Dramatísk endalok hjá Björgólfi

Gjaldþrot Björgólfs Guðmundssonar er dramatískur endapunktur á brösóttum viðskiptaferli. Innan við ári eftir fall Landsbankans er veldi hans fallið og stendur ekki steinn yfir steini. Vissulega er Björgólfur einlægur og vandaður maður að mörgu leyti. En ég hef miklar efasemdir um hann sem bissnessmann eftir alla þessa hringekju sem við höfum verið í og fylgst með síðustu árin. Enda ekki óeðlilegt að hugleitt sé hvort leiðsögn hans hafi verið farsæl.

Þar var gamblað langt um efni fram og þeir sem tóku þar mestan þátt fóru langt fram úr sjálfum sér. Björgólfur er einn þeirra sem bera þar mikla ábyrgð. Björgólfur birtist eftir sem hinn einlægi baráttumaður gegn ósómanum, einum of seint. Afneitun hans var ekki trúverðug þá og ég efast um að margir vorkenni honum, þó fallið sé hátt. Hann talaði mikið um ábyrgð í Kastljósviðtali fyrir nokkrum mánuðum en bar hana ekki.

Í sannleika sagt trúi ég ekki Björgólfi - ímynd hans, sem hann reyndi að endurreisa, er í algjörri rúst og verður ekki púslað saman svo trúverðugt sé. Svo er það bara öllum öðrum en honum að kenna hvernig fór. Bara ef Seðlabankinn hefði látið hann fá meiri pening, þá hefði allt gengið - svo sagði Björgólfur.

Eitt er víst: Björgólfur, hinn iðrandi syndari, lenti í móðu, algjörum villigötum, og týndi sjálfum sér í græðginni. Hann hefði getað gert margt til að snúa málum á annan veg fyrir þónokkru en gerði ekki neitt, sukkaði í botn og iðraðist yfir falli sínu.

Ekki veit ég hvort Björgólfur eða aðrir yfirstjórnendur hrunsins muni rétta sinn hlut eða rísa upp úr öskustónni. En þeir eru ærulausir í þessu samfélagi. Svo mikið er ljóst.

Björgólfur gjaldþrota

Hálft ár vinstristjórnar - óleystu verkefnin

Ekki verður séð að vinstristjórnin hafi náð miklum árangri í verkum sínum, en sex mánuðir eru á morgun liðnir frá því að hún tók við völdum. Ekki er beinlínis hægt að segja að stórkostlegur árangur hafi náðst og vandamálin séu nær algjörlega óleyst. Afleitur samningur um Icesave, þar sem illa var staðið að málum og komið með heim með samning sem ómögulegt er fyrir þjóðina að sætta sig við.

Ekki verður séð að vinstristjórnin hafi staðið fyrir miklum þáttaskilum í íslenskum stjórnmálum. Yfirgangur framkvæmdavaldsins í garð löggjafarvaldsins hefur aldrei verið meiri en í þessari ríkisstjórn. Sannfæring þingmanna er völtuð niður miskunnarlaust, eins og sást í ESB-málinu og hefur glitt í hvað varðar Icesave-málið.

Vinstri grænir eru orðnir sérfræðingar í að taka þátt í því að gleypa sannfæringu sína í lykilmálum fyrir völdin á mettíma. Hverjum dettur í hug nú að segja að Steingrímur J. standi við sannfæringu sína og pólitískar hugsjónir, sé staðfastur baráttumaður og standi í lappirnar. Hann hefur staðið sig illa og fallið á prófinu hvað eftir annað.

Fyrsti mánuður vinstristjórnarinnar fór í að moka út úr Seðlabankanum. Endurvinna þurfti trúverðugleika var sagt. Hvar er staðan þar? Jú, sá sem mótaði stefnuna sem Seðlabankinn hefur unnið eftir í fjöldamörg ár var ráðinn seðlabankastjóri. Mikið afrek það. Var ekki sagt að allt myndi lagast ef þar yrði tekið til?

Eftir hálft ár eru vandamálin að mestu leyti óleyst. Mikið af klúðri hefur orðið á vakt þeirra sem ætluðu að breyta öllu og bæta. Verst af öllu er að gamaldagspólitík vinstriaflanna er algjör. Þeir hafa aukið mátt framkvæmdavaldsins og koma fram við Alþingi af skammarlegum yfirgangi.

Algjört hrun í afkomu ríkissjóðs

Bretar og Hollendingar kippa í spotta hjá IMF

Augljóst er nú að Bretar og Hollendingar hafa kippt í spotta hjá Alþjóða gjaldeyrissjóðnum til að tryggja að Íslendingar verði neyddir til að greiða Icesave-skuldbindingarnar. Þarna glittir í það veldi sem sumir vilja semja okkur inn í með aðild að Evrópusambandinu, Brussel-valdið margfræga. Þetta hefur Samfylkingin sætt sig við fyrir aðförina að Íslandi, fyrst með því að taka ekki slaginn við Brown.

Fyrir nokkrum vikum hótaði Gordon Brown íslensku þjóðinni því að toga í spotta hjá IMF til að taka okkur í bóndabeygju. Þetta er staðfesting þess að þeir hafa öll tögl og hagldir í IMF. Þar verður hugsað um þessar skuldbindingar fyrst og fremst.

Brown veit að hann getur togað í spotta hjá IMF og innan ESB með því að manípúlera aðildarviðræðum við Ísland, þegar þær hefjast, ef hann verður annars enn við völd. Hótunin er augljós.

Nú eigum við að fara að taka til okkar ráða og sparka frá okkur - það sem við áttum að gera í haust. Þessi aumingjabragur stjórnvalda síðan í haust hefur verið okkur nógu fjári dýrkeyptur.

Afgreiðslu AGS frestað

Flótti skollinn á í heilbrigðisstétt

Brotthvarf Huldu Gunnlaugsdóttur af forstjórastóli Landspítalans vekur spurningar um hvort flótti sé að skella á í heilbrigðisstétt. Flestum var ljóst að nær vonlaust væri að bjóða Huldu að taka á sig annan launasamning og í raun má búast við að sama gildi um lækna, þeir munu einfaldlega fara annað eigi að skera þá niður. Eins og einn læknirinn sagði fyrir nokkrum vikum að þá er meiri eftirspurn eftir íslenskum læknum erlendis en íslenskum stjórnmálamönnum.

Hulda Gunnlaugsdóttir hefur verið áberandi í umræðunni að undanförnu og augljóst að hún fór úr mjög krefjandi verkefnum, vel borguðum, fyrir það að halda heim. Hún var einfaldlega langhæfust umsækjenda og mikill styrkur fyrir spítalann að fá hana til starfa. Brotthvarf hennar veikir spítalann eflaust.

Hún hafði svosem átt erfitt í störfum að undanförnu og sérstaklega þegar hún var að réttlæta ráðningu spunameistara Össurar Skarphéðinssonar til spítalans. Ráðning sem leit út sem vinargreiði Ögmundar við Össur. Það var ekki beint bjartasta stund Huldu að verja það rugl.

Hulda í ársleyfi

Byggt til framtíðar með lottóvinningi

Ég vil óska milljónamæringnum unga til hamingju með lottóvinninginn á laugardag. Vinningssaga hans er eilítið notaleg og gott að hann ætlar að ávaxta auðinn í framtíðinni á skynsamlegan hátt. Þetta er góð afstaða til peninga að nota þá til að byggja til framtíðar en ekki sólunda peningum hratt og illa eins og sumir hafa því miður gert.

Hugarfar þeirra sem vinna hafa nefnilega áhrif til framtíðar. Sumir hafa spilað stórum vinningi úr höndum sér fljótt og farið illa með auðinn. Þetta hugarfar unga mannsins er heilbrigt og gott, sérstaklega á þessum tímum sem við lifum á.

Lottóvinngshafinn kominn fram

Er Bjarni Ármannsson að flytjast til Akureyrar?

Ein kjaftasagan sem maður heyrir er að Bjarni Ármannsson, fyrrum bankastjóri Íslandsbanka og Glitnis og stjórnarformaður REI, sé að hugleiða að flytjast til Akureyrar. Honum telji sér ekki vært á höfuðborgarsvæðinu eftir ágang að undanförnu og börnum hans leiðist í Noregi þar sem þau ætluðu sér að búa. Varla er við því að búast að tilveran sé jákvæð fyrir mann sem hefur haft allt en misst allt að því æruna og um leið orðið einn hataðasti maður landsins á mjög skömmum tíma.

Ég sá fjölda hinna svokölluðu útrásarvíkinga hér á Akureyri helgina sem pollamótið var haldið. Ef setið var á Bláu könnunni og gengið um miðbæinn mátti rekast á allnokkra og ég rakst á Sigurð Einarsson í Kaupþingi. Þetta var örugglega hann, varla var hann í sumarbústaðnum sínum í Borgarfirði. Varð var við að þessir útrásarvíkingar vöktu athygli fólks. Veit svosem ekki hvort eitthvað var vegið að þeim, en ég heyrði mikið talað um heimsókn þeirra dagana á eftir.

Skil svosem vel að Bjarni vilji flytja út á land og telji það rólega vist. En ég er viss um að ólgan vegna útrásarvíkinganna er litlu minni þar.

Ómerkileg framkoma

Mér finnst það vægast sagt ómerkilegt hjá Fortis-banka að frysta peninga til Íslands vegna skulda föllnu íslensku bankanna. Þetta er eitt dæmið um hversu ómerkilega er sótt að Íslandi á þessum erfiðu tímum. Við erum beitt mjög vægðarlausum hnefarétti og það versta er að við eigum fáa vini á alþjóðavettvangi. Greinilegt er að það á að pynda og berja Íslendinga til að sætta sig við eitthvað sem engin þjóð í alþjóðlegu samstarfi myndi sætta sig við.

Æ betur sést að við eigum að taka á okkur miklar byrðar gegn því að fá aðgöngumiða inn í aðildarviðræður við Evrópusambandið. Verst af öllu er að þeir stjórnmálamenn eru til hér á Íslandi sem eru tilbúnir að semja Ísland í vonlausa stöðu til að eygja von á nokkrum skrefum í áttina að gömlum pólitískum draumi, sem hefur verið mjög fjarlægur lengi. Ekki þarf að undra að Samfylkingin gengur þar fremst í flokki.

Framkoman við Ísland í Fortis-banka er lýsandi um hvernig staða Íslands er. Þar er eflaust mörgum um að kenna, en mikill ábyrgðarhluti er að taka eina þjóð af kortinu fyrir afglöp nokkurra.

Sitja á hundruðum milljóna

Fóru Ómar og Einar hringinn yfir hámarkshraða?

Mikið er rifist á netinu yfir því hvort Ómar Ragnarsson og Einar Vilhjálmsson hafi gefið upp rangar hraðatölur á hringakstri sínum. Þetta er vægast sagt vandræðalegt mál, einkum hvað varðar uppgefnar hraðatölur þar sem keyrt er á 94 í gegnum daginn. Ekki einu sinni bestu spunameistarar sögunnar geta afsakað svona vandræðagang.

Annars vona ég að þeim félögum gangi vel á keyrslunni. En það er eðlilegt að menn standi sig og birti réttar tölur vilji þeir láta taka sig trúanlega. Þetta er ögn vandræðalegt.

Vonandi fór lottóvinningurinn á góðan stað

Vonandi hefur stóri lottópotturinn farið á góðan stað, til þeirra sem virkilega þurfa þessa peninga. Annars er það alltaf smekksatriði hverjir þurfi á slíkum fjárfúlgum að halda og hvar það verður virkilega að traustri fótfestu í lífið - stoð fyrir þá sem eru fjárþurfi og í vanda.

Óska vinningshafanum til hamingju og vona að þeim gangi vel að höndla vinningsupphæðina og það sem henni fylgir. Kannski er best að fagna slíku einn með sínum nánustu frekar en sleikja upp umfjöllun í öllum fjölmiðlum.

Stundarfrægðin getur oft snúist upp í annað en hamingju.

Vann 46 milljónir í Lottó

Ísland þarf að borga þvert á yfirlýsingar Steingríms

Nú er ljóst að þvert á allar yfirlýsingar Steingríms J. Sigfússonar þurfa Íslendingar að borga kostnað Breta í Icesave-málinu. Hvernig stendur á því að fjármálaráðherrann getur ekki sagt bara satt og viðurkennt hvað felst í samkomulaginu? Ég held að þjóðin sé búin að fá alveg nóg af svona útúrsnúningum og tilraunum til blekkinga.

Þessi ákvæði eru niðurlægjandi - íslenska samninganefndin hefur algjörlega beygt sig í duftið í samningsgerðinni. Hún samdi af sér, hugsaði um hagsmuni annarra en Íslendinga. Þetta eru mestu afglöp íslenskrar stjórnmálasögu.

Ekki þýðir fyrir vinstri græna að benda á aðra í þeim efnum. Þeir gerðu þennan samning og skrifuðu undir hann - bera á honum fulla ábyrgð og verða að taka skellinn á sig, enda útilokað að þjóðin sætti sig við svona afglöp.

Niðurlægjandi ákvæði

Obama hopar - byrjendaklúður í Hvíta húsinu

Barack Obama, forseta Bandaríkjanna, varð heldur betur illa á í messunni þegar hann réðst að lögreglumanni í Massachusetts á blaðamannafundi í vikunni og sakaði hann um heimskulegt athæfi í starfi þegar hann sinnti aðeins sinni vinnu. Til að bæta gráu ofan á svart sagðist Obama ekki þekkja staðreyndir málsins allar nógu vel. Obama ætlaði sér að blása til sóknar til að bjarga heilbrigðisfrumvarpi sínu frá því að stefna í Waterloo-baráttu en blaðamannafundurinn drukknaði alveg í þessum byrjendamistökum hans.

Eftir að hafa átt góða sex mánuði í Hvíta húsinu er nýjabrumið að fara af Obama. Honum hefur tekist illa upp í forystu sinni með heilbrigðisfrumvarpið og virðist vera að tapa fylgi. Könnun Rasmussen í dag mælir Obama með innan við 50% stuðning í fyrsta skipti á forsetaferlinum. Hann mælist neðar en Jimmy Carter, eins kjörtímabils líberal forseti demókrata, gerði sumarið 1977. Nú reynir á forystuhæfileika Obama. George W. Bush er ekki lengur leikari í atburðarásinni og nú þurfa demókratar að fara að leiða mál.

Obama gerði alvarleg mistök á þessum blaðamannafundi með orðavali sínu um lögreglumanninn. Hann missti stjórn á sér og hefur kallað yfir sig reiði lögreglumanna um öll Bandaríkin og hann hefur ekki grætt á þessu í einu sterkasta líberal ríki Bandaríkjanna, Massachusetts, ríki Kennedy-anna. Svona mikil byrjendamistök hlýtur að vekja spurningar um hvort Obama sé að mistakast í forystu sinni og sé að missa gríðarlega trausta stöðu í upphafi kjörtímabilsins úr höndum sér.

Obama hringir í lögreglumann

Sættir Steingrímur J. sig við aðför að Íslandi?

Hvað er að gerast í fjármálaráðuneytinu þegar það sættir sig við að Norræni fjárfestingabankinn hætti að lána Íslendingum og setji þeim afarkosti? Skilaboðin þar eru einföld og hótanirnar augljósar - Icesave-samningurinn fari í gegn ella allt sett í salt. Annars er Steingrímur J. löngu hættur að koma fólki að óvörum. Dugleysi hans og þvermóðska er algjör.

Þetta bætist ofan á þann aumingjaskap, sem varð opinber í gær, að láta íslenska ríkið borga lögfræðikostnað breskra stjórnvalda vegna Icesave. Afglöp íslensku samninganefndarinnar í því máli verða æ augljósari og ekki hægt að tala um neinn samning lengur. Allt fellur á Íslendinga.

Þetta er versti samningur sem hefur verið gerður af hálfu Íslendinga. Geti vinstriflokkarnir ekki stöðvað hann samviskusamlega og tekið þetta klúður sitt úr sambandi ber að fella þessa ríkisstjórn með öllum tiltækum ráðum.

Þeim hlýtur að líða illa sem treystu vinstri grænum fyrir atkvæði sínu í vor. Enginn flokkur hefur samið af sér kosningaloforðin og pólitíska samvisku sína fyrir völd og mjúka stóla með meiri hraða og aumingjabrag en þeir.

Hættir að lána Íslendingum

Raunaleg forgangsröðun hjá vinstristjórninni

Mér finnst það raunaleg forgangsröðun hjá vinstristjórninni að skottast um með aðildarumsóknina til Stokkhólms og reyna að sleikja sig upp við þær þjóðir sem hafa snúið okkur í duftið á þessum síðustu og verstu tímum. Reyndar sýnist mér sem Samfylkingin hafi samið af sér íslenska hagsmuni fyrir þetta ljósmyndamóment með Carl Bildt í Icesave-samningunum.

Ekki virðist það duga. Þegar er farið að sparka í Íslendinga og hóta þeim af hálfu Hollendinga. Algjörir draumórar eru að telja ESB-málið og Icesave tvö aðskilin mál. Icesave mun hundelta okkur í þessum viðræðum. Við verðum látin standa skil á þeim og þurfum að taka á okkur auknar byrðar til að eygja von á ESB-aðild.

Eitt er að verða áþreifanlega augljóst þessa sumardaga. Hagsmunir Íslands hafa orðið aukaatriði í tilraun Samfylkingarinnar til að komast til Brussel.

Umsóknin á dagskrá á mánudag

Vinstriflokkarnir leita að útgönguleið úr vandræðum

Vandséð er hvernig vinstriflokkunum takist að komast út úr þeim ógöngum sem þeir hafa komið sér í með hinum afleita Icesave-samningi. Eflaust er leitað að mögulegri útgönguleið til að bjarga ríkisstjórninni frá falli - Steingrímur J. Sigfússon virðist vera að daga uppi pólitískt, fjara út, þessa dagana. Hann hefur lagt allt undir og á erfitt með að snúa til baka úr þeim leiðangri sem hann lagði upp í með pólitískum læriföður sínum, Svavari Gestssyni, sem hann handpikkaði í mikilvægustu samninganefnd í sögu þjóðarinnar vegna gloppóttra stjórnmálaafreka.

Augljóst er að þessi samningur var dýr aðgöngumiði í Evrópusambandið. Hann virðist þó varla ætla að duga. Nú þegar er farið að hóta Íslendingum eftir samþykkt þingsins á ESB-aðildarviðræðum. Sæla Samfylkingarinnar vegna þess afreks að semja allt af sér fyrir það að komast með tærnar hálfa leið til Brussel er vægast sagt skammlíf. Allt logar stafna á milli hjá vinstri grænum. Steingrímur J. er að missa pólitískt veganesti sitt úr höndunum. Hann er að missa flokkinn og þjóðina úr höndum sér.

Vond eru örlögin fyrir Steingrím Jóhann.... sem á ekkert nema vondar ákvarðanir og vonda valkosti í boði eftir hin afdrifaríku pólitísku afglöp og mistök. Þetta Icesave-mál er að verða hans Íraksmál. Hann er á sömu leið og Halldór Ásgrímsson forðum daga... og það á mettíma.

Hvorki fyrirvarar né frestun

Yfirnáttúrulegt eða hrein lygasaga?

Mér finnst sagan af stelpunni sem keyrði í svefni frá Húsafelli til Keflavíkur einum of til að vera sönn. Finnst þetta fjarstæðukennt. Nema þá að hægt sé að ganga í svefni, skrifa og hugsa alla hluti í svefni og gera þá óaðfinnanlega. Eitthvað við þetta hljómar meira en lítið óraunverulegt.

Ég hef reyndar lengi velt fyrir mér hvort hægt sé að ganga í svefni og gera alla mögulega hluti. Eitthvað við það sem er svolítið sérstakt. Stemmir ekki allt saman.

Þessi saga líkist frekar absúrd sögu í kvikmynd frekar en raunverulegum atburðum. Svo þarf hugmyndaflugið að ákveða hvort þetta sé satt... eða geti gerst.

Efast um það.

Ók landshluta á milli í svefni

Afleitur samningur - pólitísk áhætta Steingríms

Æ betur kemur í ljós hversu afleitur Icesave-samningurinn er. Alltaf koma fram nýjar tölur og hugleiðingar sem leiða í ljós að ekki er hægt að samþykkja þennan samning í þinginu. Steingrímur J. Sigfússon hefur hinsvegar lagt pólitíska framtíð sína undir fyrir þennan samning og ætlar að standa og falla með því greinilega hver örlög samningsins verða. Ekki er það skynsöm áhætta fyrir vinstri græna, en þeir eru reyndar að verða jafn stöðugir og vindhaninn á Stórhöfða.

Ég velti reyndar fyrir mér hvernig vinstri grænum og Samfylkingu líði með þennan afleita samning í fanginu og geta hvorki losað sig við hann né afneitað honum. Þvílík byrði, pólitískur harmleikur en sjálfskaparvíti. Mér finnst alltaf jafn aumingjalegt að sjá stjórnarsinna reyna að koma þessum samning yfir á aðra. Samningurinn er á pólitíska ábyrgð Steingríms J. og vinstri grænna. Þeir leiddu samninganefndina og skrifuðu undir fyrir hönd ríkisins. Þeirra er klúðrið.

Hver þeirra ætli verði fyrstur til að viðurkenna að þessi samningur er mega klúður? Þó það kosti þá áhættu að sparka í Steingrím J. En það er kannski með þetta eins og ESB... sá vinstri grænn sem þorir að rífa kjaft og sýna eigin sannfæringu og sanna forystu stendur uppi sem táknrænn sigurvegari.

Er ríkisstjórnin að gera samskonar mistök og útrásarvíkingarnir?

Pólitísk afstaða - staðið og fallið með skoðunum

Ég er ósammála afstöðu Ragnheiðar Ríkharðsdóttur í ESB-málinu en virði þó það að hún hafi tekið afstöðu í málinu, öfugt við Þorgerði Katrínu Gunnarsdóttur, varaformann Sjálfstæðisflokksins. Ragnheiður stendur og fellur með afstöðu sinni, pólitískri sannfæringu í málinu, og verður að verja þá afstöðu fyrir kjósendum og stuðningsmönnum Sjálfstæðisflokksins, bæði nú og síðar þegar og ef hún sækist eftir endurkjöri eða umboði flokksmanna.

Þorgerður Katrín tók ekki afstöðu. Mér finnst hjáseta í svo stóru máli ekki afstaða heldur hreinn og beinn aumingjaskapur. Munurinn á þeim er að önnur tekur afstöðu, þorir að taka af skarið á meðan hin þorir ekki að taka afstöðu, standa og falla með pólitískri sannfæringu. Svo verður að ráðast hvernig fer fyrir þeim í þeirri afstöðu.

Ragnheiður gerir grein fyrir atkvæði sínu

Þorgerður Katrín á að víkja sem varaformaður

Mér finnst að Þorgerður Katrín Gunnarsdóttir eigi að víkja sem varaformaður Sjálfstæðisflokksins eftir hjásetu í atkvæðagreiðslu um Evrópusambandsaðild. Ekki er hægt að bjóða almennum flokksmönnum upp á aumingjaskap af þessu tagi og skort á pólitískri forystu og leiðsögn. Mér finnst það mesti heigulsháttur sem hægt er að bjóða umbjóðendum sínum í pólitískri baráttu að sitja hjá og hafa enga afstöðu, enga skoðun, sóa atkvæði sínu í raun.

Ég held að margir sjálfstæðismenn séu á þeirri skoðun að Þorgerður Katrín eigi að finna sér eitthvað annað að gera og leyfa Sjálfstæðisflokknum að eflast til nýrra verka án tenginga bæði við hennar umdeildu fortíð í hruninu og annarra. Þegar við bætist að hún situr hjá í einu umdeildasta máli samtímans er ekki að sjá að það sé þörf fyrir hana í forystu flokksins.

Hún ætti að hugleiða sína stöðu og víkja af velli að mínu mati.

Staða Þorgerðar Katrínar veikist

Málningu slett hjá auðmönnum

Ekki fer á milli mála að útrásarvíkingarnir hafa breyst úr hálfguðum í hötuðustu menn samfélagsins á skömmum tíma. Ekki þarf að undrast reiði landsmanna. Mér finnst það samt einum of að sletta málningu á hús auðmannanna. Þeir eiga eftir að fá sína refsingu, sú hin mesta er reyndar sú að þeir eru í raun ærulausir hér heima á Íslandi. Þeir munu ekki geta látið sjá sig hér á meðan þrifin er upp óreiðan eftir þá.

Reiðin er mikil. Einhvern veginn verður hún að fá útrás. Þetta er ein leiðin, sú dapurlegasta að mínu mati. Miklu betra er að ráðast að þessum mönnum eða gagnrýna þá með skrifum og mætti málefnalegra skoðanaskipta heldur en með skemmdarverkum. Þeir hafa sjálfir unnið mikil skemmdarverk á samfélaginu og hafa misst bæði æruna og veldi sitt vegna eigin græðgi fyrst og fremst.

Málning á hús Bjarna Ármanns

Aumingjaskapur Þorgerðar Katrínar

Ég missti allt álit á Þorgerði Katrínu Gunnarsdóttur, varaformanni Sjálfstæðisflokksins, áðan þegar hún ákvað að sitja hjá í mikilvægri atkvæðagreiðslu um aðildarumsókn í Evrópusambandið.... tók bara enga afstöðu. Greinilegt er að hún studdi aðildarumsókn en þorði ekki að gera það. Þetta er ekta heigulsháttur sem einkennir afstöðu varaformanns Sjálfstæðisflokksins.

Ég ákvað að kjósa Þorgerði Katrínu sem varaformann á landsfundi í vor, vildi veita henni annan séns eftir að hún hafði brugðist flokksmönnum á mikilvægu augnabliki enda taldi ég lengi vel að hún ætti að fara úr forystunni með Geir H. Haarde. Bæði brugðust algjörlega þegar á reyndi. Ég sé eftir þeirri ákvörðun.

Svona fólk vil ég ekki sjá í pólitík og þaðan af síður styðja.

Þorgerður Katrín greiddi ekki atkvæði