Þrátt fyrir allt lofið hlaut Dean þó aldrei óskarinn, þó hann væri tilnefndur tvisvar eftir andlát sitt. Ekki hefur verið hefð fyrir því í Hollywood að leikarar fái óskarinn eftir andlát sitt, t.d. vann Spencer Tracy ekki fyrir stórleik sinn í Guess Who´s Coming to Dinner svo annað dæmi sé nefnt.

Ég fagna því að Hollywood hafi heiðrað minningu þessa hæfileikaríka og frábæra leikara með óskarsstyttu, ekki aðeins til minningar um ógleymanlega leiktúlkun merks leikara heldur sem minnisvarða um hvað hefði getað orðið.

Umfjöllun SFS um Heath Ledger í janúar 2008

Spádómar um Óskarsverðlaunin 2009

Óskarsverðlaunin verða afhent í 81. skiptið í Los Angeles í nótt. Óskarinn er án nokkurs vafa helsta kvikmyndahátíð sögunnar, ein mesta uppskeruveisla kvikmyndabransans og þar koma helstu leikarar og kvikmyndagerðarmenn samtímans saman.

Ég ætla hér og nú að pæla í verðlaununum og spá í úrslitin í nokkrum af helstu flokkunum, svona mér mest til gamans. Mikil vonbrigði eru þó að engin íslensk sjónvarpsstöð sýni frá hátíðinni. Önnur úrræði verða því að verða til að horfa á en stóla á Stöð 2.


Kvikmynd ársins
The Curious Case of Benjamin Button
Frost/Nixon
Milk
The Reader
Slumdog Millionaire

Pælingar: Allt frábærar kvikmyndir í algjörum sérflokki og mjög sigurstranglegar. The Curious Case of Benjamin Button er langdregin en heilsteypt og vönduð kvikmyndaútfærsla á ævi með öfugum formerkjum. Frost/Nixon færir okkur bakvið tjöldin í besta pólitíska viðtal sögunnar, þar sem Nixon reyndi að verja heiður sinn eftir niðurlægjandi valdamissi. Milk er heillandi saga af hinum samkynhneigða stjórnmálamanni Harvey Milk sem féll fyrir morðingjahendi árið 1978. The Reader er sannkölluð eðalmynd og Slumdog Millionaire einlæg og kjarnmikil.

Spá: Veðja á að Slumdog Millionaire fái óskarinn. Var sú mynd sem mér fannst pottþéttust sem kvikmyndaáhugamaður. Hafði einfaldlega allt, traustur heildarpakki. Sem pólitískur áhugamaður heillaðist ég samt að Frost/Nixon alveg frá upphafi til enda, traust kvikmynd að öllu leyti en þetta verður samt ekki árið hennar. Slumdog er blæbrigðarík og pottþétt, mannbætandi og traust. Mæli hiklaust með henni.


Leikstjóri ársins
David Fincher - The Curious Case of Benjamin Button
Ron Howard - Frost/Nixon
Gus Van Sant - Milk
Stephen Daldry - The Reader
Danny Boyle - Slumdog Millionaire

Er ekki í vafa um að Boyle vinnur óskarinn. Slumdog Millionaire er traust að öllu leyti og leikstjórann sem setti hana saman og gerði hana svo yndislega á að heiðra. Einfalt mál.


Leikari í aðalhlutverki
Richard Jenkins - The Visitor
Frank Langella - Frost/Nixon
Sean Penn - Milk
Brad Pitt - The Curious Case of Benjamin Button
Mickey Rourke - The Wrestler

Sean Penn og Mickey Rourke berjast um sigurinn í þessum flokki. Endurkoma Rourke er stórmerkileg og hann á sannkallaðan leiksigur í sinni rullu. Penn túlkar Harvey Milk af mikilli innlifun og snilld og á besta leik sinn síðan í Mystic River. Frank Langella er stórfenglegur í hlutverki Nixons forseta - túlkar hann bæði sem skúrk og fórnarlamb innri flækja. Brad Pitt á túlkun ferilsins í frábærri rullu. Vonast eftir því að Rourke vinni en hallast að því að Penn taki þetta.


Leikkona í aðalhlutverki
Anne Hathaway - Rachel Getting Married
Angelina Jolie - Changeling
Melissa Leo - Frozen River
Meryl Streep - Doubt
Kate Winslet - The Reader

Mér finnst blasa við að Kate Winslet vinni óskarinn. Fimm sinnum hefur hún tapað á óskarshátíð og oftast nær verðskuldað að sigra. Hennar tími er kominn. Ef hún tapar er ein ástæðan sú að myndin er mjög umdeild. Væri vissulega gaman að sjá Hathaway vinna, enda átti hún stórleik, og Meryl Streep, sem hefur ekki unnið óskar í 26 ár og hefur verið tilnefnd oftast allra leikara. En þetta er árið hennar Winslet.


Leikari í aukahlutverki
Josh Brolin - Milk
Robert Downey Jr. - Tropic Thunder
Philip Seymour Hoffman - Doubt
Heath Ledger - The Dark Knight
Michael Shannon - Revolutionary Road

Engin spurning. Heath Ledger vinnur óskarinn. Hann átti stórleik í hlutverki Jókersins í The Dark Knight og verðskuldar að sigra, enda að mínu mati ein besta leikframmistaða áratugarins.


Leikkona í aukahlutverki
Amy Adams - Doubt
Penélope Cruz - Vicky Cristina Barcelona
Viola Davis - Doubt
Taraji P. Henson - The Curious Case of Benjamin Button
Marisa Tomei - The Wrestler

Erfiðast að spá um úrslit í þessum flokki. Mér finnst Penelope Cruz verðskulda mest sigur, enda stórglæsileg í sinni mynd og var sigurstrangleg fyrir nokkrum árum fyrir túlkun sína í Volver. Viola Davis var hinsvegar frábær í Doubt og Amy Adams átti stórleik í sömu mynd ennfremur. Henson var yndisleg í BB. Held að þetta verði árið hennar Cruz.


Þrátt fyrir að engin sé sjónvarpsútsendingin vona ég að þeir sem geta horft og eins sem skanna netið í staðinn skemmti sér vel. Sendi hinsvegar skammarkveðjur til Stöðvar 2 fyrir að úthýsa keppninni!

Fróðleikur um Óskarsverðlaunin - samantekt SFS 2008

Óskarinn afhentur í kvöld

Dýrkeyptur slagur - sjálfstæðið í pólitík

Slagurinn um annað sætið í prófkjöri Sjálfstæðisflokksins í Reykjavík árið 2006, þar sem Björn Bjarnason og Guðlaugur Þór Þórðarson tókust á, verður eflaust lengi í minnum hafður. Ekki aðeins vegna þess að öllum áróðursbrögðum var beitt heldur hversu dýr hann var. Þau átök settu að mínu mati ný viðmið í peningaeyðslu í baráttu fyrir leiðtogasæti á framboðslista. Þessi átök kölluðu fram margfrægar átakalínur innan Sjálfstæðisflokksins sem að mestu höfðu fram að því tekist á innan Heimdallar, átakalínur sem höfðu ekki verið áberandi í Reykjavík í formannstíð Davíðs Oddssonar.

Greinilegt er á skrifum Björns Bjarnasonar í dag að hann telur að fjársterkir aðilar, sem var í nöp við hann eftir margfræg mál, hafi veitt keppinaut hans í prófkjörinu fjárstuðning og verið víðtækir bakhjarlar hans. Björn hefur sjálfur ekki tjáð sig opinberlega að ráði um þessi átök og helstu lykilmálefni hans, umfram það að gera upp úrslitin á yfirborðinu eftir prófkjörið. Nú hefur það breyst og greinilega má skilja Björn þannig að ekki hafi öll sú prófkjörssaga verið skráð enn af hans hálfu.

Eðlilegt er að velta fyrir sér þessu máli og hugleiða hverjir voru bakhjarlar framboðs sem vann af slíkum krafti, sem eiginlega er ekki dæmi um áður í íslenskum stjórnmálum. Þeir tímar eiga að vera liðnir að hægt sé að dæla peningum í prófkjörs- og kosningasjóði yfir viss mörk án þess að þurfa að gefa þau upp opinberlega. Laumuspilið um slíkt á að heyra sögunni til og þarf að taka á því.

Ég ætla að vona að prófkjörin í aðdraganda þingkosninganna 2007 hafi markað endalok peningaausturs manna utan úr bæ til stjórnmálamanna, sem bindur í raun endalok á þá tilburði að þeir séu í og með keyptir. Enginn vafi á að leika yfir verkum manna og því á allt bókhald prófkjörsframbjóðenda að verða lagt fram og til að sýna að þeir séu ekki háðir einhverjum.

Enginn lagt meira á sig fyrir sæti á lista en Guðlaugur Þór

Fyrir hverja er Cosser leppur í Moggakaupum?

Flest bendir nú til þess að lítt þekktur Ástrali, Steve Cosser, sé að fara að eignast Morgunblaðið. Mér finnst eðlilegt að velta því fyrir sér hvort þessi maður sé ekki leppur. Því ætti Ástrali að kaupa gjaldþrota íslenskt blað, eða altént blað í miklum rekstrarerfiðleikum? Hvaða tækifæri sér hann í því að kaupa eitt elsta og virtasta blað landsins, sérstaklega eftir að hafa gengið í gegnum mikinn öldudal. Mér finnst eiginlega blasa við að einhver af útrásarvíkingunum sé að nota nafn hans til að eignast blaðið.

Ætla menn í fjölmiðlabransanum ekki að rekja þessa áströlsku slóð til enda? Eða þorir því enginn. Hvaða hagsmuna er þessi maður að gæta og hverja er hann að fronta?

Cosser ræðir við Fréttablaðsmenn

Skelfilegur bandarískur raunveruleiki

Dapurlegra er en orð fá lýst að lesa fréttir af því að bandarískur strákur hafi ákveðið að drepa ófríska sambýliskonu pabba síns, að því er virðist að tilefnislausu. Þó að bandarískt samfélag sé að mörgu leyti óútreiknanlegt er þetta svo kaldrifjaður verknaður að það er ekki nema von að spurt sé hvernig að börn komist í skotvopn með þessum hætti og brenglist svona gjörsamlega.

Þetta mál minnir á mörg þekkt af þessu tagi í bandarísku samfélagi þar sem hin fullkomna fjölskylda býr í flottu hverfi en eitthvað er þar stórlega að. Erfitt er að fá svör við stóru spurningum þessa máls. Fyrstu viðbrögðin verða þó eðlilega undrun. Þó bandarískt samfélag sé óútreiknanlegt og kaldrifjað hlýtur þetta að teljast merki um veikar stoðir samfélags.

Er tölvuleikjaveruleikinn, þar sem hægt er að skjóta niður fólk endalaust, og kuldalegt efni þar sem morð og óhugnaður er aðalefnið að hafa slík áhrif á ungt fólk að það geti verið svo kaldrifjað að slátra sínum nánustu, jafnvel algjörlega af tilefnislausu? Ekki nema von að spurt sé.

Rætt hefur verið mörgum sinnum á undanförnum árum um skotvopnaeign í Bandaríkjunum; hversu auðveldlega ungt fólk geti komist í skotvopn og misst algjörlega stjórn á sér; nægir þar að hugsa til fjöldamorðanna í bandarískum skólum. Við höfum séð slíkar árásir hér á Norðurlöndum.

Erfitt er að finna einhverja eina töfralausn. Ein þeirra er þó að endurskoða byssulög og herða viðurlög til muna en það er ekki ein gullin töfralausn, enda hefur sannast að sé nógu kaldrifjaður vilji að baki þess að gera slíkt og hugurinn að baki er brenglaður getur fátt stöðvað hann.

En þegar að ellefu ára gamalt barn getur framið slíkan verknað og hafa aðgang að vopnum er eðlilegt að spurningin sé hvað sé eiginlega að gerast. Hvar er samfélagið að bresta?

Vonandi leggjast Bandaríkjamenn nú í alvöru pælingar um skotvopnavandann og hvað sé að gerast í þeirra samfélagi.

11 ára drengur ákærður fyrir morð

Vinstrimenn hættir að mótmæla

Greinilegt er að mótmælin á Austurvelli eru að fjara út. Aðeins 200 mættir til að taka þátt og tjá sig um stöðuna í samfélaginu. Við blasir að vinstrimennirnir sem leiddu mótmælin hafa hætt að taka þátt og tjá sig eftir að þeir komust til valda í hreinni vinstristjórn. Eftir þrjár vikur við völd hefur þó sú stjórn ekki gert neitt að ráði. Hvar eru hugmyndir hennar í efnahagsmálum og hvar er skjaldborgin um heimilin? Í gær var fjallað í kvöldfréttatíma Stöðvar 2 um hjón sem verða borin út úr húsi sínu á næstunni og gerð gjaldþrota. Fleiri dæmi eru um fólk sem eru að missa húsið sitt. Ekkert gerist.

Æ betur sést að mótmælin voru aðeins valdaplott hjá vinstrimönnum. Um leið og þeir náðu völdum dóu mótmælin. Þau snerust ekki um neitt nema það að tryggja eigin stöðu og komast til valda. Nú eru vinstriflokkarnir meira að segja farnir að gæla við að fresta þingkosningunum í vor. Stólarnir eru víst mjög notalegir. En eitthvað er farið að kárna gamanið í stjórninni enda sakar formaður Framsóknarflokksins Samfylkingarmenn um aðför að sér í blöðum í dag. Hann mun væntanlega tryggja kjördaginn í sessi. Ef vinstrimenn réðu einir yrðu engar kosningar strax.

En ég velti samt fyrir mér þessum mótmælum. Hvað stendur eftir að þeim loknum? Aldrei var þeim beint að forseta útrásarvíkinganna sem situr enn á sínum stóli þrátt fyrir afglöp sem forseti allra landsmanna og alvarleg mistök í erlendum fjölmiðlum. Mótmælin teljast varla trúverðug í ljósi þess lengur.

Tuttugasti útifundurinn

29 í prófkjörið í Reykjavík - öflugir kandidatar

Ég er mjög ánægður með það hversu margir frambjóðendur verða í prófkjöri Sjálfstæðisflokksins í Reykjavík eftir tæpan mánuð. 29 manns hafa gefið kost á sér og augljóst að mikil barátta verður um efstu sætin, enda gefa þrír þingmenn í forystusveitinni ekki kost á sér til endurkjörs, þar af forystumenn í flokknum í tæpa tvo áratugi, þeir Geir H. Haarde, formaður Sjálfstæðisflokksins og fyrrverandi forsætisráðherra, og Björn Bjarnason, fyrrverandi dóms- og menntamálaráðherra, auk Guðfinnu Bjarnadóttur, sem kom ný inn í prófkjöri haustið 2006 og varð forystukonan í framboði í borginni í stað Sólveigar Pétursdóttur.

Þegar litið er yfir hópinn finnst mér sérstaklega ánægjulegt að sjá að Guðrún Inga Ingólfsdóttir, vinkona mín úr flokksstarfinu, einkum innan SUS í denn, gefur kost á sér í framboð og er á heimleið frá Boston. Mér finnst hún mjög sterkur frambjóðandi og tel að það væri sterkt fyrir flokksmenn að velja hana ofarlega á lista. Ólöf Nordal, vinkona mín úr kjördæmastarfinu hér í Norðausturkjördæmi, er farin suður í framboð og ég bind miklar vonir við að hún nái sæti ofarlega á lista í borginni, enda svo sannarlega mjög traustur valkostur.

Auk þess eru þarna forystumenn úr ungliðastarfinu á undanförnum árum og góðir vinir, Þórlindur Kjartansson og Erla Ósk Ásgeirsdóttir, auk Valdimars Agnars Valdimarssonar, en við höfum þekkst mjög lengi og vorum saman í stjórn SUS um tíma. Svo er auðvitað ekki síður gaman að sjá að Sigga Andersen sækist eftir sæti ofarlega á lista og Siggi Kári ætlar sér stóra hluti, sem eðlilegt er. Pétur Blöndal kom flestum á óvart með að halda áfram og fróðlegt að sjá hvernig honum gengur ásamt öðrum sitjandi þingmönnum.

Krafan um endurnýjun verður væntanlega mikil og því verður helst fylgst með hvernig sitjandi þingmenn koma út úr þessu prófkjöri. Þrír þingmenn, allir ofarlega á lista síðast, víkja og fróðlegt að sjá hvort sitjandi þingmenn færast upp eða aðrir blanda sér í slaginn. Nú er Jón Magnússon aftur kominn heim, eins og segja má svosem, enda var hann formaður Heimdallar í tvö ár og formaður SUS í fjögur ár, forveri Geirs H. Haarde á þeim stóli.

Var reyndar mest hissa á að Ingi Björn Albertsson færi í framboð, en hann fór af þingi fyrir fjórtán árum en kom þangað inn fyrst í framboði föður síns Alberts Guðmundssonar, Borgaraflokknum, árið 1987. Svo er auðvitað svolítið skondið að sjá t.d. Guffa bílasala þarna. Einhverjir gárungar munu segja að það sé merki um lélega tíð í bílabransanum þegar bílasalar fara í framboð og vilja komast í þingsæti.

Í heildina er þetta góður hópur frambjóðenda og engu að kvíða með framtíðina. Verður gaman að fylgjast með hvernig þetta fer.

Geir gefur ekki kost á sér

Eitrað fyrir Árna Johnsen

Mjög alvarlegt er að grunur sé um að eitrað hafi verið fyrir Árna Johnsen, alþingismanni, án þess að hafi orðið lögreglumál. Slíkt þarf að fara rétta leið í rannsóknarferli og undarlegt að slíkt hafi í raun ekki verið gert. Þó fólk sé ósammála Árna Johnsen um einhverja hluti í pólitísku starfi eða hvað varðar fortíð hans er þetta hreint manndrápstilraun ef rétt reynist og undarlegt að það hafi ekki orðið opinbert fyrr.

DV: Eitrað fyrir Árna Johnsen

Líkamsárásir og einelti í FSU - skuggaleg þróun

Ekki er hægt að segja að síendurteknar árásir nokkurra nemenda á samnemendur í Fjölbrautaskóla Suðurlands sé góð kynning á skólanum, starfinu þar innanhúss eða yfirstjórninni þar. Á örfáum dögum höfum við heyrt af þremur slíkum málum, ráðist að nemanda með kúbeini, sparkað í höfuð og lamið í höfuð með grjóti.

Algjörlega ólíðandi er að slíkt viðgangist á skólalóð þar sem nemendur eiga að geta sinnt sínu námi án þess að eiga á hættu árás eða aðkast, sem getur leitt til varanlegs skaða á sál og líkama. Í raun eiga að vera einhverjar verklagsreglur og skýr vinnubrögð til staðar í svona málum, enda á að vernda rétt nemenda.

Svo er auðvitað annað að þetta er auðvitað lögreglumál og á að láta slíkt verða víti til varnaðar, taka hart á því bæði innan skólans sem utan. Þetta á ekki að líðast. Gróft ofbeldi og einelti er partur af því sem vinna á gegn í skólum landsins með öllum tiltækum ráðum.

Ráðist með grjóti á 16 ára pilt í FSu á Selfossi

Pétur heldur áfram - slagur um annað sætið

Ég verð að viðurkenna að ég taldi allt þar til í dag að Pétur H. Blöndal myndi draga sig í hlé og láta af þingmennsku í vor. Kjaftasögurnar voru nær allar samhljóma í þá átt. Enn og aftur kemur hann á óvart og tilkynnir framboð þegar flestir áttu von á að hann myndi hætta. Ég veit að Pétur varð fyrir vonbrigðum með úrslit síðasta prófkjörs enda datt hann niður um nokkur sæti og ég átti eiginlega ekki von á að hann myndi skella sér í slaginn vegna þess og fara aftur í prófkjör.

Slagurinn um fyrsta og annað sætið verður ansi áhugaverður hjá sjálfstæðismönnum í Reykjavík. Augljóst er að Illugi Gunnarsson og Guðlaugur Þór berjast um fyrsta sætið og um annað sætið berjast Ólöf Nordal, Pétur, Jórunn Frímannsdóttir og Sigríður Andersen væntanlega, þó hún nefni ekki beint hvaða sæti hún vilji. Enn eru þó einhverjir ekki búnir að gefa sig upp en ljóst er að hart verður barist um toppsætin, enda nokkur að losna með brotthvarfi Björns, Geirs og Guðfinnu.

Verður spennandi að sjá frambjóðendahópinn á morgun. Sjálfur veit ég af nokkrum nöfnum til viðbótar sem enn eru ekki opinber og hlakka til að sjá hvort einhver önnur bætist við.

Pétur Blöndal sækist eftir 2. sæti

Lúðvík hættir í stjórnmálum - uppstokkun í SF

Ég verð að viðurkenna að ákvörðun Lúðvíks Bergvinssonar um að hætta í stjórnmálum kom mér á óvart að sumu leyti, enda taldi ég að hann myndi frekar fara í framboð í Kraganum en hætta alveg í pólitík. Ljóst varð í raun eftir ákvörðun um að kona og karl verði að vera í tveim efstu sætum í Suðrinu að hann færi varla í framboð þar og tæki annan slag við Björgvin G. Sigurðsson. Kannski má segja að pólitísk örlög Lúðvíks hafi í raun ráðist þegar hann tapaði fyrir Björgvini í prófkjörinu haustið 2006 og missti af tækifærinu að leiða Samfylkinguna í Suðrinu, eftir að hafa áður tapað leiðtogaslag fyrir Margréti Frímannsdóttur árið 2002.

Samt kom ákvörðun Gunnars Svavarssonar, kjördæmaleiðtoga Samfylkingarinnar í Kraganum, um að hætta í pólitík mér mun meira á óvart, enda hefur hann setið á þingi í innan við tvö ár og í raun ekki reynt mikið á hann sem alvöru foringjaefni, þó hann hafi vissulega staðið vaktina í fjárlaganefndinni á þessu kjörtímabili og stundum við mjög erfiðar aðstæður. Gunnar fékk ekki ráðherrastól eftir kosningarnar 2007 og varð að horfa upp á þriðja mann á lista, sem hafði tapað leiðtogaslag við hann, verða ráðherra vegna kynjakvóta.

En Lúðvík hefur setið á þingi í fjórtán ár og átt að sumu leyti merkilegan stjórnmálaferil. Honum tókst að verða fyrsti maðurinn sem náði kjöri fyrir Alþýðuflokkinn í gamla Suðurlandskjördæmi frá því Magnús H. Magnússon, fyrrverandi bæjarstjóri í Vestmannaeyjum, sat á þingi, nokkuð sem Árna Gunnarssyni mistókst árið 1991. Lúðvík átti að mörgu leyti góð ár framan af en hefur tapað nokkrum mikilvægum pólitískum átökum að undanförnu; tapaði leiðtogaslag fyrir Margréti og Björgvini og varaformannsslag árið 2005.

Sumir tala um að stefni í litlar pólitískar uppstokkanir og breytingar. Flestir flokkar opna sín mál í prófkjörum og sumir gefa sér að flokksmenn samþykki sömu listana og allt sama fólkið aftur í frontinn. Við megum þó ekki gleyma því að flokksmenn eru í mörgum tilfellum ósáttir og þeir geta vel staðið fyrir breytingum og fellt þingmenn ef þeir eru ósáttir. Við eigum eftir að sjá hversu öflugur sá tónn verður í prófkjörunum en við getum alveg búist við því að tekið verði duglega til.

Lúðvík gefur ekki kost á sér

Einfaldleikinn sigrar maskínuna í Eurovision

Mér finnst það svolítið skondið að lögin sem mest voru prómóteruð af einhverjum pr-sérfræðingum og hafin upp til skýjanna með ofspilun hafa tapað Eurovision-keppninni tvö ár í röð. Þetta gerðist í fyrra með lag Merzedes Club og aftur nú með Elektru. Reyndar er merkilegast af öllu við keppnina í ár að ballaða, mjög einföld í sniðum og látlaus, vinni keppnina umfram þau sem mest voru kynnt og voru í einhverju svokölluðu Eurovision-formi.

Þrátt fyrir að reynt hafi verið að höfða til ungra sms-kjósenda tókst markaðssetningin einfaldlega ekki, einhverra hluta vegna. Einhverjir myndu kannski segja að þessi blokk hafi einfaldlega skipst á Elektru og Ingó Idol og það tryggt Jóhönnu Guðrúnu sigur. Ég hallast þó að því að einfaldleikinn hafi einfaldlega sigrað pr-maskínuna sem sett var upp með lagi Elektru.

Elektra miklu vinsælli en Jóhanna?

Tryggvi Þór tekur þátt í prófkjörinu í Norðaustri

Mér líst mjög vel á þá ákvörðun Tryggva Þórs Herbertssonar, prófessors, að taka þátt í prófkjöri okkar sjálfstæðismanna hér í Norðausturkjördæmi og gefa kost á sér í forystusveit flokksins hér. Þörf er á traustu og öflugu fólki á þing núna og gott að sterkir kandidatar gefi kost á sér við þær aðstæður sem nú eru uppi.

Held að þetta verði spennandi prófkjör hjá okkur. Mesti slagurinn mun greinilega verða um annað sætið og ljóst að margir munu sækja að Arnbjörgu Sveinsdóttur, auk þess sem þriðja sætið er laust eftir að Ólöf Nordal ákvað að fara fram í Reykjavík.

Tryggvi Þór Herbertsson vill á þing

Ragnheiður Elín í leiðtogaframboð í Suðrinu

Ég er mjög ánægður með þá ákvörðun Ragnheiðar Elínar Árnadóttur að gefa kost á sér í leiðtogaframboð hjá Sjálfstæðisflokknum í Suðurkjördæmi. Mikilvægt er að stokka duglega upp í forystusveitinni hjá flokknum þar og fá nýtt fólk í framboð. Ragnheiður Elín er mjög öflug og traust kona, góður frambjóðandi til forystu fyrir flokkinn á sínum gömlu heimaslóðum og ég ætla rétt að vona að flokksmenn muni velja hana til forystu og taka til í sínum málum.

Ragnheiður stefnir á 1. sætið í Suðurkjördæmi

Heiðarleg viðurkenning hjá Birni Jörundi

Björn Jörundur Friðbjörnsson gerir rétt í því að viðurkenna alvarleg mistök sín með viðskiptum við dópsala. Þetta er heiðarlegt og rétt skref, enda ekki hægt að tala í kringum þetta mál eins og staðan er orðin. Þetta er skaðlegt mál og mjög vandræðalegt fyrir hann, enda er hann sem tónlistarmaður virtur fyrir sín störf og þátttaka hans í einum vinsælasta sjónvarpsþætti landsins setur hann á vissan stall í samfélaginu og hann á að vera meðvitaður um að hann verður að hafa trausta ímynd í framkomunni þar.

Stöð 2 þarf nú að ákveða hvernig ímynd Idol eigi að vera í kjölfarið. Þetta er vont mál og erfitt fyrir Stöðina, enda getur varla verið gott fyrir orðspor þáttarins að blandast í þetta mál vegna alvarlegra mistaka eins þáttarstjórnandans. Þegar vinir söngvarans og samstarfsfélagar eru farnir að gagnrýna veru hans í þættinum er eðlilegt að stöðin hugleiði hvernig þeir vilja að þátturinn líti út og hugleiði ímyndarmálin, ekki aðeins frá sinni hálfu heldur eins af andlitum þáttarins.

Björn Jörundur viðurkennir mistök

Verður Björn Jörundur rekinn úr Idolinu?

Enginn vafi leikur á því að atburðarás dagsins í fíkniefnamálinu í dag er áfall fyrir Stöð 2 og Björn Jörund Friðbjörnsson. Varla er hægt að sjá nokkra atburðarás þess efnis að hann haldi áfram sem dómari í vinsælum sjónvarpsþætti og verði kynntur til leiks á þeim vettvangi á næstu vikum eftir slíkan skell. Varla þarf sérfræðing til að sjá að hann talar um fíkniefnaviðskipti, enda hefur sjálfur Bubbi Morthens, sem valdi Björn Jörund sem dómari í þáttinn sinn á síðasta ári, talað hreint út um hvað Björn Jörundur meinti.

Stöð 2 hlýtur að hugsa um ímynd sína og trúverðugleika þáttarins þegar þeir hugleiða næstu skref í þessu leiðindamáli.

Bíður yfirlýsinga frá Idol-dómara