Mun fólk fara að eyðileggja eignir sínar?

Mjög dapurlegt er að húseigandi á Álftanesi hafi valið þá leið að eyðileggja húsið sitt eftir að hann missti það. Þetta er táknræn aðgerð fyrst og fremst - leið manns sem hefur misst eign sína og vill ekki una öðrum að eignast hana. Hversu margir eru annars í þessari aðstöðu? Annað hvort að missa húseign sína eða sér ekki fram á að geta haldið henni mikið lengur? Væntanlega mjög margir.

Hversu margir munu taka sömu afstöðu, frekar eyðileggja sem mest þar en leyfa öðrum að eignast hana? Kuldalegt í meira lagi. En svona er víst íslenskur raunveruleiki þessa dagana, þegar fólk er að missa eign sína og sér ekki fram á annað en verða gert upp og missa allt út úr höndunum.

Eyðilagði íbúðarhúsið

Bjöllusauður á Alþingi

Orðið bjöllusauður fékk nýja merkingu á Alþingi í dag með vinnubrögðum forseta Alþingis. Mér finnst eðlilegt að þingforseti hafi stjórn á fundum þingsins og noti bjölluna til að minna ræðumenn á tímamörk en ég tel að Ásta Ragnheiður Jóhannesdóttir hafi farið yfir öll mörk með starfsháttum sínum.

Reyndar hefur þessi þingforseti látið stórundarlega síðan hún tók við embætti og farið yfir strikið í smámunasömum athugasemdum um starfsheiti þingmanna og ráðherra og verið þar með formlegustu þingforsetum sem setið hafa áratugum saman.

Þingið þarf á virðulegum þingforseta sem sættir ólík sjónarmið og stendur vörð um virðingu þingsins mun frekar en hann verði hringjarinn í Notre Dame eða hálfgerður bjöllusauður.

Óásættanleg framkoma forsetans

Aumingjaskapur ríkisstjórnarinnar

Stóra niðurstaðan í öllum fundahöldum stjórnvalda um niðurskurð og stöðu ríkisfjármála er ekta vinstrisinnuð. Ekki verður lagt í niðurskurð af neinu tagi heldur verða skattar nær einvörðungu hækkaðir upp úr öllu valdi. Ekki þarf að efast um að allar hækkanirnar fara beint út í vísitölu neysluverðs og hringavitleysan verður algjör.

Þetta er algjör aumingjaskapur, algjör uppgjöf í verkefninu framundan. Er betra að lengja vandann og þora ekki að takast á við verkefnið? Hversu miklar byrðar geta heimilin í landinu tekið á sig í viðbót við allt annað?

Skattahækkanir úr ríkisstjórn

Gunnar víkur af bæjarstjórastóli

Gunnar Birgisson hefur nú tekið hagsmuni bæjarbúa og sjálfstæðismanna í Kópavogi fram yfir sína eigin með því að víkja sem bæjarstjóri. Örlögin voru ráðin í raun eftir fund framsóknarmanna á fimmtudag. Þar var ljóst að Framsókn gæti ekki stutt Gunnar lengur án þess að sitja uppi með leiðindamál tengd Frjálsri miðlun á kosningavetri. Þeir hefðu átt erfitt með að styðja Gunnar áfram með þau mál ókláruð í kjölfar skýrslu Deloitte.

Nú er það verkefni Sjálfstæðisflokksins í Kópavogi að velja nýjan bæjarstjóra og velja leiðtoga flokksins án prófkjörs og sveitarstjórnarkosninga. Vel hefur komið í ljós að engin afgerandi samstaða er um leiðtoga úr bæjarfulltrúahópnum. Fróðlegt verður að sjá hvort niðurstaðan verði sú að einstaklingur utan bæjarstjórnar taki við bæjarstjórastólnum eða hvort samstaða náist, þrátt fyrir deilur bak við tjöldin síðustu dagana.

Gunnar hættir sem bæjarstjóri

Sterk staða Gunnars - verður meirihluta bjargað?

Stóra niðurstaða fulltrúaráðsfundar Sjálfstæðisflokksins í Kópavogi er hversu gríðarlega sterk staða Gunnars Birgissonar er í flokkskjarnanum. Hann gnæfir þar yfir og augljóst að erfitt verður að ná samstöðu um eftirmann, ef Gunnar víkur ekki sjálfviljugur af stóli, án prófkjörs eða kosningar. Hann hefur reyndar afgerandi stöðu sem forystumaður í bæjarmálunum í Kópavogi sama hversu hefur verið sótt að honum með skýrslum eða árásum andstæðinga hans.

Vandamál Sjálfstæðisflokksins í Kópavogi er að örlög Gunnars ráðast hjá samstarfsflokknum. Muni Framsóknarflokkurinn gera honum að hætta, eins og útlit var fyrir nær alla síðustu viku, er honum ekki sætt áfram og þá er vandi Sjálfstæðisflokksins að leysa úr því áður en þeir missa atburðarásina úr hendi sér. Fundurinn með leiðtoga Framsóknar er að reyna til þrautar að leysa málið með einhverjum hætti án þess að það verði að velja nýjan leiðtoga.

Nú reynir væntanlega á allan styrkleika og allt afl Gunnars Birgissonar í samningaviðræðum við samstarfsflokk til tveggja áratuga. Ef eitthvað eitt hefur komið í ljós, fyrir utan að nýr leiðtogi er í Framsókn sem þarf að búa sér til stöðu sem hentar kannski ekki Gunnari Birgissyni, er að þreyta er komin í samstarfið. Gunnar Birgisson þarf að berjast fyrir sínu og væntanlega verður það erfiðara en að þjappa Sjálfstæðisflokknum að baki sér.

En nú reynir á hversu sterkt lím heldur saman þessum þaulsetna og árangursríka meirihluta sem hefur ráðið í Kópavogi, allan þann tíma með Gunnar Birgisson sem risann í Kópavogi, allt frá árinu 1990.

Falið að ræða við Framsókn

Mun Gunnar sitja áfram á bæjarstjórastóli?

Eins og staðan er í Kópavogi yrði ég ekki hissa á því að niðurstaða sjálfstæðismanna í Kópavogi yrði að standa og falla með leiðtoganum Gunnari Birgissyni. Hann færi í veikindaleyfi og myndi bíða og sjá til. Látið yrði reyna á stöðu hans síðar, hver vígstaðan sé í raun. Lögfræðiálit Lex gegn úrskurði Deloitte gefur til kynna að taka eigi baráttuna fyrir Gunnar.

Svo verður að ráðast hvort sjálfstæðismenn ná stuðningi við hann áfram á bæjarstjórastóli fram að næstu kosningum. Eitt hefur komið í ljós síðustu daga; samstaða næst ekki um annan bæjarfulltrúa í stólinn.

Er á hólminn kemur er erfitt að velja annan til verksins nema samstaðan sé algjör. Efast ekki um að Gunnar hefur fullan stuðning fulltrúaráðsins.

En þar ræðst framtíðin. Ekki verður hróflað við Gunnari eða valinn nýr leiðtogi nema fulltrúaráðið staðfesti þann gjörning.

Sjálfstæðismenn enn á fundi

Samstaða næst ekki um eftirmann Gunnars

Orðrómur um að Gunnar Birgisson reyni að sitja áfram sem bæjarstjóri í Kópavogi gefur til kynna að samstaða hafi ekki náðst meðal bæjarfulltrúa um að einn þeirra taki við af Gunnari. Greinilegt er að baráttan milli Gunnsteins Sigurðssonar og Ármanns Kr. Ólafssonar hefur orðið það harðvítug og erfið að ekki sé hægt að velja á milli þeirra.

Miðað við úrslitakosti Framsóknarflokksins og afstöðu minnihlutans um að Gunnar víki er hættuspil hjá sjálfstæðismönnum að skipta ekki um bæjarstjóra þegar þeir hafa til þess tækifæri. Vandséð er hvernig Framsóknarflokkurinn geti bakkað úr þessari atburðarás og sætt sig við að Gunnar sitji áfram eftir stórar yfirlýsingar.

Boltinn er hjá sjálfstæðismönnum í Kópavogi. Auðveldasta niðurstaðan fyrir þá er að lýsa yfir stuðningi við Gunnar þar sem engin samstaða næst um annan en hann. En þá eiga þeir á hættu að dæma sig til minnihlutavistar og önnur framboð myndi meirihluta. Sjálfstæðismenn hljóta að geta landað þessu máli traust.

Vilja ekki að Gunnar hætti

Einum of langt gengið

Margt er sagt og gert í hita leiksins í íþróttum. Þetta atvik á KR-vellinum er til skammar og ljótt fyrir sportið. Mikilvægt er að menn hagi sér almennilega og kunni að taka ósigri, ráðist ekki að sigurvegurunum. Vissulega er sumum erfitt að taka ósigri, en í ósigri kemur hið sanna eðli hvers einstaklings fram og hvernig hann vinnur undir álagi.

Flösku grýtt í KR-inga

Fjármálaeftirlitið skoðar hringekju Sigurjóns

Mikið var að Fjármálaeftirlitið vaknaði og hóf rannsókn á hringekjusukki Sigurjóns Þ. Árnasonar. Í þeim efnum þurfti skrif hjá bloggurum og að birta mikilvæg gögn til að sjálft Fjármálaeftirlitið tæki til starfa og færi í verkið. Þeir bloggarar sem vöktu fyrst máls á þessu sukki og svínaríi, siðlausum vinnubrögðum, eiga hrós skilið.

Svona þarf að vinna. Koma málum í dagsljósið og rekja slóðina - kanna þau svo tekið verði á málinu. Landsbankinn gerir hið eina í stöðunni og biður um rannsókn. Farið verði yfir svikamylluna og hvernig var unnið.

Samt þarf að svara mörgum spurningum. Þær verður að fá fram. Hvort sem það verður sótt inn í Nýja landsbankann eða þá sem véluðu um sukkið.

Máli Sigurjóns vísað til FME

Var kúlulánið til Sigurjóns veitt úr séreignasjóði?

Eftir því sem meira er pískrað um tugmilljóna kúlulán til Sigurjóns Árnasonar, fyrrverandi bankastjóra Landsbankans, verður málið óhuggulegra og dularfyllra. Fregnir herma nú að lánið sé úr séreignalífeyrissjóði í vörslu Landsbankans en ekki einkalífeyrissjóði. Sjóðsfélagarnir eru vel á þriðja þúsund en ekki Sigurjón einn. 

Ekki aðeins vekur það athygli heldur og mun frekar vaxtakjörin. Þetta kemur fjarri því heim og saman við yfirlýsingar Sigurðar G. Guðjónssonar í gær um að þetta væri einkalífeyrissjóður Sigurjóns sjálfs. Varla passar það heim og saman þegar ljóst er að yfir 2500 manns hafa greitt í hann.

Fullyrt er á sumum vefum að lánin séu tvö, samtals 70 milljónir. Þessar kjaftasögur eru alvarlegt mál. Þeir verða að svara fyrir þær. Þeir 2500 einstaklingar sem borguðu í þennan sjóð hljóta sérstaklega að kalla eftir svörum.

 

Hver verður næsti bæjarstjóri í Kópavogi?

Mikið verkefni bíður sjálfstæðismanna í Kópavogi þegar velja þarf eftirmann Gunnars Inga Birgissonar sem bæjarstjóri og leiðtogi Sjálfstæðisflokksins í Kópavogi. Ekki koma margir til greina en þrjú nöfn standa þar væntanlega upp úr; bæjarfulltrúarnir Gunnsteinn Sigurðsson og Ármann Kr. Ólafsson og alþingismaðurinn Jón Gunnarsson, sem verið hefur formaður fulltrúaráðs sjálfstæðisfélaganna í Kópavogi.

Eigi úrslit prófkjörs að ráða er einsýnt að Gunnsteinn verði bæjarstjóri en á móti kemur að Ármann hefur verið bæði þingmaður og lengur bæjarfulltrúi en Gunnsteinn. Þetta er ákvörðun sem bæjarfulltrúahópurinn verður væntanlega að taka, en þeirra er að velja forystumann milli kosninga. Svo er auðvitað ekki óhugsandi að fleiri nöfn komi til greina eigi að velja bæjarstjóra úr hópi manna utan bæjarstjórnarflokksins.

Sé ekki full samstaða um nýjan leiðtoga er ekki óeðlilegt að virkja fulltrúaráðið til að kjósa nýjan leiðtoga og láta það taka ákvörðunina. Mikið vandaverk er að velja leiðtoga án prófkjörs. Úrslit prófkjörs hefur þar alltaf mikið að segja eigi ekki að virkja fulltrúaráðið. Mest um vert er að sjálfstæðismenn í Kópavogi velji þann forystumann sem þeir telja sterkastan og vænlegastan í baráttuna framundan.

Fundað um eftirmann Gunnars

Siðleysi Sigurjóns - loftfimleikar og kúlulán

Fáránleikinn tekur enn á sig nýja mynd þegar 40 milljóna kúlulánið, sem Sigurjón Þ. Árnason veitti sjálfum sér, verður opinbert. Þeir sem véluðu með útrásarvíkingunum og unnu á þeirra vakt voru snillingar í að setja á svið sjónhverfingar og láta ótrúlegustu hluti virka sem tæra snilld í ótrúlega langan tíma. Núna ofbýður þjóðinni sukkið og svínaríið. Hugsa sér að einhverjir hafi borið virðingu fyrir þessum mönnum hér áður fyrr.

Ekki er nóg með að Sigurjón hafi fengið lán hjá sjálfum sér heldur var það langt undir markaðsvöxtum. Þessi absúrd veruleiki sem við lifðum hér á Íslandi verður enn fáránlegri og undarlegri eftir því sem meira af vinnubrögðum þessara manna verða opinbert. Allri þjóðinni ofbýður vinnulagið og krafan er einföld: þetta verði gert upp heiðarlega og rétt. Reikningsskilin verða að eiga sér stað!

Hugsa sér svo að Landsbankinn undir stjórn þessa manns fékk viðurkenningu fyrir bestu ársskýrsluna. Það var í september 2008! Nokkrum vikum fyrir hrunið. Sjáið myndina. Þarna er viðskiptaráðherra Samfylkingarinnar, viðskiptaráðherrann sem svaf á vaktinni, með bankastjóranum - auðvitað brosir hann eins og einfeldningur.

Sigurjón lánaði sjálfum sér fé

Sigmundur Davíð styrkir pólitíska stöðu sína

Sigmundur Davíð Gunnlaugsson, formaður Framsóknarflokksins, hefur styrkt pólitíska stöðu sína mjög á síðustu vikum. Hann náði vopnum sínum í lokaviku kosningabaráttunnar með snarpri gagnrýni á ríkisstjórnina vegna leyndar um bankaskýrslurnar, sem enn eru lokaðar í dulkóðuðu herbergi hjá Steingrími J. (sú lýsing minnti frekar á kaldastríðsandrúmsloftið í gamalli James Bond-mynd en íslenskan veruleika) og tryggði flokknum kjördæmakjör í borgarkjördæmum og Kraganum.

Eftir að þing var sett hefur Sigmundur Davíð talað afgerandi og hvasst, ekki verið með tæpitungu og hik. Segja má að nýr Framsóknarflokkur hafi orðið til á vakt hans; æstur, einbeittur og orðhvatur. Við höfum ekki séð Framsóknarflokkinn í öðrum eins ham í þinginu áratugum saman. Ný forysta hefur stokkað hann algjörlega upp. Þingflokkurinn er líka alveg nýr. Aðeins þrír þingmenn höfðu þingreynslu áður, þar af aðeins einn setið í meira en áratug.

Stjórnarflokkarnir eiga líka erfitt með að tækla Framsókn og Sigmund Davíð, sérstaklega Steingrímur J. Honum hlýtur sérstaklega að líða illa, enda virðist Framsókn vera eins og VG var áður en þeir komust í ríkisstjórn. Sigmundur Davíð hefur tekið sér gamla sess Steingríms J. sem hinn orðhvati og afgerandi stjórnarandstæðingur sem markar sér sess á vígvellinum. Enda greinilegt að það er sótt til vinstri og reynt að ná vinstrafylginu aftur til baka.

Sigmundur Davíð hefur á nokkrum vikum stimplað sig til leiks. Hann átti um skeið erfitt með að marka sér stöðu og svo virtist fyrir kosningar sem hann hefði misst vopn sín. Honum tókst að ná meira fylgi en kannanir gáfu til kynna og bæta við fylgi frá afhroðinu 2007 - sækir nú fram á vinstrivæng og ætlar að ná í fylgi þar. Eflaust mun það takast með þessari taktík.

 

„Fjarar undan stjórninni"

Andstaðan við Evu Joly

Ég held að þeir sem bjuggu til spunann um að sjálfstæðismenn væru mest andvígir komu Evu Joly til landsins hafi orðið fyrir vonbrigðum þegar Sigurður G. Guðjónsson ritaði greinina sína gegn Joly í gærkvöldi. Seint verður Sigurður G. talinn sjálfstæðismaður eða hallast til hægri. Þvert á móti hefur hann verið mjög tengdur Samfylkingunni og öllum er ljóst hver tengsl Sigurðar við auðblokkirnar í landinu hafa verið.

Vissulega var það hentugt fyrir suma að reyna að telja öðrum trú um að hægrimenn væru mest ósáttir við Evu Joly. Staðreyndin er hinsvegar sú að Eva Joly var ráðin til verka af vinstrimönnum og hún notaði tækifærið og úthúðaði þeim opinberlega um daginn því starfsaðstaða hafi ekki verið tryggð fyrir hana og umgjörðin um starfið önnur en hún taldi sæmandi sér. Hún flengdi vinstristjórnina.

Ég hef það á tilfinningunni að Samfylkingin vilji ekkert heildaruppgjör á því sem gerðist í hruninu. Þeir hafa allavega ekki sýnt að þeir vilji að Eva Joly hafi fullt umboð til verka og starfsaðstöðu sem hún sóttist eftir. Grein Sigurðar G. er því viss varnarblokk fyrir augljósa aðila og vekur spurningar um hverjir séu ósáttastir við að hún sé að reyna að grafast fyrir um sannleikann í hruninu.

Málflutningur Joly gagnrýndur

Fáránleg krafa um brotthvarf Valtýs

Mér finnst krafan um að Valtýr Sigurðsson víki alfarið sem ríkissaksóknari fjarstæðukennd. Hann hefur sjálfur vikið sæti í öllum málum sem tengjast efnahagshruninu og lýst sig vanhæfan. Sá hluti málsins ætti að vera í góðum farvegi og mikilvægt að skipa þegar ríkissaksóknara varðandi þessi mál.

Eigi Valtýr að víkja alfarið úr embætti sínu þarf að sýna fram á brot hans í starfi eða alvarleg mistök. Engar forsendur eru fyrir því. Ekki hafa komið fram málefnalegar ástæður fyrir brotthvarfi hans. Eðlilegt er samt að hafa skoðanir á veru hans í embættinu. Ekkert að því að taka þá umræðu.

En þegar við bætist að hann hefur þegar vikið sæti er eðlilegt að undrast á hvaða leið umræðan er.

Valtýr vill ráða Evu Joly

Jónmundur nýr framkvæmdastjóri í Valhöll

Mér líst vel á þá ákvörðun forystu Sjálfstæðisflokksins að ráða Jónmund Guðmarsson, bæjarstjóra á Seltjarnarnesi, sem næsta framkvæmdastjóra flokksins. Jónmundur er traustur valkostur, vinnusamur og duglegur.

Framundan er mikil vinna fyrir flokksheildina og það skiptir öllu máli að yfir skrifstofunni í Valhöll sé einstaklingur sem kunni til verka og er tilbúinn í verkefnið.

Jónmundur framkvæmdastjóri Sjálfstæðisflokks

Örvænting í svipbrigðum Jóhönnu og Steingríms

Heldur er það nú raunalegt að fylgjast með Steingrími J. og Jóhönnu tala um Icesave-samkomulagið þar sem þau ætla að stóla á stjórnarandstöðuna til að koma því í gegnum þingið. Örvæntingin er algjör - þessi díll er þeim ekki fastur í hendi í eigin liðsheild, enda fjórir eða fimm þingmenn VG sem ætla að greiða atkvæði gegn því.

Nú á að biðla til Sjálfstæðisflokksins að bjarga þessari hrörlegu vinstristjórn frá háðuglegu falli. Sjálfstæðisflokkurinn á að greiða atkvæði gegn þessum samningi, enda er ekki samið um þetta á þeirra vakt. Vinstriflokkarnir verða að sitja uppi með þennan samning og taka afleiðingunum.

Ekki er nú mikið eftir af hugsjónastjórnmálamanninum Steingrími J. frá Gunnarsstöðum. Hann getur ekki litið beint upp og framan í myndavélina þegar hann talar um þennan samning. Fáir menn hafa misst meiri trúverðugleika á skemmri tíma en hann.

Er ekki spurt aðallega um sannfæringu þingmanna? Eða hvað? Voru ekki að berast sögur um að Steingrímur J, sem vildi víst forðum daga að hver og einn kysi eftir sannfæringu hafi hellt sér svo harkalega yfir Lilju Mósesdóttur að hún brast í grát?

Sjálfstæðismenn til bjargar

Brotthvarf Gunnars - hver verður nýr bæjarstjóri?

Mér finnst það virðingarvert að Gunnar Birgisson hafi ákveðið að taka hagsmuni Sjálfstæðisflokksins og Kópavogsbæjar fram fyrir sína eigin og fallist á að víkja af bæjarstjórastóli. Gunnar hefur leitt lista Sjálfstæðisflokksins í fimm kosningum í röð og hlotið fimm bæjarfulltrúa í þeim öllum. Hann skilur við gott starf í valdatíð flokkanna tveggja allt frá 1990, enda mikil og öflug uppbygging verið í Kópavogi allan þann tíma.

Ákvörðun Gunnars vekur spurningar um forystumál Sjálfstæðisflokksins í Kópavogi - eðlilega er spurt hver verði næsti bæjarstjóri og leiði flokkinn í næstu sveitarstjórnarkosningum. Við blasir að Gunnsteinn Sigurðsson og Ármann Kr. Ólafsson eru líklegastir til að taka við embættinu úr bæjarfulltrúahópnum. Gunnsteinn vann Ármann í kosningu um annað sætið á listanum fyrir síðustu kosningar.

Svo er auðvitað ekki óhugsandi að leitað verði út fyrir hópinn. Einn kosturinn er að Framsóknarflokkurinn fái bæjarstjórastólinn. Slík niðurstaða yrði samt nær óhugsandi einkum í ljósi þess að Framsókn galt afhroð í síðustu kosningum og hefur varla umboð til að taka við stjórninni. Eðlilegt sé að sjálfstæðismaður setjist í stólinn og klári kjörtímabilið.

Gunnar bauðst til að víkja

Gunnar Birgisson mun hætta sem bæjarstjóri

Mínar heimildir herma að Gunnar Ingi Birgisson, bæjarstjóri í Kópavogi, hafi ákveðið að hætta sem bæjarstjóri og bæjarfulltrúi Sjálfstæðisflokksins og kynni endalok stjórnmálaferils síns á næstu dögum. Hann muni láta af störfum bráðlega, væntanlega verði eftirmaður hans kjörinn á bæjarstjórnarfundi á þriðjudaginn í næstu viku. Þá muni Sjálfstæðisflokkurinn velja annan mann í stólinn og Margrét Björnsdóttir taka sæti í bæjarstjórn Kópavogs.

Þessi niðurstaða er rökrétt og eðlileg. Mikilvægt er fyrir Sjálfstæðisflokkinn í Kópavogi að horfa fram á veginn og gera upp leiðindamálið í tengslum við viðskipti bæjarins við Frjálsa miðlun. Gunnar varð að hugsa um heill og hag Sjálfstæðisflokksins og Kópavogsbæjar í þeim efnum og jákvætt muni svo fara.

Segist hafa stuðning flokksmanna

Mun Eva Joly drepa íslenska vinstribastarðinn?

Eva Joly er heldur betur búin að niðurlægja vinstristjórnina með yfirlýsingum sínum. Mun hún drepa  íslenska vinstribastarðinn? Flugeldasýning hennar hefur sýnt og sannað að þeir hafa ekkert gert með ráðleggingar hennar. Þetta var sýndarmennska - hefur sennilega átt að vera heilbrigðisvottorð fyrir vinstriflokkana inn í þingkosningar.

Nú kemur í ljós að þeir hafa ekki búið henni þá vinnuaðstöðu sem hún vildi og í raun aldrei viljað að hún tæki til. Hún var einfaldlega stoppuð í kerfisbákninu sem Steingrímur J. og Jóhanna hafa verið týnd í árum saman - enda bæði möppudýr par excellance.

Ég tel að vinstriflokkarnir hafi búist við allt öðru þegar þeir réðu Evu Joly til verksins en að hún myndi sparka svo eftirminnilega í þá og afhjúpa vanhæfi þeirra til að taka á vandanum.

Eva Joly er dínamítkassi